Kiorlinh pa-Jechanuraŭsku

Ukrainskamu premjeru pakazali biełaruskuju industryju.

Jechanuraŭ prypaźniaŭsia. I tolki tady, kali na fasadzie administracyi MTZ pačaŭ krucicca traktar na padstaŭcy, stała jasna: niemały kartež ukrainskaha premjera ŭ supravadžeńni matacyklistaŭ uziaŭ kirunak u bok vołata ajčynnaha traktarabudavańnia.

Nievysoki i niehamanki, Jechanuraŭ imkliva pryniaŭ pryvitańni ad dziaŭčataŭ u strojach, uščyknuŭ bochan dy nakiravaŭsia ŭ cech u atačeńni čarodki biełaruskich dy ŭkrainskich čynoŭnikaŭ. Z rabočymi, apranutymi ŭ naviutkija žoŭta-zialonyja kambinezony, Jechanuraŭ nie razmaŭlaŭ. Jon kročyŭ pa cechu, časta ŭśmichaŭsia, ale ŭsio bolš maŭčaŭ i pahladaŭ prymružanymi vačyma na hieneralnaha dyrektara MTZ Alaksandra Puchavoha, jaki, enerhična žestykulujučy, sprabavaŭ pierakryčać lask i hrukat.

Ahlad pradukcyi praciahnuŭsia ŭ dvoryku, dzie šeraham stajali čyrvonyja traktary. Kali b ukrainski premjer padyšoŭ bližej, dyk zmoh by ŭbačyć na mnohich ź ich pakryški z nadpisam «Made in Ukraine». Ale Jechanuraŭ vyjaŭlaŭ da techniki davoli strymanuju cikavaść. Kali pierad im vietliva adčyniŭ dźviercy supernovy traktar «Biełarus-2522», ukrainski premjer navat nie kranuŭsia ź miesca: «Nie, u nas inšy tavaryš budzie łazić». Paźniej, padčas vizytu na MAZ, Jechanuraŭ nie pažadaŭ sieści i za styrno hruzavika, choć takaja mahčymaść asobnym punktam była praduhledžanaja ŭ prahramie vizytu. Chutčej za ŭsio, jon nie pažadaŭ rabicca hierojem biaspłatnaj reklamy pa prykładu hubernatara Maskoŭskaj vobłaści Barysa Hromava, čyjo fota za styrnom MAZa abyšło dziaržaŭnyja hazety. Jechanuraŭ tolki raśpisaŭsia ŭ knizie dla haściej MTZ. Tannaj plastmasavaj asadkaj aranžavaha koleru. I schavaŭ jaje ŭ kišeni pad sercam.

Ukrainski ŭrad maje admysłovuju prahramu, meta jakoj — dapamahčy fermeram raźličvacca za techniku. Naturalna, dyrektary biełaruskich pradpryjemstvaŭ zacikaŭlenyja ŭ tym, kab mienavita našaja technika pajšła na ŭkrainskija paletki. Ale ci byŭ handal traktarami dy ciahačami hałoŭnym pradmietam pieramovaŭ? Pamiž Biełaruśsiu i Ŭkrainaj chapaje prablemaŭ. Premjer Sidorski nahadaŭ Jechanuravu, što biełaruski bok čakaje, kali Ŭkraina viernie nam 134 młn dalaraŭ. «U nas niama miždziaržaŭnych zapazyčanaściaŭ — jość karparatyŭnyja daŭhi», — paryravaŭ ukrainski premjer. Razam z tym, źjaviłasia infarmacyja, što Ŭkraina, mahčyma, budzie addavać pazyki pastaŭkami ŭkrainskich tavaraŭ dy elektraenerhii. Kali hetaha nie adbudziecca, Biełaruś pahražaje nie ratyfikavać damovu pra miažu z Ukrainaj, što pastavić kryž na jaje ŭvachodzie ŭ Eŭraźviaz dy NATO.

Svaju pracu ŭ Biełarusi Jechanuraŭ paraŭnaŭ z kiorlinham — vidam sportu, dzie pa lodzie katajuć hranitnyja kamianiski, nacirajučy pierad hetym šlach admysłovymi ščotačkami. Takim pracirańniem, kaža Jechanuraŭ, i davodzicca zajmacca jamu ź Sidorskim. Jechanuraŭ pieradaŭ Alaksandru Łukašenku zaprašeńnie ad Viktara Juščanki zavitać va Ŭkrainu. Vizyt maje adbycca nie paźniej za 20 krasavika. Kali lod budzie dastatkova hładkim.

• 0
• 0
• 0
• 0
• 0
• 0
• 0
• 0