Bolš za 26 000 čałaviek padpisalisia suprać uviadzieńnia dziaržmytaŭ na aŭto
U internecie nabiraje abaroty zbor podpisaŭ suprać uviadzieńnia ŭ Biełarusi dziaržpošliny za vydaču dazvołu na dopusk transpartnaha srodku da ŭdziełu ŭ darožnym ruchu.
Pošlina ŭstanaŭlivajecca prajektam zakona, jaki razhladajecca ciapier u parłamiencie. Miarkujecca, što jana budzie spahaniacca ŭžo z 1 studzienia 2014 hoda adnačasova z prachodžańniem techahladu.
Na placoŭcy www.change.org, pavodle źviestak na 15 śniežnia, suprać uviadzieńnia dziaržpošliny vykazałasia ŭžo bolš jak 26800 čałaviek. Podpisy staviacca pad listom ministru finansaŭ Andreju Charkaŭcu.
U pasłańni havorycca: «U suviazi z tym, što ŭ akcyz koštu paliva ŭžo zakładziena suma adličeńniaŭ na ramont daroh, ličym uviadzieńnie novaj pošliny niemetazhodnym.
Hety zakonaprajekt nie ŭličvaje toj fakt, što niekatoryja aŭtamabilisty vykarystoŭvajuć transpart u redkich, vyklučnych vypadkach, uraŭnoŭvajučy ich z tymi, chto vykarystoŭvaje aŭtatranspart pastajanna, a taksama ŭ kamiercyjnych metach.
Taksama hety zakonaprajekt nie ŭličvaje toj fakt, što pry kupli aŭtatranspartu, pry prachodžańni TA, pryjdziecca znoŭ płacić pošlinu, niahledziačy na toje, što papiaredni ŭładalnik jaje ŭžo vypłaciŭ».
Nahadajem, dziaržaŭnaja pošlina za vydaču dazvołu na dopusk transpartnaha srodku da ŭdziełu ŭ darožnym ruchu dla bolšaści biełarusaŭ moža skłaści ad 3 da 10 bazavych vieličyń (adna bazavaja vieličynia ciapier składaje 130 tys. rubloŭ).
Pamier dziaržpošliny budzie zaležać ad dazvolenaj maksimalnaj masy transpartnaha srodku, a taksama ad taho, chto źjaŭlajecca ŭładalnikam.
Naprykład, dziaržpošlina dla fizičnych asob za lehkavy aŭtamabil masaj nie bolš jak 1 t składzie try bazavyja vieličyni (ciapier heta 390 tys. rubloŭ), bolš za 1 t da 2 t — piać bazavych vieličyń (650 tys.), bolš za 2 t da 3 t — siem bazavych vieličyń (910 tys.), aŭtamabil bolš jak 3 t — 10 bazavych vieličyń (1,3 młn.), pryčep da lehkavoha aŭtamabila — adnu bazavuju vieličyniu.
* * *
Adznačym, što anłajn-pietycyi padobnaha vyhladu ni da čaho nie abaviazvajuć ułady. Zakanadaŭstva Biełarusi praduhledžvajuć kalektyŭnyja zvaroty hramadzianaŭ, na jakija čynoŭniki abaviazanyja davać adkaz. A kali sabrana bolš za 30 podpisaŭ, hramadzianie majuć prava zapatrabavać sustrečy z adpaviednym čynoŭnikam.
Kamientary