Andrej Sańnikaŭ: U «dyjałohu» dyktatara ź JeC zacikaŭlenaja Rasieja

Aŭstryjskaja Der Standard parazmaŭlała pra pravy čałavieka ŭ Biełarusi z Andrejem Sańnikavym, jaki ŭ 2010 hodzie vyłučaŭ svaju kandydaturu na pasadu prezidenta krainy, a z kastryčnika 2012 hoda žyvie ŭ Łondanie. Voś što skazaŭ biełaruski apazicyjanier.

«Tamu, chto choć adnojčy pabyvaŭ u biełaruskaj turmie, nikoli nie pazbavicca ad hetaha vopytu. Mianie vymusili pakinuć radzimu. I paviercie mnie, heta było nievierahodna składanaje dla mianie rašeńnie…»

«Vybary Łukašenka prajhraŭ… Mirnaja demanstracyja ŭviečary 19 śniežnia 2010 hoda ŭzmacniła strach dyktatara. U vypadku dalejšaj libieralizacyi jon ni za što nie zmoh by ŭtrymacca va ŭładzie. Voś jon i vybraŭ šlach represij».

«Užo 19 hadoŭ Łukašenka pakazvaje, što ni pra jakuju demakratyzacyju, ni pra jakuju libieralizacyju pry im i havorki być nie moža. U JeC dastatkova mahčymaściaŭ — na samych roznych uzroŭniach — paŭpłyvać na situacyju ŭ Biełarusi. Za toj čas, što Łukašenka znachodzicca va ŭładzie, JeC značna pašyryŭsia. Z 2004 hoda my znachodzimsia kala ŭschodniaj miažy JeC. Handal z tych časoŭ staŭ bolš ažyŭlenym, jeŭrapiejskich inviestycyj u Biełarusi stała bolš. Tak što nie treba mnie raspaviadać, što ŭ JeC niama instrumientaŭ», — zajaviŭ Sańnikaŭ.

«Łukašenka robić usio, kab jašče macniej pryviazać da siabie milicyju, śpiecsłužby i vojska… Paśla masavych aryštaŭ u śniežni 2010 hoda JeC uvioŭ sankcyi. Takoje stanovišča zachoŭvałasia da pačatku 2012 hoda. Zatym JeC namiaknuŭ, što ź jaho boku znoŭ jość zacikaŭlenaść u zbližeńni ź Biełaruśsiu. A Łukašenka ŭ toj čas nijakim čynam nie prajaviŭ hatoŭnaści da pazityŭnych sihnałaŭ. Situacyja z pravami čałavieka ŭsio paharšałasia i paharšałasia. I na hetym fonie JeC praciahvaje ruku dyktataru? I dzie ž tut, dazvolcie spytać, łohika?» — zapytvaje biełaruski apazicyjanier.

«Varta było b raspačać pazityŭnyja kroki, nakiravanyja niepasredna na naš narod. Ja horača padtrymlivaju palahčeńnie vizavaha režymu z boku JeC, pašyreńnie śpiektru mahčymaściaŭ dla maładych biełarusaŭ u sensie adukacyi i padarožžaŭ. Treba padtrymlivać svajakoŭ i siemji palitviaźniaŭ, jak i niezaležnyja ŚMI… Možna i dalej pravodzić palityku puhi i piernika, ale krychu pa-inšamu: puha — dla dyktatara, a dapamoha — biełaruskamu narodu, apazicyi, hramadzianskaj supolnaści i niezaležnaj presie».

«Pa-mojmu, Rasieja sama zacikaŭlenaja ŭ „dyjałohu“ pamiž JeC i dyktataram, kab nie prychodziłasia ŭ adzinočku nieści ŭskosnyja ekanamičnyja vydatki dyktatury. Tamu što Rasiei hetaja dyktatura taksama vielmi doraha abychodzicca», — ličyć Sańnikaŭ.

• 0
• 0
• 0
• 0
• 0
• 0
• 0
• 0