Paśla taho, jak «Naša Niva» napisała pra aktualnyja zarobki dalnabojščykaŭ u Polščy, Litvie i Hiermanii, u sacyjalnych sietkach razharnułasia dyskusija, dzie lepš pracavać — u ES ci Rasii.
Dyskusiju ŭ adnym z kanałaŭ zadaŭ samy załajkany kamientar, aŭtar jakoha ličyć, što vybar vidavočny.
«Tut abmiarkoŭvać niama čaho. U Jeŭropie ŭmovy vyhadniejšyja jak pa zarobku, tak i pa režymie pracy».
Adnak z hetym pahadzilisia nie ŭsie. Jamu adrazu ž zapiarečyli, što ŭ Rasii možna zarabić navat bolš, kali viedać, dzie i jak pracavać.
«U Rasii zarobki vyšejšyja. Jość firmy, dzie katajuć pa RTA [režym pracy i adpačynku] — 2300 jeŭra ŭ miesiac spakojna i 10 dzion doma ŭ miesiac. I nie treba tut — heta fakt! Jość chto choča bolš i z parušeńniem RTA — kali łaska, ale tam i pa 3000 jeŭra možna rabić».
Inšy kiroŭca z 15‑hadovym dośviedam padrabiazna raśpisaŭ, čamu, na jaho dumku, paraŭnoŭvać hetyja dva kirunki ŭvohule nielha.
«Rasiju i Jeŭropu navat paraŭnoŭvać nielha! Usie, chto tam kryčyć za Rasiju i RB, prosta bajacca iści ŭ Jeŭropu, bo pa tacho [tachohrafu] pracavać nie ŭmiejuć dy ačkujuć. U Rasii treba hnać kiłamietry, načnyja zahruzki, čerhi na zahruzkach na niekalki dzion, na rynkach stoj-handluj (i tentaŭ tyčycca taksama), koły, ramonty rabi, i łahistaŭ-dziaciej nabrali dy padhaniajuć. Na parkinhach brudu pa kalena, adzin plus — ježa tannaja, cyharety i baby. Usio.
Pra Aziju ŭvohule maŭču, krainy zaviśli ŭ XVIII‑-XIX stahodździ. U Jeŭropie ŭziaŭ viskaryka, i smaž hryl, babło idzie, mašyny novyja, praca nie pylnaja, zarobak vyšejšy — heta 1000%. I možacie kryčać što chočacie, u Jeŭropie ŭmovy i apłata 100% lepšyja. 15 hadoŭ pracuju ŭ śfiery, daviałosia jeździć i pa Rasii, i Azii, jość z čym paraŭnoŭvać».
Toje na toje i vychodzić?
Ale nie ŭsie zhodnyja z takoj idealistyčnaj karcinaj pracy ŭ ES. Apanienty śćviardžajuć, što realnaść nie takaja radasnaja: načleh u kabinie taksama častaja źjava, parušeńni režymu i vysokija ceny źjadajuć značnuju častku zarobku.
«Što za bzdura, jak byli ŭ Jeŭropie načoŭki ŭ kabinie, tak i zastalisia, tolki 48 [hadzin] nielha. Pa RTA ŭ Rasii amal usie katajuć, narmalny ciapier režym. Bolš za $2000 u Rasii atrymlivajuć, viza nie patrebnaja, pradukty našmat tańniejšyja, u vyniku toje na toje i vychodzić».
Nakont načlehu ŭ kabinie jamu adkazali:
«U Jeŭropie maŭčać pra 45‑hadzinnuju paŭzu ŭ kabinie. U Šviejcaryi trapiš na kantrol, tam uniasuć finansavuju jasnaść, što nielha 45 hadzin pravodzić u kabinie».
Inšy kamientatar dadaje: «8 hadzin u dzień u Jeŭropie i adpačyvać žalezna??? Heta chto tam tak pracuje??? 2‑-3 razy pa 15 [hadzin kiravańnia] na tydzień žalezna. I pracujuć bolšaść da 99 hadzin jazdy za 2 tydni. Tak, za 95-‑100 [jeŭra] u dzień. Dyk pačak cyharet 10 [jeŭra] kaštuje. I pajeści adpaviedna. Vyciskajuć pa RTA maksimum mahčymaha. I ź jakoha heta času na polskich mašynach pačali spać u hatelach??? Nie rabicie mnie śmiešna».
Kolki zarablajuć dalnabojščyki ŭ Jeŭropie?
U dyskusii prahučali i kankretnyja ličby zarobkaŭ u Jeŭropie.
«U Polščy — 500 złotych u dzień (kala 120 jeŭra)», «82 jeŭra ŭ sutki na refryžeratary (Polšča), za miesiac 10 000 km», «94 jeŭra ŭ sutki, 9000‑-10000 km prabiehu», «110 jeŭra ŭ sutki (Niderłandy — Francyja), na vychodnych 70‑hadzinnaja paŭza».
Ale tut ža pačałasia sprečka pra toje, što ličyć «čystym» zarobkam:
«100 jeŭra — heta nie čystymi. Adnimicie ježu, padatki i paličycie, ci varty taki zarobak žyćcia ŭ darozie», — zaŭvažyŭ adzin mužčyny.
Inšy mužčyna praciahnuŭ:
«Usie, chto tam pišuć 100—95‑82 jeŭra ŭ sutki, čamu vy nie pišacie, što heta «brudnymi» takija sumy? 17 jeŭra ŭ dzień tracicca na ježu, heta biez papiaros dy piva, nie kažučy pra šnaps. A tak, to mnie i 100 płacili da maja minułaha hoda, a jak zabaranili ŭvoz ježy, ja i nie pajechaŭ bolš. Kali što, ja z 94‑ha hodzika na Jeŭropie byŭ».
Na heta inšy karystalnik zaŭvažyŭ, što «95 — heta čystymi na ruki. A pa ježy chto što lubić, tak i tracić». Adnak aŭtar pasta ŭdakładniŭ, što dla jaho «čystyja» — heta suma, «što ty maješ na vychłapie, pryjechaŭšy dachaty».
A kolki zarablajuć u Rasii?
Što tyčycca zarobkaŭ u Rasii, to tut ličby i mierkavańni mocna razychodziacca. Dyjapazon vialiki: adzin z kiroŭcaŭ piša pra siaredni zarobak 130 tysiač rasijskich rubloŭ (na siońnia ~1350 jeŭra) za 13 500 km prabiehu, inšy — pra 190 tysiač (na siońnia ~2000 jeŭra) za 8‑-12 tysiač km. Niekatoryja ž śćviardžajuć, što «nie pierapracoŭvajučy» zarablajuć i 280 tysiač rubloŭ (na siońnia ~2900 jeŭra).
U toj ža čas, inšy kamientatar skardzicca na samu sistemu apłaty. Pavodle jaho, znajści pracu sa stabilnaj staŭkaj za dzień składana, bo pracadaŭcy prapanujuć «da 80 jeŭra ŭ dzień», i ŭ vyniku zarobak kiroŭcy mocna zaležyć ad «łahistaŭ, pahruzak, trafiku, ramontaŭ».
Kožny vybiraje svajo
Urešcie, mnohija sychodziacca na dumcy, što vybar kirunku — sprava asabistaja, i nie ŭsie viartajucca ŭ Rasiju pa svajoj voli.
«Pracavaŭ raniej pa Rasii, Azii, ciapier tolki pa Jeŭropie, i asabistaha žadańnia niama viartacca. Takoha ž mierkavańnia i ŭsie znajomyja, i na parkoŭcy pry znosinach nichto sam nie choča viartacca pracavać pa RF. Tolki tym, kamu anulavali vizy i h.d., nie pa svajoj voli viartajucca. Mnohija potym pieraabuvajucca i kažuć, što nibyta sam zachacieŭ, a adzinki kažuć praŭdu, što los prymusiŭ. Skažu tak: praściej było pa RF — heta kamunikacyja i vyhruzki ŭ šyrokich miescach. U Jeŭropie vyhadniej pa RTA, zdaroŭje nie pakutuje».
Zrešty, byli i tyja, chto zaklikaŭ spynić sprečki, bo kožny vybiraje toje, što jamu bolš daspadoby.
«Navošta spračacca, ludzi pracujuć, dzie im padabajecca i da dušy. Tut sprava asabista kožnaha, usiudy jość plusy, usiudy jość minusy».
«Ciarpieńnia i ŭdačy. Pracujuć tam, dzie padabajecca. Chtości ŭ Rasii, chtości ŭ Jeŭropie. Usio roŭna jeŭra, jeŭra, jeŭra… Chto bolš? Zdaroŭja, zastavajciesia ludźmi, radujciesia žyćciu».
Biełaruskija dalnabojščyki ŭsio čaściej vybirajuć dla pracy Hiermaniju zamiest Polščy i Litvy. Raskazvajuć pra zarobki
Biełaruskija dalnaboi ŭ Jeŭropie: haračaja dyskusija ŭ sacsietkach pra toje, u jakoj krainie jany zarablajuć najbolš i majuć najlepšyja ŭmovy pracy
Pad Urocłavam pjany biełaruski dalnabojščyk paralizavaŭ cełuju trasu
Kamientary