Śledam za padatkam na aŭto mohuć uvieści padatak na impartnyja tavary

Adpaviednaja prapanova ŭžo pastupiła ŭ Saviet Ministraŭ ad staršyni pastajannaj kamisii pa ekanamičnaj palitycy Pałaty pradstaŭnikoŭ Nacyjanalnaha schodu Biełarusi Viktara Valušyckaha.

Uličvajučy toj fakt, što prapanova pa vyrašeńni prablem ŽKH prahučała va ŭnison z prezidenckim patrabavańniem ab naviadzieńni paradku ŭ kamunalnaj haspadarcy, sama saboj naprošvajecca vysnova ab uzhadnieńni dziejańniaŭ roznych halin ułady.

Akramia taho, absalutnaja bolšaść tak zvanych inicyjatyŭ narodnych abrańnikaŭ Biełarusi, jak praviła, hienierujecca zusim u inšych strukturach.

I heta ahulnaviadomy fakt. Mienavita tamu biełaruski biznes užo pačaŭ bić tryvohu adnosna inicyjatyvy ab źjaŭleńni novaha padatku.

Viktar Valušycki vystupiŭ z aficyjnaj prapanovaj ab uviadzieńni miascovaha padatku z prodažaŭ na ŭvieś impart, jaki realizujecca ŭ Biełarusi. Jak vynikaje z dakumienta, nakiravanaha ŭ Saviet ministraŭ, biełaruskija deputaty kirujucca vyklučna vysakarodnymi metami: źnižeńnie sabiekoštu tavarnaj pradukcyi, što vyrablajecca biełaruskimi pradpryjemstvami, i, adpaviedna, pavieličeńnie kankurentazdolnaści tavaraŭ made in Belarus, a taksama nieabchodnaść pastupovaha sychodu ad pierakryžavanaha subsidyjavańnia ŽKH. U suviazi z hetym deputat prapanuje abmierkavać «mahčymaść ŭviadzieńnia miascovaha padatku z prodažaŭ na tavary pachodžańnia pa-za krainami Mytnaha sajuza».

Pra sumu novaha padatku ŭ prapanovie nie havorycca, ale navat kali ličyć pa minimumie, vynik uražvaje.

Pavodle dadzienych Nacyjanalnaha statystyčnaha kamiteta, impart tavaraŭ u Biełaruś pa-za Mytnym sajuzam składaje bolš za 18 miljardaŭ dalaraŭ u hod. Kali spahaniać ź jaho navat minimalny padatak u 5%, vychodzić 900 miljonaŭ dalaraŭ u hod. I naŭrad ci havorka idzie ab takim minimalnym padatku, bo ź jaho dapamohaj Viktar Valušycki prapanuje nie tolki vyrašyć pytańnie datacyj ŽKH, ale i zrabić pradukcyju biełaruskich pradpryjemstvaŭ bolš kankurentazdolnaj pierad impartnaj, a tut 5% sapraŭdy nie abyścisia.

Prava ŭviadzieńnia padatku i vyznačeńnia jaho vieličyni prapanujecca dać miascovym uładam, jakija buduć vyznačać i toje, jak lepš vykarystoŭvać atrymanyja srodki ŭ adpaviednaści z zajaŭlenymi metami.

Pastajannaja kamisija pa ekanamičnaj palitycy PP NS RB u asobie Viktara Valušyckaha prapanuje atrymanyja ad novaha padatku srodki nakiravać na pakryćcio datacyj ŽKH kankretnaha rehijona, jaki atrymaje vypłaty. «Takim čynam, hetyja srodki mohuć stać krynicaj dla źniaćcia nahruzki pierakryžavanaha subsidyjavańnia z pramysłovych pradpryjemstvaŭ na roźničnyja prodažy pradukcyi trecich krain», — reziumuje deputat.

Płacielščykami padatku Valušycki bačyć subjekty roźničnaha handlu, u tym liku indyvidualnych pradprymalnikaŭ.

Uviadzieńnie padatku, na dumku staršyni kamisii, dazvolić skaracić deficyt rachunku płaciežnaha bałansu z pryčyny pavieličeńnia kankurentazdolnaści tavaraŭ biełaruskaj vytvorčaści ŭ paraŭnańni ź impartnymi. Nahruzka na biudžet pa datacyjach na ŽKH taksama pavinnaja źnizicca, jak i nahruzka na pramysłovyja pradpryjemstvy pierakryžavanaha subsidyjavańnia ŽKH. Za košt hetaha abjomy pramysłovaj vytvorčaści tavaraŭ u našaj krainie stanuć bolšyja.

Z ulikam źnižeńnia sabiekoštu hetych tavaraŭ dola ich realizacyi, na dumku deputata, pavinnaja pavialičycca ŭ ahulnym abjomie roźničnaha handlu, a ŭsie biełaruskija tavary, jakija pakul ihnarujuć pakupniki, zmohuć paśpiachova kankuravać navat ź ich kitajskimi anałahami.

Varta adznačyć, što ŭ apošni čas biełaruskija ŭłady stali vielmi aktyŭna hienieravać idei ab padatkaabkładańni.

Ab novych padatkach napiaredadni źmianieńniaŭ u Padatkovy kodeks kazali na praciahu ŭsiaho minułaha hoda. Ale kali aściarohi hulcoŭ biełaruskaha biznesu z nahody pavieličeńnia PDV z 20% da 22% nie apraŭdalisia, źjavilisia novyja vypłaty, što surjozna zakranuli fizičnych asob.

Pierš za ŭsio heta dziaržaŭnaja pošlina na aŭtamabili, nazvanaja transpartnym padatkam — płata za dopusk transpartnaha srodku da ŭdziełu ŭ darožnym ruchu. Vystupajučy pierad deputatami, biełaruski premjer Michaił Miaśnikovič litaralna ŭhavaryŭ deputataŭ abkłaści daninaj aŭtaŭładalnikaŭ, matyvujučy heta niedachopam srodkaŭ na ramont daroh. U adnym kroku ad padatku apynulisia darmajedy. Doŭha havaryli i pra «vyjazny» padatak, prapanavany Alaksandram Łukašenkam dla asob, jakija adpravilisia ŭ zamiežnaje padarožža.

Adnak z usich prapanovaŭ realna była ŭvasoblenaja tolki adna, jakaja datyčyć aŭtaŭładalnikaŭ. Heta vyklikała niehatyŭnaje staŭleńnie hramadzian nie tolki da vypłat, ale i da ŭładaŭ, jakoje vykazałasia ŭ niekalkich akcyjach «Stop-padatak». Adnak, jak skazaŭ kiraŭnik dziaržavy z hetaj nahody, takija niaznačnyja vypłaty nie pavinnyja aburać hramadzian, bo hrošy pojduć na dobryja mety. Mienavita ŭ hetym śviatle vielmi imaviernym bačycca i ŭviadzieńnie novaha padatku, u jakim tych samych dobrych metaŭ jak minimum u try razy bolš: vyrašeńnie pytańnia subsidyjavańnia ŽKH, razhruzka składoŭ biełaruskich pradpryjemstvaŭ, vyraŭnoŭvańnie zamiežnahandlovaha płaciežnaha bałansu.

• 0
• 0
• 0
• 0
• 0
• 0
• 0
• 0