Kab adkryć u Minsku kaviarniu na 50 miescaŭ, treba miljon dalaraŭ

Dla taho kab adkryć u Minsku kafe pryblizna na 50 pasadačnych miescaŭ, siońnia spatrebicca miljon dalaraŭ ZŠA. Takuju ličbu nazvaŭ dyrektar staličnych restaranaŭ «Kamianica», «Biełaruskaja karčma» i «Ahinski» Siarhiej Čahryniec padčas kruhłaha stała, jaki prajšoŭ 27 lutaha ŭ Minsku.

U hetu sumu, rastłumačyŭ jon, uvachodzić dolevaje budaŭnictva abjekta pad restaran ci kafe i raschody na abstalavańnie jaho technałahičnaj linijaj. «Piaćdziesiat pracentaŭ płoščaŭ luboha restarana zajmaje nie handlovaja zała, a pamiaškańni, nieabchodnyja dla padrychtoŭki. Dla taho kab vykonvać usie režymy zachoŭvańnia, abjekt pavinien mieć vosiem chaładzilnych ahrehataŭ z roznymi tempieraturnymi režymami», — raskazaŭ restaratar.

Akramia taho, u raschodnuju častku hetaha biźniesu ŭvachodzić achoŭnaja sihnalizacyja pamiaškańniaŭ, ustanoŭka jakoj abydziecca prykładna ŭ 100 miljonaŭ rubloŭ.

Pavodle słoŭ Čahrynca, dla taho kab u Minsku stała bolš punktaŭ hramadskaha charčavańnia, nieabchodna najaŭnaść arendnych płoščaŭ i kvalifikavanaha piersanału.

«Na siońniašni dzień 99% ludziej, jakija prychodziać va ŭstanovy ŭ jakaści aficyjanta i kuchara, ličać hetyja prafiesii časovymi. Bolšaść ź ich atrymlivajuć vyšejšuju adukacyju», — zaŭvažyŭ restaratar.

Pavodle słoŭ zasnavalnika sietki restaranaŭ «Stary horad», «Pinta» i People's Taćciany Hałuzy, z adnaho boku, klijenty, u tym liku pryjezdžyja, adznačajuć dušeŭnaść rabotnikaŭ punktaŭ ahulnaha charčavańnia Biełarusi, ź inšaha — aficyjanty i administratary «nie zusim adpaviadajuć tamu ŭzroŭniu», jaki chacieli b bačyć ułaśniki ŭstanoŭ.

Na prablemu padboru piersanału źviarnuŭ uvahu i dyrektar restaranaŭ «Lisinaja Nara» i «Staraja tradycyja» Alaksiej Savieljeŭ. «Jość ludzi, jakija zdolnyja adkryta kantaktavać z klijentam. Ale, na žal, popyt na piersanał raście, i vybirać prychodzicca ŭžo z zusim roznych ludziej. Pryjdziecca prychodzić da sistemy standartaŭ», — padkreśliŭ jon.

U Biełarusi, ličyć Savieljeŭ, niama stratehii raźvićcia pradpryjemstvaŭ ahulnaha charčavańnia.

Pavodle infarmacyi hałoŭnaha ŭpraŭleńnia spažyvieckaha rynku Minharvykankama, u horadzie pracujuć 1.463 abjekty hramadskaha charčavańnia na 74 tysiačy miescaŭ biez uliku stałovych pradpryjemstvaŭ. Siarod ich — 139 restaranaŭ, 348 kafe, 278 baraŭ i prykładna 700 zakusačnych i kafeteryjaŭ. Siońnia na 1.000 čałaviek prychodzicca 39 miescaŭ. Da 2015 hoda hety pakazčyk płanujecca davieści da 45 miescaŭ.

• 0
• 0
• 0
• 0
• 0
• 0
• 0
• 0