Łukašenka i Nazarbajeŭ mohuć vystupić suprać pašyreńnia Mytnaha sajuza
Takoje mierkavańnie vykazaŭ napiaredadni vizytu Alaksandra Łukašenki ŭ Kazachstan pradstaŭnik hetaj krainy ŭ Asacyjacyi pamiežnaha supracoŭnictva Marat Šybutaŭ.
Na jaho dumku Astana i Miensk mohuć vystupić adzinym frontam suprać pašyreńnia mytnaha sajuzu za košt Armenii i Kirhizstanu.
Jerevan pryniaŭ niadaŭna palityčnaje rašeńnie ab ustupleńni ŭ intehracyjnaje abjadnańnie. Biškiek, u svaju čarhu, raspracoŭvaje «darožnuju mapu» pa ŭstupleńni ŭ mytny sajuz i navat vystupaje ź inicyjatyvaj stvareńnia novych instytutaŭ u ramkach sajuzu.
Šybutaŭ upeŭnieny: «Biełaruś i Kazachstan pasprabujuć vypracavać sumiesny plan dziejańniaŭ pa hetym pytańni. Miarkuju, staŭleńnie da hetaha ŭstupleńnia budzie admoŭnym.
Našy krainy nie pavinny pakutavać z-za niezadavolenaha eha Uładzimiera Pucina i jaho ŭnutrypalityčnych prablem». Varta adznačyć, što aficyjny Miensk padzialaje nia ŭsie padychody Kazachstanu da Mytnaha sajuzu.
Na minułym tydni premjer Biełarusi Michaił Miaśnikovič padčas sustrečy kiraŭnikoŭ uradaŭ mytnaha sajuzu ŭ Astanie acaniŭ prapanovy Kazachstanu pa stvareńni Eŭrazijskaha sajuzu nastupnym čynam: «Siońnia prapanujecca razhledzieć prapanovu kazachstanskaha boku — toje, što tyčycca asabliva instytucyjnaj častki.
Prapanujecca novaja struktura sajuzu. Ščyra kažučy, dla nas, moža być, z-za niedachopu infarmacyi, nie zusim zrazumieła, navošta heta treba».
Pavodle dadzienych statystyki, handal Biełarusi najbolš siarod partneraŭ pa Mytnym sajuzie zaviazany na hety sajuz: letaś tracina biełaruskaha ekspartu prypadali na krainy sajuzu (Kazachstan i Rasieju), ŭ toj čas jak u Kazachstana hetaja dola składała 7%, u Rasiei – 8%.
Kamientary