Biełaruś budzie na Vilenskim samicie, navat kali nie vyzvalić palitviaźniaŭ
Takuju zajavu zrabili dla žurnalistaŭ hienieralny dyrektar palityčnaha departamienta MZS Šviecyi Turbjorn Sulstrem i palityčny dyrektar MZS Polščy Jarasłaŭ Bratkievič.
U składzie delehacyi polskich i šviedskich dypłamataŭ jany znachodziacca ź vizitam u Biełarusi napiaredadni Vilenskaha samitau «Uschodniaha partniorstva», jaki adbudziecca ŭ listapadzie.
Sulstrem i Bratkievič paviedamili, što asnoŭnaja pieraškoda dla paŭnavartasnaha ŭdziełu Biełarusi ŭ prahramie «Uschodniaje partnerstva» — najaŭnaść u krainie palitviaźniaŭ.
«My ćviorda skazali našym surazmoŭcam u MZS i Administracyi prezidenta, što para ŭžo źniščyć hetyja pieraškody», — paviedamiŭ Sulstrem.
Adnak dakładnaha adkazu na pytańnie, kali i pry jakich umovach vyzvalać palitviaźniaŭ, dypłamaty nie atrymali. «Nam skazali, što praca viadziecca», — skazaŭ Bratkievič.
«Z boku Biełarusi było b vielmi važnym krokam, kali b da Vilenskaha samita palitviaźni byli vyzvalenyja. Adnak navat kali hetaha nie adbudździecca, Biełaruś budzie ŭdzielničać u samicie», — vykazaŭsia Sulstrem.
«My siudy pryjechali nie bicca. My nie budziem dziejničać ultymatyŭnym paradkam, nam patrebny dyjałoh», — dadaŭ Bratkievič.
Dypłamaty paviedamili, što ŭśviedamlajuć cisk, jaki akazvaje Rasija na inšyja krainy — udzielnicy «Uschodniaha partniorstva». U jakaści prykładu Sulstrem pryvioŭ situacyju z zabaronaj na ekspart małdaŭskich vinaŭ u Rasiju.
«My niejkim čynam dapamahli Małdovie, pavialičyli ŭvoz małdaŭskich vinaŭ u ES. Ale Małdova budzie na samicie parafiravać pahadnieńnie ab zonie volnaha handlu z EZ. «Biełaruś nijakich padobnych pahadnieńniaŭ parafiravać nie źbirajecca, — skazaŭ Sulstrem. — Tamu kazać pra niejkija padobnyja kroki z boku ES nie vypadaje».
Pryčyna, na dumku šviedskaha dypłamata, u tym, što Biełaruś abrała ŭvachodžańnie ŭ Mytny źviaz. «I my pavažajem vaš vybar», — dadaŭ dypłamat.
Padčas Vilenskaha samitu nie zapłanavana padpisańnia nijakich pahadnieńniaŭ ź Biełaruśsiu. «My spadziajomsia, što buduć zruchi pavodle inšaj prahramy — «Dyjałohu pa madernizacyi», — kaža Bratkievič. — Aproč taho, padčas samitu budziem forum biznesu, i tam, spadziajusia, dla Biełarusi adkryjucca niekatoryja mahčymaści».
Zahinuŭ biełaruski dobraachvotnik Vasil «Dzir» Rapicki11
Kamientary