Jeŭrasajuz hatovy da novaha pieryjadu «ŭciahvańnia» Biełarusi

Arhanizatary nie čakali takoha ažyjatažu vakoł kanferencyi, jakaja adbyłasia siońnia ŭ Bruseli. Pavyšanuju cikavaść spravakavali zajavy, apublikavanyja ŭ internecie napiaredadni, — spačatku supolnaja deklaracyja Janukieviča, Milinkieviča i Niaklajeva, a potym reakcyja Andreja Sańnikava. Hałoŭnaje pytańnie, jakoje ŭ čarhovy raz padzialiła apazycyju — ci patrebny dyjaloh z režymam?

«Dyjaloh pra madernizacyju ź biełaruskim hramadztvam», — tak aficyjna nazyvałasia kanferencyja, chacia vystupy eŭradeputataŭ i pradstaŭnikoŭ biełaruskaj hramadzianskaj supolnaści achoplivali značna šyrejšyja temy.

Zala była praktyčna zapoŭnienaja. U kalidorach Eŭraparlamentu zahučała biełaruskaja mova. Akramia zaprošanych haściej, byli biełaruskija studenty z Varšavy, pradstaŭniki biełaruskaj emihracyi, analityki i žurnalisty.

Ź vitalnym słovam vystupiŭ niepasredny arhanizatar kanferencyi, staršynia kamitetu pa dačynieńniach ź Biełaruśsiu, polski deputat Filip Kačmarek. Jon prapanavaŭ praanalizavać vyniki i parazvažać pra budučyniu prajektu «Dyjaloh pa madernizacyi», jakomu ŭ sakaviku spoŭniŭsia hod.

Namieśnik ministra zamiežnych spravaŭ Polščy Ježy Pamianoŭski adznačyŭ, što ŭłady nie demanstrujuć žadańnia da dyjalohu pra madernizacyju, ale pry hetym u biełaruskim hramadztvie adbyvajucca istotnyja źmieny. Pavodle Pamianoŭskaha, ułady Biełarusi nie razumiejuć, što «madernizacyja — heta nia značyć pafarbavać płot».

Vice-staršynia Eŭraparlamentu Jacek Pratasievič adznačyŭ, što dyjaloh nieabchodny, i spasłaŭsia na dośvied polskaj «Salidarnaści». Pavodle jaho słovaŭ, treba supracoŭničać z elitami na miascovym uzroŭni, što rana ci pozna nastupić peryjad transfarmacyi, kali kantakty i dośvied hetych ludziej buduć nieabchodnyja.

Staršynia kamitetu pa zamiežnych spravach Eŭraparlamentu Elmar Brok padkreśliŭ, što prablema efektyŭnaści «Dyjalohu pra madernizacyju» nia ŭ tym, kab pavialičyć hrašovuju dapamohu, a ŭ tym, jak hetyja hrošy asvojvajucca. Taksama vykazaŭ skiepsis što da samitu «Uschodniaha partnerstva», jaki maje adbycca ŭ Vilni ŭvosień.

Laŭreat premii Eŭraparlamentu imia Sacharava 2006 h. Alaksandar Milinkievič (mienavita tak jaho pradstaviŭ viadučy) vykazaŭsia na karyść dyjalohu Eŭraźviazu z režymam, pakolki heta adciahnie Biełaruś ad Rasiei. Pavodle jaho słovaŭ, u vyniku dyjalohu ŭ 2008–2010 hadach represii źmienšylisia ŭ try razy, i dyjaloh byŭ pierarvany ŭ śniežni 2010 hodu ŭ vyniku pravakacyi specsłužbaŭ «z rasiejskim śledam». Taksama Milinkievič zaklikaŭ Eŭraźviaz admovicca ad sankcyjaŭ: «Sankcyi nie vyzvalajuć palitviaźniaŭ, jany pavialičvajuć antyzachodnija nastroi, pamianšajuć upłyŭ demakrataŭ i paskarajuć ekanamičnuju ahresiju z boku Rasiei».

Dyrektar departamentu pa pytańniach Rasiei, Uschodniaha partnerstva, Centralnaj Azii, rehijanalnaha supracoŭnictva i ABSE Eŭrapiejskaj słužby zamiežnaha dziejańnia Eŭraźviazu Hunar Vihand paviedamiŭ, što ŭ Tbilisi adbyłasia sustreča, padčas jakoj Štefan Fiule i Uładzimir Makiej damovilisia ab dałučeńni Biełarusi da «Dyjalohu pra madernizacyju». Čynoŭnik vykazaŭ škadavańnie, što ŭłady Biełarusi admaŭlajucca ad dyjalohu z udziełam pradstaŭnikoŭ hramadzianskaj supolnaści.

Adzin z kaardynataraŭ pracoŭnych hrupaŭ «Dyjalohu pra madernizacyju» Alaksandar Aŭtuška-Sikorski pakazaŭ słajdy z analizam i acenkaj efektyŭnaści prajektu. U planach — adkryćcio hetak zvanaj «druhoj ściežki» dyjalohu — z udziełam uradu Biełarusi.

Pravaabaronca Valancin Stefanovič adznačyŭ, što spadziavacca na šmat krokaŭ z boku ŭłady nie vypadaje, i «kali budzie adbyvacca madernizacyja, to heta budzie aŭtarytarnaja madernizacyja, biez demakratyzacyi hramadztva».

Anatol Labiedźka raskrytykavaŭ ideju dyjalohu z uładami biez udziełu hramadzianskaj supolnaści: «Pa-raniejšamu zastajucca try ŭmovy: vyzvaleńnie viaźniaŭ i ich reabilitacyja, praviadzieńnie svabodnych i prazrystych vybaraŭ, a paśla — dyjaloh pra madernizacyju. I tolki ŭ takim paradku, nijakim inšym».

Na kanferencyi nie prymałasia rašeńniaŭ i rezalucyjaŭ. Adnak, miarkujučy pa ŭsim, «Dyjaloh pra madernizacyju» budzie praciahvacca. I ŭsio ž ci atrymajecca ŭciahnuć u hety prajekt ułady Biełarusi i na čyich umovach — adzinaha mierkavańnia nakont hetaha nia vykazali ani biełaruskija ŭdzielniki, ani eŭraparlamentary.

• 0
• 0
• 0
• 0
• 0
• 0
• 0
• 0