Hrošaj niama: padrychtavany ŭkaz Łukašenki ab prypynieńni budaŭnictva druhoj MKAD

Padrychtavany prajekt ukaza prezidenta ab prypynieńni budaŭnictva druhoj Minskaj kalcavoj aŭtadarohi.

Pra heta na pres-kanfierencyi 11 lutaha paviedamiŭ namieśnik načalnika hałoŭnaha ŭpraŭleńnia aŭtamabilnych daroh Ministerstva transpartu i kamunikacyj Alaksandr Hałaŭnioŭ. 

«Zaraz padrychtavany prajekt ukaza prezidenta ab prypynieńni budaŭnictva druhoj MKAD z-za adsutnaści finansavych srodkaŭ», — skazaŭ Hałaŭnioŭ. 

Pavodle jaho słoŭ, srodkaŭ, što źbirajucca za košt niadaŭna ŭviedzienaha transpartnaha zboru, niedastatkova dla finansavańnia hetaha prajekta.

«Jon dziejničaje tolki miesiac, i kazać pra jaho vyniki možna budzie tolki paśla zakančeńnia hoda, nie pra raźlikovyja vieličyni, a pra realnyja pastupleńni», — zaznačyŭ namieśnik načalnika ŭpraŭleńnia. 

Pry hetym jon źviarnuŭ uvahu, što srodki ad transpartnaha zboru nakiroŭvajucca pa pryncypie: 50% na respublikanskija darohi, 50% — na miascovyja darožnyja sietki i Minsk. «Tamu, kali raźlikovaja vieličynia składaje 1,5 trłn. rubloŭ, to 700 młrd. dla budoŭli kalcavoj darohi niedastatkova», — padkreśliŭ Hałaŭnioŭ. 

Raboty pa budaŭnictvie darohi byli pačatyja ŭ 2011 hodzie ŭ adpaviednaści z daručeńniem prezidenta, adnak u 2012 hodzie prajekt byŭ faktyčna zamarožany z-za adsutnaści finansavańnia. 

Miž tym ukazam kiraŭnika dziaržavy ŭkaz № 532 ad 13 kastryčnika 2010 hoda praduhledžvałasia budaŭnictva druhoj kalcavoj darohi ahulnaj praciahłaściu 158 km. U jaje skład pavinny ŭvachodzić isnujučyja ŭčastki aŭtamabilnych daroh (73 km) i dva novyja napramki ruchu aŭtatranspartu (85 km). 

Ukazam praduhledžvałasia ažyćciavić budaŭnictva novych učastkaŭ ciaham siami hadoŭ: u 2011—2014 hadach — učastka praciahłaściu 44 km (ad aŭtamabilnaj darohi M3 Minsk — Viciebsk da aŭtamabilnaj darohi M6/Je28 Minsk — Hrodna — miaža Respubliki Polšča); u 2014—2017 hadach — učastka praciahłaściu 41 km (ad aŭtamabilnaj darohi M6/Je28 Minsk — Hrodna — miaža Respubliki Polšča da aŭtamabilnaj darohi M1/Je 30 Brest (Kazłovičy) — Minsk — miaža Rasijskaj Fiederacyi). 

Mierkavałasia, što na trasie budzie čatyrochpałosny ruch, pa dźvie pałasy ŭ kožnym napramku, z aśviatleńniem na ŭsioj praciahłaści i mahčymaściu jazdy z chutkaściu 120 km/hadz.

Druhaja kalcavaja daroha vakoł Minska pavinna była vykonvać u pieršuju čarhu tranzitnuju funkcyju.

• 0
• 0
• 0
• 0
• 0
• 0
• 0
• 0