Staŭka refinansavańnia na 1 studzienia 2015 moža skłaści 19-21%

Staŭka refinansavańnia na 1 studzienia 2015 hoda moža skłaści 19-21%. Pavodle infarmacyi BiełaPAN, takaja acenka ŭtrymlivajecca ŭ prajekcie prahnozu sacyjalna-ekanamičnaha raźvićcia, jaki padrychtavali ekanamičnyja viedamstvy.

Zhodna z prajektam prahnozu, miarkujecca, što pryrost patrabavańniaŭ bankaŭ da ekanomiki ŭ nastupnym hodzie składzie 16-19%, pryrost resursnaj bazy bankaŭ — 13-15%.

Miarkujecca, što na 20 trłn. rubloŭ resursnaja baza bankaŭ u nastupnym hodzie pryraście za košt srodkaŭ nasielnictva, na 12 trłn. rubloŭ — za košt srodkaŭ jurydyčnych asob.

Taksama čakajecca, što staŭka refinansavańnia, jakaja ciapier znachodzicca na ŭzroŭni 23,5% hadavych, na 1 studzienia 2015 hoda budzie znachodzicca ŭ dyjapazonie 19-21%.

Miž tym premjer-ministr Michaił Miaśnikovič padčas pasiadžeńnia prezidyuma Saŭmina 22 kastryčnika, na jakim razhladalisia prahnoznyja dakumienty na nastupny hod, zajaviŭ ab nieabchodnym «rezkim źnižeńni» staŭki refinansavańnia ŭ 2014 hodzie.

Nahadajem, Nacyjanalny bank apošni raz sioleta źnižaŭ staŭku refinansavańnia ŭ červieni. U lipieni, kali staŭ naziracca adtok rublovych układaŭ nasielnictva i rost popytu na valutu, centralny bank Biełarusi spyniŭ źnižać staŭku refinansavańnia i zachoŭvaje jaje na niaźmiennym uzroŭni (23,5% hadavych) da hetaha času.

U toj ža čas ekśpierty kanstatujuć, što staŭka refinansavańnia siońnia nie adlustroŭvaje realny košt hrošaj u ekanomicy. «Ciapier staŭka refinansavańnia składaje 23,5% hadavych, a siaredniaja staŭka pa adnadzionnych mižbankaŭskich kredytach 44,9%. Takim čynam, roźnica pamiž nazvanymi staŭkami — 21,4%», — havoryć finansavy analityk Daśledčaj hrupa BusinessForecast.by Alaksandr Mucha.

Jon adznačyŭ, što vysokija staŭki na hrašovym rynku sfarmiravalisia z pryčyny deficytu rublovaj likvidnaści, jaki zachoŭvajecca ź leta hetaha hoda.

«Adtok rublovych układaŭ nasielnictva, jaki byŭ zafiksavany letam, vymusiŭ Nacyjanalny bank uzmacnić žorstkaść hrašova-kredytnaj palityki i pavysić staŭki pa apieracyjach padtrymańnia rublovaj likvidnaści bankaŭ», — nahadvaje Mucha.

Na dumku ekśpierta, Nacbank u najaŭnych umovach nie moža źmiakčyć hrašova-kredytnuju palityku, bo źnižeńnie pracentnych stavak moža pryvieści da adtoku rublovych układaŭ z bankaŭ i pavyšeńnia popytu na valutu z boku nasielnictva.

Biazbolna źnizić pracentnyja staŭki na hrašovym rynku možna budzie, kali pamienšycca stupień devalvacyjnych čakańniaŭ, miarkuje ekanamist.

«Asnoŭnaja ŭmova — źnižeńnie devalvacyjnych čakańniaŭ, tady mohuć źnižacca i pracentnyja staŭki na hrašovym rynku», — reziumavaŭ Alaksandr Mucha.

Jak paviedamlałasia raniej, u vieraśni i ŭ kastryčniku, pavodle źviestak Nacbanka, na fonie vysokich pracentnych stavak u bankaŭskaj sistemie nie nazirałasia prytoku rublovych układaŭ, što, na dumku ekśpiertaŭ, śviedčyć ab najaŭnaści devalvacyjnych čakańniaŭ u hramadstvie.

• 0
• 0
• 0
• 0
• 0
• 0
• 0
• 0