Vaskrasienski: Azotnyja ŭhnajeńni i sankcyi ŭ adnosinach fiz– i jurasobaŭ — i 1135 palitviaźniaŭ buduć u Vilni
U razmovie ź Leanidam Sudalenkam Vaskrasienki nazvaŭ tuju ŭmovu, nibyta tolki pry vykanańni jakoj Łukašenka hatovy budzie vypuścić usich palitviaźniaŭ. Papiaredni raz jon patrabavaŭ adkryć pavietranuju prastoru ŭ abmien na Bialackaha, ale Aleś na svabodzie i biez hetaj sastupki. A jašče raniej jon uvohule ŭpeŭniena praročyŭ, što Bialacki, Babaryka, Znak, Kaleśnikava i inšyja vyjduć na svabodu apošnimi — i nijak inačaj.
Vaskrasienski vykazaŭ zadavalnieńnie, što nibyta «ŭsie tyja recepty, na jakija ja namiakaŭ, byli vykarystanyja amierykanskim bokam, i jany prynieśli vynik». A ciapier, «značyć, treba ruchacca, kab byli vyniki pa inšych niebarakach».
Hłabalna, maŭlaŭ, papravić ničoha nielha, «pakul idzie vajna», ale «davajcie zaraz zojmiemsia vyzvaleńniem vašych pabracimaŭ, jakija i tak z-za vas kolki hadoŭ siadziać, z-za vašaj absalutna durnoj pazicyi».
Paśla taho jon prapanavaŭ
«varyjant, źviazany ŭžo z prapracoŭkaj kiejsa z azotnymi mienavita ŭhnajeńniami. Chaj heta budzie amierykanski trejdar, jaki hetym durniam-jeŭrapiejcam u try razy daražej pradaje».
Druhim ža momantam nazvaŭ «źniaćcie sankcyj ź jurydyčnych i fizičnych asob».
Paśla taho ž jon paabiacaŭ, što «moža, my tady chutčej da hetaha druhoha etapu, bolš hłabalnaha, piarojdziem». Bo, maŭlaŭ, «stratehija ŭzajemadziejańnia — jana lepšaja, čym stratehija izalacyjanizmu i eskałacyi. Kab uzajemadziejničać, treba mieć znosiny».
Takim čynam, jak padsumoŭvaje Juryj Vaskrasienski:
«Azotnaje ŭhnajeńnie i sankcyi ŭ dačynieńni da fizikaŭ i jurykaŭ. I hetyja 1135 buduć u vas u Vilni».
Čaho vartyja hetaja razvažańni prapahandysta bieź nijakaha realnaha ŭpłyvu na pryniaćcie choć by jakich rašeńniaŭ, možna mierkavać z taho, nakolki spraŭdzilisia prahnozy Vaskrasienskaha, vykazanyja im padčas papiarednich razmoŭ z Sudalenkam. Tak, 8 lipienia 2025 hoda jon kazaŭ siarod inšaha:
«Dajcie plušku. Adkryjcie nieba dla biełarusaŭ. Dajcie dazvoł na pravoz kaliju. […] Adkryvajecca nieba — i Aleś Bialacki adrazu vychodzić».
Jak viadoma, nieba dahetul nie adkrytaje, i pytańnie pravozu kaliju praz terytoryju Litvy ci Łatvii taksama pakul nie vyrašana. Ale Aleś Bialacki i šerah inšych klučavych palitviaźniaŭ z 13 śniežnia na voli.
Niahledziačy na toje, što jašče raniej, 2 kastryčnika 2024 hoda, Vaskrasienski ŭpeŭniena praročyŭ zusim inšaje:
«Hladzicie, Bialacki i ŭsie astatnija takoha ž kalibru — Babaryka, Znak, Kaleśnikava… Zrazumieła, što tut fihura Bialackaha samaja mahutnaja. Ale dla biełaruskaj ułady ludzi takoha kalibru pojduć u apošniaj čarzie, u samaj apošniaj».
Kamientary
Taksama źviarnicie ŭvahu na takoje voś: «Dajcie plušku. Adkryjcie nieba dla biełarusaŭ». To bok, intaresy łukašystaŭ (kab źniali sankcyi ź Biełavii i možna było kantrabasam dapamahać zapčastkami maskavitam) manipulacyjna vydajucca za nibyta intaresy biełaruskaha narodu. Vam heta nijakija lapidarna hienijalnyja zajavy nie nahadvaje? Hy-hy.