Śledčyja: napad na bank u Lubani arhanizavaŭ supracoŭnik milicyi
Dvoje padazravanych u ździajśnieńni dziorzkaha złačynstva zatrymanyja.
Vyśvietlenyja padazravanyja ŭ arhanizacyi i ažyćciaŭleńni razbojnaha napadu na adździaleńnie banka ŭ Lubani, dvoje ź ich zatrymany. Pra heta BiełaPAN paviedamiła aficyjny pradstaŭnik Śledčaha kamiteta Biełarusi Julija Hančarova.
Nahadajem, 21 krasavika dvoje nieviadomych u maskach pranikli ŭ pamiaškańnie adździaleńnia AAT «Biełahramprambank» u Lubani, źbili supracoŭnika milicyi, zavałodali jaho tabielnaj zbrojaj, źviazali kasira, jaki znachodziŭsia na pracoŭnym miescy. Złačyncy vykrali hrošy banka, paśla čaho źnikli na inkasatarskimi aŭtamabili. Hałoŭnym śledčym upraŭleńniem SK była raspačataja kryminalnaja sprava pa č. 3 art. 207 KK (razboj) i č. 4 art. 294 KK (kradziež ahniastrelnaj zbroi).
Vyrašajecca pytańnie ab dadatkovaj kvalifikacyi pa art. 218 KK (naŭmysnaje źniščeńnie abo paškodžańnie majomaści).
Pa słovach Julii Hančarovaj, dla rasśledavańnia kryminalnaj spravy stvorana śledčaja hrupa pad kiraŭnictvam adnaho z samych vopytnych śledčych hałoŭnaha śledčaha ŭpraŭleńnia SK, u jakuju ŭklučyli vysokakvalifikavanych apieratyŭnych supracoŭnikaŭ MUS.
Śledstva vyjaviła, što dva rabaŭniki trapili ŭ adździaleńnie banka, majučy raniej vyrablenyja klučy. Zabraŭšy hrošy, jany ŭciakli na inkasatarskaj mašynie, jakuju paśla spalili.Potym napadniki źjechali na inšym aŭto.
Było vykradziena bolš za 1 miljard rubloŭ, kala 40 tysiač dalaraŭ i kala 20 tysiač jeŭra.Dakładnaja suma hrošaj, jakimi zavałodali padazravanyja, budzie ŭstanoŭlena pa zakančeńni dakumientalnaj revizii adździaleńnia banka, pryznačanaj śledstvam.
U časie śledčych dziejańniaŭ i apieratyŭna-vyšukovych mierapryjemstvaŭ, padazravanyja vyjaŭleny. Dvaich zatrymali, miescaznachodžańnie treciaha vyśviatlajecca. Vykradzienyja hrošy i tabielnaja zbroja supracoŭnika milicyi kanfiskavanyja.
Arhanizataram złačynstva śledčyja ličać supracoŭnika Lubanskaha adździaleńnia departamienta achovy MUS siaržanta milicyi 1990 h.n., saŭdzielnikami — žycharoŭ Lubani 1991 hoda naradžeńnia.
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju15
Kamientary