Ścienka na ścienku: u Breście armianie pabilisia ź biełarusami. Adzin biełarus patanuŭ

U subotu, 17 žniŭnia, troje bieraściejcaŭ kala kłuba «Sici» ŭciahnulisia ŭ patasoŭku z armianami: zastupilisia za chłopca. Razborki atrymalisia jak u 1990-ch.

— Niechta z armian siadzieŭ u mašynie z rasijskimi numarami, — Alaksandr viedaje padrabiaznaści ad znajomaha, udzielnika bojki — sami jany nie rašajucca razmaŭlać z žurnalistami. — Vidać, jany praz Brest jechali ŭ Jeŭropu albo nazad. Inšyja stajali kala kłuba. I hetaja hrupa haściej abraziła miascovaha chłopca. Patasoŭku raźniali achoŭniki kłuba i inšyja ludzi, što sabralisia. Mahčyma, na hetym by ŭsio i skončyłasia. Ale adnamu z chłopcaŭ patelefanavaŭ armianin z bresckaj dyjaspary. I prapanavaŭ razabracca na nastupny dzień na vyratavalnaj stancyi na rečcy Muchaviec.

U pryznačany čas bieraściuki (kala 15 čałaviek) ad 21 da 24 hadoŭ pryjšli, ale z saboj ničoha nie brali dla samaabarony. Praź niejki čas na stancyi pakazałasia čarada aŭtamabilaŭ. Mašyn było ŭdvaja bolš, čym samich chłopcaŭ. Ź ich vyjšła kala 60 armianaŭ. Razmovy nie atrymałasia. Udary pasypalisia z usich bakoŭ. Chłopcy kinulisia ŭrassypnuju. Jany śćviardžajuć, što ŭ śpinu im stralali ź pnieŭmatyki. Niechta skočyŭ u vadu ŭ adzieńni, niechta ŭ čarocie schavaŭsia. Niedaloka ad vyratavalnaj stancyi, mietraŭ za sto, jość astravok. Ženia taksama kinuŭsia ŭ vadu, chacia płavaŭ kiepska. I patanuŭ.

Alaksandr kaža, što ŭsio adbyvałasia na vačach u vyratavalnikaŭ, jakija dziažurać tam kruhłasutkava. Paźniej jany na łodcy padpłyli da vostrava, kab vyciahnuć chłopcaŭ. Vyratavalniki byli śviedkami i inšaj karciny: niedaloka stajała mašyna supracoŭnikaŭ PPS, ale jany nie ŭmiešvalisia.

— Kali pryjechali jašče dźvie milicejskija mašyny, armianie źbiehli. U časie pahoni adna z mašyn trapiła ŭ niesurjoznuju avaryju. Jaje pasažyraŭ i zatrymali — čatyry čałavieki. Unačy dastavili ŭ adździaleńnie Leninskaha RAUSa jašče kala 20 čałaviek.

Usie dumali, što Ženia napałochaŭsia i chavajecca. Na nastupny dzień vadałazy abšukali dno vakoł vostrava, ale nie znajšli. Armian vyzvalili za adsutnaściu składu złačynstva. Ranicaj 20 žniŭnia vadałazy z treciaha razu znajšli cieła Ženi. Pa vynikach ekśpiertyzy na jahonym ciele adsutničajuć ślady hvałtoŭnaj śmierci. Śmierć pa nieaściarožnaści — patanuŭ.

Chłopiec kaža, što nie viedaje, ci buduć bieraściejcy pisać zajavy ŭ milicyju. «Ale što ciapier tvorycca ŭ ich hałovach, nie viedaju. Ci nie spałochajucca, što im buduć pomścić, bo ŭsim viadomy mientalitet narodaŭ Kaŭkaza».

Jak stała viadoma «NN», fakt chulihanstva, za što mahli b zavieści kryminalnuju spravu, nie ŭstanoŭleny milicyjaj. Pnieŭmatyčnaj zbroi albo šarykaŭ ad jaje na miescy zdareńnia nie znajšli. Milicyjanty sumniavajucca i ŭ bojcy: maŭlaŭ, adny prystrašyli inšych, a tyja i raźbiehlisia.

Pra Ženiu viadoma, što jon byŭ fanatam bresckaha «Dynama». U fanackich kołach u jaho była mianuška Biersierk.

Aficyjna

«Śledčym kamitetam pravodzicca pravierka pa fakcie śmierci žychara Bresta, jaki 18 žniŭnia nie dapłyŭ da vostrava na r. Muchaviec. Papiarednie, pryčyna śmierci — patapleńnie. Cialesnych paškodžańniaŭ na ciele niama. Vidavočcy apytanyja. Materyjały pravierki kanfliktu na bierazie — u adździeła ŭnutranych spraŭ», — paviedamiła pradstaŭnik SK Julija Hančarova.

Va UUS Bresckaha abłvykankama adznačajuć, što «ludziej było ŭ piać razoŭ mienš, čym pišuć u internecie, i nie ŭsie ź ich jašče apytanyja, tamu dakładnyja ličby nazyvać niekarektna».

Taksama va UUS padkreślili, što nie varta havaryć ab prynaležnaści udzielnikaŭ načnoj sustrečy da jakojści dyjaspary. «Usie jany bieraściejcy, hramadzianie Respubliki Biełaruś», — akcentavali va UUS.

• 0
• 0
• 0
• 0
• 0
• 0
• 0
• 0