Kanhres daść apazycyi lehitymnaha lidera

Praca kanhresu demakratyčnych siłaŭ budzie doŭžycca dva dni — 15 hadzinaŭ. Upieršyniu za piać hod (z času kanhresu ŭ lipieni 2000 h.) aficyjna źbiarecca tysiačnaja hramada aktyvistaŭ apazycyi z ŭsioj krainy. Hałoŭnych pretendentaŭ — dva: Aleś Milinkievič i staršynia AHP Anatol Labiedźka. Istotnuju papularnaść maje i enerhičny lider PKB Siarhiej Kalakin. Ale, musić, jahony zorny čas jašče ŭ budučyni. Kali nivodzin z kandydataŭ nie nabiare ŭ pieršym tury 50% + adzin hołas ad ahulnaj kolkaści tych, chto voźmie ŭdzieł u hałasavańni, adbudziecca druhi tur.

Kali hałasavańnie projdzie ŭ adzin tur, adziny kandydat budzie mieć bolšy mandat davieru i svabodu dziejańniaŭ.

Paśla abrańnia adzinaha kandydata da ahulnaha pracesu možna budzie dałučycca ŭ luby momant. Treba dumać, što tak u vyniku j zrobiać mnohija adzinokija palityki. Choć dahetul jany dystancyjujucca ad Kanhresu. Uładzimier Parfianovič u razmovie z karespandentam «NN» padkreśliŭ: «Heta budzie nie kanhres usich demakratyčnych siłaŭ, a kanhres palityčnych partyjaŭ». Hałoŭnaj zadačaj kanhresu jon bačyć pryznańnie nielehitymnaści ŭdziełu A.Łukašenki ŭ vybarach.

Kiraŭnik Biełaruskaha PEN-centru Lavon Barščeŭski trymajecca inšaje dumki: «Abrany na kanhresie kandydat budzie samy lehitymny z usich pretendentaŭ na alternatyvu». Palitolah Siarhiej Pańkoŭski taksama adznačaje: «Perspektyŭnym budzie luby kandydat, jaki voźmie za metu nia stolki realizacyju svajho bačańnia Biełarusi, kolki viartańnie da praviłaŭ sumlennaj hulni».

Forum, chto b nia byŭ abrany na im adzinym apazycyjnym kandydatam u prezydenty, daść apazycyi lehitymnaha lidera. Ale adzinamu kandydytu pryjdziecca kali nie spałučyć, dyk prymiryć dahetul u našaj krainie niespałučalnaje — levyja, liberalnyja j kanservatyŭnyja kaštoŭnaści. Tamu Viktara Karniajenku — kiraŭnika štabu A.Milinkieviča — niepakoić nieviadomaść kanfihuracyi budučaj kaalicyi paśla kanhresu: «My deklarujem hatoŭnaść da adzinstva, ale djabał chavajecca ŭ drobiaziach».

Kali ŭłady ŭ apošni momant pojduć na pravakacyi, apazycyjnaje mierapryjemstva pieratvorycca ŭ skandał. Apazycyja admysłova paprasiła, kab zala DK była zahadzia ahledžanaja sapiorami, kab tam vypadkova nie źjaviłasia niejkaja «mina». Supracoŭniki HUUS Mienharvykankamu deklaravali zabiaśpiečyć achovu paradku na terytoryi vakoł DK MAZ. Kali raptam ŭsio ž uźniknie «fors-mažor», kanhres adbudziecca 16 kastryčnika za miežami Biełarusi, u Kijevie ci Smalensku.

Cikava, što «Dažynki-2005» pieraniesieny ź 30 vieraśnia — 1 kastryčnika jak minimum na tydzień. Padstava — «arhanizacyjnyja pryčyny». Kiraŭnik pres-słužby prezydenta Pavał Lohki adrynuŭ čutki, što pieranos «Dažynak» źviazany z udziełam prezydenta ŭ niejkim važnym mierapryjemstvie pry kancy tydnia. Ale za pieranosam jaŭna staić imknieńnie Łukašenki ŭzmacnić prapahandyscki efekt «Dažynak». Sam Łukašenka na kanhres nia pryjdzie, bo jamu pryjšłosia b u takim vypadku dać budučamu kandydatu ad apazycyi słova na ŭłasnym Usiebiełaruskim schodzie, a jon hetaha baicca jak ahniu.

Badaj, upieršyniu za dziesiać hadoŭ apazycyja hraje na apieradžeńnie. Da aficyjnaha abviaščeńnia vybarčaj kampanii zastałosia šeść miesiacaŭ. Času šmat, ale pytańni ŭsio roŭna zastajucca. Jak adziny kandydat zbuduje pieradvybarnuju stratehiju, ci nie dapuścić prakołu na etapach zboru podpisaŭ ci ŭłasnaj prezentacyi. Ale heta ŭžo pytańni zusim inšaj hrupy.

Samym prykrym na parlamenckich vybarach-2004 było toje, što apazycyja vyłučała pa niekalki kandydataŭ na akruhu, a łukašenkaŭcy faktyčna vybirali ź ich samaha zručnaha dla siabie. Hałoŭnaje, što kandydat u prezydenty ad demakrataŭ budzie adzin i što vybiera jaho sabie nie Łukašenka, a šyrokaja demakratyčnaja reprezentacyja.

• 0
• 0
• 0
• 0
• 0
• 0
• 0
• 0