Na «Biełaruśfilmie» zdymuć kino pra Płošču — adkaz na «Žyvie Biełaruś»

Novy film naŭprost kuryrujecca Administracyjaj prezidenta i atrymaje adzin z samych vialikich biudžetaŭ u historyi ajčynnaha kiniematohrafa. A ŭ jakaści vykanaŭcy hałoŭnaj roli płanujuć pryciahnuć halivudskuju «zorku».

Pradziusier Siarhiej Ždanovič, viadomy jak pradziusar sieryjała PRAAN «Vyšej za nieba», i jaho kampanii byli abranyja Ministerstvam kultury Biełarusi i Administracyjaj prezidenta dla realizacyi prajekta «Płošča kachańnia» («Aviel»), jaki paklikany stać biełaruskim adkazam na polskuju palityčnuju dramu «Žyvie Biełaruś» režysiora Kšyštafa Łukaševiča pavodle scenara Franaka Viačorki.

Pra heta paviedamlaje dramaturh Andrej Kurejčyk.

U paniadziełak Siarhiej Ždanovič lacić u ZŠA na pieramovy ab mahčymym udziele ŭ zdymkach halivudskaj zorki klasy «A» dy inšych viadomych aktoraŭ. Zdymki pačnucca ŭ 2014 hodzie i adbuducca ŭ ZŠA, Hiermanii, Rasiei i Biełarusi. Biudžet składzie 2 młn dalaraŭ ZŠA.

Novy nacyjanalny kinaprajekt paklikany raspavieści historyju «płoščy» śniežnia 2010 hoda «abjektyŭna», heta značyć z pazicyi biełaruskaj dziaržavy, a taksama ŭ mastackaj formie raskryć «anatomiju biełaruskaha pratestu». Jon naŭprost kuryrujecca Administracyjaj prezidenta i atrymaje adzin z samych vialikich biudžetaŭ u historyi ajčynnaha kiniematohrafa (nahadajem, biudžet filma «Žyvie Biełaruś» skłaŭ 1,1 miljona jeŭra).

Scenar «Płoščy kachańnia» trymajecca ŭ sakrecie, ale viadoma, što zdymki zapłanavany na viasnu 2014 hoda. Dla pracy nad filmam płanujecca pryciahnuć biełaruskaha režysiora, a ŭ jakaści «mastackaha kiraŭnika» prajekta — viadomaha rasijskaha režysiora. Pierš za ŭsio nazyvajecca imia režysiora filma «Bresckaja krepaść» Alaksandra Kata, jakomu ŭžo zroblena adpaviednuju prapanovu. Adnak poŭny vytvorčy i tvorčy kantrol budzie ŭ Siarhieja Ždanoviča.

Viadoma, što pa siužecie adnym z hierojaŭ źjaŭlajecca amierykanski žurnalist, jaki traplaje ŭ Biełaruś u dramatyčny pieryjad śniežnia 2010 hoda i bačyć na svaje vočy «praŭdu». Dla hetaj roli pradziusier Ždanovič płanuje pryciahnuć halivudskuju «zorku». Film maje razburyć «stereatypy» mižnarodnaj hramadskaści pra biełaruskuju ŭładu i vybary 2010 hoda, pakazać, «jak usio było na samaj spravie», praz kranalnuju čałaviečuju historyju kachańnia. Jak i z «Žyvie Biełaruś», płanujecca samaja šyrokaja prysutnaść filma na mižnarodnych kinafiestyvalach. Adnak heta ŭsio ŭ žadańniach.

Takoha rodu «dvuboi» nie raz byli ŭ historyi. Naprykład, Rasieja i Hruzija abmianialisia filmami paśla vajny 2008 hoda. Tady ŭ hruzinskaj dramie prezidenta Saakašvili syhraŭ viadomy halivudski akcior Endzi Harsija, zatoje błokbastar Džanika Fajzijeva «Žnivień 2008» staŭ adnym z samych darahich u historyi rasijskaha kino.

Vybar realizataram nacyjanalnaha kinaprajekta nie dziaržaŭnaj kinastudyi «Biełaruśfilm», a biznesoŭca Siarhieja Ždanoviča nie vypadkovy, miarkuje Andrej Kurejčyk. Na jahonuju dumku, była vysoka aceniena jaho praca na sieryjale PRAAN «Vyšej za nieba». Mienavita jaho kampanija adkazvała za kančatkovy mantaž paśla adchileńnia ad pracy aŭtaraŭ Andreja Kurejčyka i Dźmitryja Marynina, u vyniku jakoha «krytyčny» pohlad na sacyjalnuju realnaść Respubliki Biełaruś byŭ zamienieny na całkam stanoŭčy vobraz. Paśla hetaha sieryjał atrymaŭ vysokija acenki Ministerstvaŭ kultury i achovie zdaroŭja, a taksama Administracyi prezidenta.

Samu ideju stvaryć ideałahična pravilny film pra Płošču Kurejčyk ličyć absalutnym idyjatyzmam. A Płošču — trahiedyjaj biełaruskaha naroda, jakuju nielha čapać brudnymi rukami. «Škada, što na heta pojduć miljony dalaraŭ biełaruskich padatkapłatnikaŭ. Takoha kštałtu filmy zaŭsiody asudžanyja. Mastackaja kaštoŭnaść u ich — nul, a ludzi, jakija ich robiać, potym nikoli nie admyjuć», — kaža Kurejčyk.

• 0
• 0
• 0
• 0
• 0
• 0
• 0
• 0