Pradstaŭniki Ministerstva padatkaŭ i zboraŭ i drobnyja biznesoŭcy ź mienskaha rynku Ždanovičy zajaŭlajuć: kanflikt miž imi vyčarpany.
Nastroj handlaroŭ u mnohich rehijonach Biełarusi — inšy.
Jak paviedamiŭ kiraŭnik pradprymalnickaha abjadnańnia «Perspektyva» Anatol Šumčanka, siońnia kramy na trecim paviersie centru «Śviet mody» adnavili pracu. Tyja niekalki dziasiatkaŭ pradprymalnikaŭ, što pačulisia ŭ niebiaśpiecy paśla niadzielnaha incydentu, znoŭ handlujuć. Taki hałoŭny vynik učorašnich pieramoŭ pradprymalnikaŭ z pradstaŭnikami Ministerstva padatkaŭ i zboraŭ.
Spadar Šumčanka ŭdakładniaje:
«Nakładzieny maratoryjum na pravierki hetych pradprymalnikaŭ. Pytańni nakont tavarnych nakładnych buduć vyrašacca bližejšym časam. Jany jašče skazali: kali b vy siońnia da nas nie pryjšli, to choć my doŭha Ždanovič nie čapali, ale mieli vialikuju achvotu nakiravać tudy masavuju pravierku».
Pryčynaj incydentu stała sproba padatkavikoŭ apisać tavar adnoj z pradprymalnic, jakaja pracuje ŭ centry «Śviet mody». Jana nia mieła patrebnych dakumentaŭ na tavar, i jaje, da taho ž, padazrajuć u zanižeńni prybytku. Hety adzinkavy vypadak skałanuŭ inšych handlaroŭ, i jany vyjšli na stychijny mitynh. Adnak nasamreč heta nie było sprobaj uładaŭ zrabić zachady suprać pradprymalnikaŭ uvohule — tłumačyć daradca ministra padatkaŭ i zboraŭ Alaksandar Žyhulič:
«My zapytalisia ŭ ich kankretna pa hetaj sytuacyi: niaŭžo nia majecie takich dakumentaŭ? Jany adkazali: nu, što vy — hetyja dakumenty pavinny być, my ŭsie ich majem. Nu, tady jakaja prablema, čamu nie handlujecie? Dyj hodzie. Incydent vyčarpany».
Spravu pradprymalnicy budzie razhladać sud. Astatnim handlaram padatkavyja orhany paabiacali zładzić seminary. Takim čynam, havorki pra strajk na Ždanovičach niama — ćvierdzić Anatol Šumčanka:
«Heta byŭ vynik nervovaha zryvu pradprymalnikaŭ u šerahu tych padziejaŭ, jakija adbyvajucca ŭ krainie z kanfiskacyjaj tavaraŭ pavodle hihijeničnych sertyfikataŭ i ŭsiaho astatniaha. Ludzi, naturalna, pahladzieli, što sprabujuć kanfiskavać tavary, i hetaja pahroza moža pierakinucca na ich. Jany, naturalna, baranili svajo».
Miž tym, na 1 vieraśnia ŭ šerahu biełaruskich haradoŭ pryznačany strajk pradprymalnikaŭ suprać advolnych kanfiskacyjaŭ. Ideju akcyi pratestu padtrymlivajuć mnohija drobnyja biznesoŭcy sa Słucku, Śvietłahorsku, Salihorsku j Barysava.
Kamientary