Były dyrektar Liceja BDU raskazaŭ, jak Kola Łukašenka niečakana jamu dapamoh
U novym vypusku TOKu Ihar Varaksa, jaki ŭ 2019‑-2021 hadach byŭ dyrektaram Liceja BDU, raskazaŭ, jak fakt pastupleńnia małodšaha syna Alaksandra Łukašenki dazvoliŭ vyrašyć adnu prablemu.
«Nie samaja pryjemnaja sprava ŭ dyrektarskaj rabocie — zajmacca ŭstupnaj kampanijaj», — zaŭvažaje Ihar Varaksa i tłumačyć, što akramia vialikaha abjomu pracy, źviazanaha z padrychtoŭkaj ustupnych ispytaŭ i pravierkaj vynikaŭ, dyrektar znachodzicca pad ciskam roznych prośbitaŭ. Ab takoj praktycy, pa słovach Varaksy, jaho papiaredžvaŭ były dyrektar Liceja Hienadź Palčyk.
«I sapraŭdy pajšli. Było tak dziŭna. Roznyja ludzi», — zaŭvažaje Varaksa. «Ja nie viedaju, što było dahetul. (…) Ale ŭ 2020 hodzie toje, što mnie mocna dapamahło, — što akurat Mikałaj Łukašenka zachacieŭ pastupać u Licej».
Na pytańnie, čym kankretna heta dapamahło, były dyrektar Liceja BDU adkazaŭ:
«Była takaja dumka, raz jon padaŭ dakumienty, my, napeŭna, budziem sami jaho niejak prasoŭvać. Karaciej, da mianie nichto nie źviartaŭsia z Administracyi [Łukašenki]. Nichto.
A kali chtości prychodziŭ i pačynaŭ: «Nu, voś tut treba, moža, dapamahčy…» — ja kažu: «Viedajecie, Mikałaj Łukašenka pastupaje ŭ Licej BDU ŭ hetym hodzie. Vy, napeŭna, čuli. Dyk voś, za jaho nichto nie prosić. A vy chočacie, kab za vaša dzicia my štości rabili? Kali syn prezidenta pastupaje sam, a vy chočacie, kab vašamu dapamahli?»
Heta była prosta bomba. Usie: «Nu, okiej». I ŭsio, pajšoŭ».
Pa słovach Varaksy, takich prasicielaŭ, jakija źviartalisia niepasredna da jaho, było 5‑10 čałaviek. I na ŭsich dziejničała jaho dziažurnaja fraza pra Kolu Łukašenku.
«Heta była vydatnaja reč. Ja vielmi ŭdziačny Mikałaju, što jon u tym hodzie pastupaŭ».
Nahadajem, što ŭ červieni 2020 hoda stała viadoma, što Kola Łukašenka pastupiŭ u Licej BDU. Jon abraŭ bijałahičny profil, konkurs na jaki składaŭ 6,5 čałavieka na miesca. Adnak paśla pratestaŭ leta 2020‑ha jaho dakumienty zabrali, jon pajšoŭ u 10‑ty kłas pryvatnaj škoły, zasnavalnicaj jakoj źjaŭlałasia jaho maci — Iryna Abielskaja.
Ciapier čytajuć
«Natalla Ejsmant moža ŭsio». Aryštavany za chabary dyrektar Pałaca Respubliki ŭžo na svabodzie i navat z novaj pasadaj12
Kamientary