Ci vykinie Administracyja bieły ściah?
Kali ŭjavić, što naviersie vyrašyli dać "Eŭrapiejskamu maršu" zialonuju vulicu, to, miakka kažučy, nielahična psavać Ivaškieviču dzień narodzinaŭ:) Piša ŭ svaim błohu Alaksandar Kłaskoŭski.
"Biełaruskija naviny" paviedamlajuć, što ŭłady mohuć dazvolić "Eŭrapiejski marš". Maŭlaŭ, jość vyciečka infarmacyi "adtul".
Ale reč u tym, što i apošniaje šeście na Dzień Voli taksama było dazvolenaje. Tolki pad uražańniem tuzaniny ź milicyjaj mnohija na heny dazvoł zabylisia. Zahvazdka ž u tym, što maršrut byŭ prapanavany ad Akademii navuk na Banhałor. I raśsiakali kalony, adciskali ludziej ad centru mienavita praz toje, što jany mknulisia na sakralnuju płošču Kalinoŭskaha.
Skamiečany dazvoł u farmacie kštałtu "Akademija — Banhałor", kaniešnie, mohuć dać i zaraz. Chto ž suprać Eŭropy? A voś puścić apazycyju na symbaličny placdarm za dźvieście metraŭ ad Administracyi, — heta dla viarchoŭ vyhladaje amal što kapitulacyjaj. Małaimavierna, što najvyšejšaje kiraŭnictva hatovaje vykinuć bieły ściah.
Dyj pad čyrvona-zialonymi štandarami naŭrad ci pašluć beeresemaŭcaŭ dadać aficyjoznaha kalarytu šeraham manifestantaŭ. Tut sprava pryncypu. Ułada nia choča dzialić z palityčnymi apanentami nivodzin palityčny vektar, nivodzin lozunh. Zhadajma, jak adcierli starych baraćbitoŭ ad lozunhu niezaležnaści. Tak i tut: u pryncypie čamu b dziaržaŭnym mužam i nia ŭźbicca na niejki kanstruktyŭ u dačynieńniach z Eŭropaj, čamu b i nia vyleźci z tych čornych śpisaŭ? Što jany, horšyja za Kadafi? Ale ŭjavić sabie pry hetym pasiarednictva Labiedźki ź Milinkievičam — jak nož vostry.
Apazycyja dziejničaje zaraz dastatkova piśmienna, jana prapanuje rečy, de-fakta vyhadnyja i ŭładzie. Ale apanenty režymu abjektyŭna nia ŭ toj vahavaj katehoryi, kab jahonaje kiraŭnictva brała ich u hulniu.
Kali ŭjavić, što naviersie vyrašyli nastupić na horła ŭłasnaj pieśni i dać "Eŭrapiejskamu maršu" zialonuju vulicu, to, miakka kažučy, nielahična chapać moładź z ahitacyjnaj pradukcyjaj dy psavać Viktaru Ivaškieviču dzień narodzinaŭ:) Versyja pra baraćbu niejkich praeŭrapiejcaŭ i prarasiejcaŭ u najvyšejšym ešalonie, u vyniku čaho, maŭlaŭ, i adbyłosia dzivosnaje časovaje vyzvaleńnie Ivaškieviča z-pad sudu, padajecca zanadta pryhožaj. Chiba što adbyvajecca peŭnaja karekcyja zališniaj tupaści…
Voś, darečy, cikavaja havorka pra trochkutnik "ułada — apazycyja — Eŭropa" ŭ apošnim "Praskim akcencie". Trapna vykazaŭsia palitolah Dzianis Mieljancoŭ: pamiž Eŭraźviazam i Biełaruśsiu (majecca na ŭvazie Biełaruś čyrvona-zialonaja) niama kanfliktu intaresaŭ, ale jość kanflikt kaštoŭnaściaŭ.
I heta, na žal, nadoŭha.
ZY. Toj vypadak, kali aŭtar budzie rady pamylicca z prahnozam.
Kamientary