Dziažurnaje źviano rasijskich Su-27 pryziamliłasia na aeradromie ŭ Baranavičach
Pavodle źviestak BiełaPAN, dziažurnaje źviano z čatyroch rasijskich źniščalnikaŭ Su-27 pryziamliłasia 8 śniežnia na aeradromie 61-j źniščalnaj avijabazy ŭ Baranavičach. Razam ź imi ŭ Baranavičy z Rasii pierabaziravaŭsia i techničny piersanał.
U Minabarony pakul nie kamientujuć prybyćcio rasijskich źniščalnikaŭ.
Nahadajem, 23 krasavika hetaha hoda ministr abarony Rasii Siarhiej Šajhu, jaki znachodziŭsia ź vizitam u Minsku, paviedamiŭ ab płanach Rasii raźmiaścić na terytoryi Biełarusi k 2015 hodu źniščalny avijapołk. Tady jon zajaviŭ, što ŭžo sioleta ŭ Biełarusi płanujecca stvaryć avijacyjnuju kamiendaturu i pastavić pieršaje dziažurnaje źviano źniščalnikaŭ.
26 červienia hałoŭnakamandujučy VPS RF hienierał-lejtenant Viktar Bondaraŭ paviedamiŭ, što rasijskaja avijabaza budzie dysłacyravacca ŭ Lidzie (Hrodzienskaja vobłaść) i pačnie funkcyjanavać užo ŭ 2013 hodzie. Na joj buduć raźmieščany madyfikavanyja źniščalniki Su-27SM3.
Zatym źjaviłasia infarmacyja ab raźmiaščeńni jak minimum dziažurnych źniščalnikaŭ u Baranavičach.
«Stvareńnie rasijskaj avijabazy ŭ Biełarusi — heta vynik vykanańnia mižuradavaha pahadnieńnia pa ŭmacavańni vajennaha składalnika Sajuznaj dziaržavy. Jak udzielnica Sajuznaj dziaržavy, Rasija abaviazana sfarmiravać i mieć tam svaju avijabazu», — zajaviŭ Bondaraŭ. Jon taksama paviedamiŭ, što na pieršapačatkovym etapie baza budzie rasijskaj, potym — budzie bačna. Dobraŭparadkuje bazu biełaruski bok, Rasija budzie ŭ hetym dapamahać. «Avijabaza stanie važnym elemientam pieršaha stratehičnaha ešałona abarony Sajuznaj dziaržavy i zabiaśpiečyć prykryćcio pavietranaj prastory Biełarusi», — padkreśliŭ Bondaraŭ.
Na naradzie pa pytańniach budaŭnictva i raźvićcia Uzbrojenych sił Biełarusi 20 žniŭnia Alaksandr Łukašenka daručyŭ raspačać praktyčnuju realizacyju damoŭlenaściaŭ z Rasijaj pa avijacyi i SPA. «Ministerstvu abarony staŭlu zadaču pačać praktyčnuju realizacyju dasiahnutych z Rasijskaj Fiederacyjaj damoŭlenaściaŭ pa avijacyi i sistemach procipavietranaj abarony», — skazaŭ kiraŭnik biełaruskaj dziaržavy.
29 kastryčnika ŭ Maskvie kiraŭnik Minabarony RF Siarhiej Šajhu paviedamiŭ, što padrychtoŭka pahadnieńnia ab raźmiaščeńni na terytoryi Biełarusi rasijskaj avijacyjnaj bazy zaviaršajecca. «Baki zaviaršajuć padrychtoŭku miždziaržaŭnaha pahadnieńnia ab raźmiaščeńni rasijskaj avijacyjnaj bazy na terytoryi Biełarusi, — skazaŭ jon. — My razhledzieli vyniki pracy rabočaj hrupy vajenna-pavietranych sił Biełarusi i Rasii pa vyznačeńni aeradroma dla hetaj bazy».
Pieršapačatkova, pavodle słoŭ Šajhu, u Biełarusi płanujecca raźmiaścić dziažurnaje źviano źniščalnaj avijacyi Rasii. «My pačali praktyčnuju prapracoŭku pytańnia raźmiaščeńnia na terytoryi Respubliki Biełaruś dziažurnaha źviana źniščalnaj avijacyi Rasii, — skazaŭ ministr. — Raspracoŭvajecca nieabchodnaja dakumientacyja».
Varta adznačyć, što płany pa raźmiaščeńni rasijskaj avijabazy ŭ Biełarusi vyklikali niehatyŭny rezanans siarod apazicyi i častki biełaruskaha hramadstva.
Kamientary