Sfatahrafavaŭ milicyjantaŭ na skutary — trapiŭ u RUUS

Jak paviedamlaje ŭ svaim akaŭncie ŭ Facebook Cimoch Drančuk, jaho znajomaha Alaksieja Manieviča zatrymali milicyjanty za toje, što jon źniaŭ ich, kali jany patrulavali horad na skutarach.

«Jon ažyćciaviŭ ich fatahrafavańnie, paśla čaho jany vyrašyli jaho zatrymać. Na pytańnie ab padstavach zatrymańnia jany zamialisia, ale potym zaryjentavalisia i patłumačyli, što zatrymlivajuć za adsutnaść u jaho dakumientaŭ. I farmuloŭka mienavita takaja — nie dla vyśviatleńnia asoby, a prosta tamu što dakumientaŭ z saboj niama», — piša Cimoch Drančuk.

U samoha Manieviča pad fatazdymkam milicyjantaŭ na skutarach źmieščany podpis «Voś za hety zdymak mianie viaduć u Savieckaje RUUS».

Adnak u RUUS Savieckaha rajona Minska karespandentu «NN» paviedamili, što zatrymany ź imiom Alaksiej Manievič da ich nie pastupaŭ.

Jak rastłumačyŭ sam Manievič, da Savieckaha RUUS jon sapraŭdy nie dajšoŭ.

«Ja hulaŭ razam sa svaim dziciom na stadyjonie na vulicy Cnianskaj. Ubačyŭ milicyjanta na skutary, vielmi zacikaviŭsia i vyrašyŭ sfatahrafavać. Adnak jon prajechaŭ mima mianie, a potym viarnuŭsia razam ź jašče adnym milicyjantam-skutarystam, i ja sfatahrafavaŭ abodvuch. Heta im nie spadabałasia, jany padyšli da mianie.

Adzin ź ich skazaŭ: „A vy viedajecie, što nielha nas fatahrafavać?“ Ja paprasiŭ patłumačyć čamu. Uciamna rastłumačyć jany ničoha nie zmahli, ale adzin ź ich spasłaŭsia na toje, što ja parušaju Dekłaracyju pravoŭ čałavieka, jakaja, nibyta, zabaraniaje fatahrafavać milicyjantaŭ.

Ja zrazumieŭ, što tak prosta jany ad mianie nie adčepiacca, i patelefanavaŭ na numar 102. Nieŭzabavie prybyŭ jašče adzin supracoŭnik. Jon spytaŭ maje dakumienty, ale ja vyjšaŭ na prahułku, i, zrazumieła, u mianie ich nie było. Tady jon prapanavaŭ mnie prajścisia ŭ Savieckaje RUUS.

Tak my i pajšli ŭtroch: milicyjant, maja dačka i ja. Adnak pryviali mianie nie ŭ RUUS, a ŭ Hrupu kadraŭ Savieckaha RUUS na vulicy Jakuba Kołasa, 39. Maja dačka zastałasia čakać zvonku, a mianie zaviali ŭ kabiniet.

Tam mianie „prabili“ pa bazie i skazali, što nichto mianie nie zatrymlivaŭ. Adnak supracoŭnik u cyvilnym adznačyŭ, što mohuć zatrymać, kali jany atrymajuć niejki ordar. Taksama jon pałochaŭ mianie mahčymymi prablemami ŭ budučym, asabliva kali hetyja fotazdymki buduć apublikavanyja ŭ jakoj-niebudź sacyjalnaj sietcy», — raskazaŭ Manievič.

• 0
• 0
• 0
• 0
• 0
• 0
• 0
• 0