U kiroŭcy aŭtobusa zabrali premiju za rasijski ściah u kabinie
A sam ściah prymusili prybrać. Kulturnicki aktyvist Aleś Mazanik dabiŭsia takoha rašeńnia ad dyrektara aŭtobusnaha parka №2 Ihara Žurka.
Ściah susiedniaj krainy kinuŭsia ŭ vočy Alesiu Mazaniku ŭ aŭtobusie staličnaha maršruta №50, kali jon sieŭ u jaho 4 vieraśnia na prypynku «Stancyja mietro «Spartyŭnaja».
Aleś Mazanik: «Mnie treba było prajechać usiaho adzin prypynak, tamu ja stajaŭ la dźviarej i hladzieŭ napierad, praz kabinu kiroŭcy. Spačatku ja nie zrazumieŭ, što nie tak, a paśla zaŭvažyŭ, što niepasredna pierad kiroŭcam znachodzicca, akramia dziaržaŭnaha ściaha Biełarusi, rasijski trykałor z hierbam!»
Pieršaje, što zrabiŭ Mazanik, — zanatavaŭ dziaržaŭny numar aŭtobusa AA 4159-7 dy imia kiroŭcy. A potym napisaŭ list u aŭtobusny park №2.
Nieŭzabavie pryjšoŭ adkaz. Dyrektar Ihar Žurok zaśviedčyŭ, što padčas pravierki «vyjaŭlena parušeńnie ekipiroŭki», i paviedamiŭ, što «kiroŭcu pamienšany pamier premijalnaj apłaty za vierasień 2013 hoda». Taksama ŭ adkazie značycca, što «parušeńnie likvidavanaje».
U razmovie ź Jeŭraradyjo Ihar Žurok zaznačyŭ, što «zaadno» sa škła aŭtobusa prybrali i dziaržaŭny biełaruski ściah.
Ihar Žurok: «Jamu prosta nie spadabałasia, što ŭ našaj mašynie visić rasijski ściah — razam ź biełaruskim. Heta zabaroniena praviłami, tamu my źniali abodva ściahi».
Dyrektar padkreślivaje, što źniali nie tamu, što heta toj ci inšy ściah, a tamu što praviłami zabaroniena źmiaščać na łabavym škle staronnija pradmiety ŭvohule.
Ihar Žurok: «Pa vialikim rachunku, na łabavym škle ŭvohule nielha ničoha raźmiaščać. Choć tablička ab prachodžańni techahladu viešajecca na łabavoje škło. I ciapier jašče dla apłaty daroh pryłady. Ale bolej ničoha nielha».
Kiroŭcu źniali častki premii za vierasień — pavodle słovaŭ dyrektara, heta «10 abo 15 pracentaŭ». A taksama ŭziali tłumačeńnie, čamu ściahi źjavilisia ŭ kabinie.
Ihar Žurok: «Kiroŭca ničoha ŭ hetym nie bačyć, što visić dva ściahi. Kaža: «My ž siabrujem z Rasijaj, čamu ja nie mahu paviesić?» Tym nie mienš praviłami zabaroniena — tamu my prymusili jaho źniać, kab nie było dalej kanfliktaŭ».
Nahadajem, što heta ŭžo nie pieršy vypadak, kali hramadzianie skardziacca na rasijskija ściahi ŭ hramadskim transparcie.
U traŭni 2013 hoda paśla skarhi žurnalista Kastusia Šytala hłybocki aŭtapark prymusiŭ kiroŭcu prybrać rasijski ściah z kabiny rejsavaha aŭtobusa «Hłybokaje-Miory».
Što praŭda, tady pra pazbaŭleńnie kiroŭcu premii ničoha skazana nie było.
Kamientary