Mužčynu abvinavačvajuć, što jon sihnaliŭ na «Stop-padatku»: «Ale 20 śniežnia ja na svajoj mašynie byŭ u Polščy!»

— Dniami patelefanavali z DAI, pacikavilisia, ci naš aŭtamabil Volvo CHS90, dziaržnumar XXXX-XX7. Tak, naš, naležyć žoncy. Inśpiektary skazali, što pravodzicca «Pierachop» pa takim Volvo, ci nie mahli b my, maŭlaŭ, spuścicca, treba źvieryć numar kuzava, — prosta ciapier. Ja padumaŭ, mała što, źbili kaho-niebudź na Volvo i schavalisia, albo skrali taki aŭtamabil — viadoma, spuściŭsia ŭ dvor. Było dzieści 21.00, na vulicy ciemra, jašče padumaŭ, jakaja źvierka ŭ ciemry… Vyjšaŭ, pad padjezdam mašyna DAI, — i tut pačynajecca niedarečnaść, — kaža Maksim.

Pavodle jaho słovaŭ, inśpiektar paprasiŭ pakazać dakumient, jaki śviedčyć asobu. I paviedamiŭ: «Vaš aŭtamabil 20 śniežnia byŭ zaŭvažany na praśpiekcie Niezaležnaści, 25 u 18.05. Jaho kiroŭca parušaŭ p.172 PDR (prymianieńnie hukavoha sihnału)».

— Jon pakazaŭ rapart, składzieny inśpiektaram DPS Ł. śpiecpadraździaleńnia pa zabieśpiačeńni darožnaj biaśpieki DAI horada, u jakim toj śviedčyć, što bačyŭ našu mašynu, jakaja nibyta sihnaliła. Ale my ŭ hety dzień byli ŭ Polščy — siamjoj, na hetaj mašynie, i ŭ pašparcie jeść adznaki ab pierasiačeńni miažy — hladzieć nichto nie staŭ! Ja jamu kažu: «A chiba možna vinavacić i davać štraf, hruntujučysia na pakazańniach tolki inśpiektara? Dzie choć adzin śviedka?» Supracoŭnik DAI adkazaŭ, što heta «vyrašyć načalnik, a śviedki jość», — raskazvaje Maksim.

Inśpiektar pačaŭ składać pratakoł apytańnia. Maksim admoviŭsia jaho padpisvać i vyjšaŭ z mašyny, prapanavaŭšy na raźvitańnie vyklikać jaho aficyjna, «tamu što dalej marnavać čas na hetaje tryźnieńnie nie źbiraŭsia».

26 śniežnia karystalnik napisaŭ i zarehistravaŭ u DAI skarhu na dziejańni inśpiektara Ł., paličyŭšy ich «paklopam — raspaŭsiudam zaviedama iłžyvych źviestak, što hańbiać inšuju asobu», i paprasiŭ kiraŭnictva DAI horada pryciahnuć supracoŭnika da administracyjnaj adkaznaści za paklop, abviaścić jamu vymovu z zaniasieńniem u asabistuju spravu, a taksama zapatrabavaŭ «piśmovych prabačeńniaŭ».

— Na momant prydumanaha inśpiektaram pravaparušeńnia i aŭtamabil, i ludzi, jakija mahli im kiravać, znachodzilisia pa-za miežami Respubliki Biełaruś. Ja chacieŭ zrabić zapyt u Dziaržpamiežkamitet, ale nie mahu, tamu što takija źviestki tam dajuć tolki arhanizacyjam, u mianie jeść zapis videarehistratara, dzie adlustroŭvajucca čas, data i kadry i karcinka z pahranpierachodu, dakumienty z adznakaj ab pierasiačeńni miažy. Ale čamu heta ŭsio pavinien dakazvać ja, a nie ludzi, jakija mianie vinavaciać niemaviedama ŭ čym? Nie chaču stanavicca ŭdzielnikam hetaha razvodu, — kaža Maksim.

U najbližejšy čas u karystalnika źjavicca mahčymaść asabista rastłumačyć svaju pazicyju pradstaŭnikam DAI horada — 27 śniežnia jamu pryjšła pozva z patrabavańniem źjavicca na administracyjnuju kamisiju ŭ DAI.

Historyju karystalnika prakamientavali ŭ DAI Minska:

— Administracyjny praces pačynajecca z momantu składańnia pracesualnaha dakumienta — u dadzienym vypadku pratakołu apytańnia. Ale heta nie značyć, što kiroŭcu abo ŭładalnika aŭtamabila ŭ čymści abvinavačvajuć. Pa dadzienym fakcie — jak i mnohich inšych — pravodzicca pravierka. Arhumienty ŭsich bakoŭ buduć razhledžanyja, im budzie dadzienaja pravavaja acenka. Skarha budzie razhledžanaja ŭ vyznačany zakanadaŭstvam termin.

• 0
• 0
• 0
• 0
• 0
• 0
• 0
• 0