Infarmacyja pra kampiensacyju škody Bialackim daviedziena da viedama Łukašenki

21 studzienia 2014 u Minsku prachodziła sustreča Alaksandra Łukašenki z kiraŭnikami bujnych biełaruskich ŚMI.

Padčas jaje dyrektar BiełaPAN Aleś Lipaj spytaŭ pra los palitviaźnia Alesia Bialackaha.

Lipaj patłumačyŭ, što

pradstaŭniki hramadskaści daŭno kampiensavali škodu, jakuju, jak vyznačyŭ sud, nibyta nanios dziaržavie pravaabaronca Bialacki.

«Hety ŭron dziaržavie ŭžo daŭno pakryty za košt achviaravańniaŭ hramadzian, choć u našaj krainie nie raz vypuskali na volu biźniesmienaŭ, jakija vypłacili bujniejšyja kampiensacyi. Dyj u susiedniaj Rasii Pucin niadaŭna vyzvaliŭ ź niavoli svajho zaŭziataha sapiernika Michaiła Chadarkoŭskaha, uron ad dziejańniaŭ jakoha vymiaraŭsia nieparaŭnalna bolšaj sumaj — 500 miljonaŭ dołaraŭ», — zaznačyŭ Lipaj.

Łukašenka zrabiŭ vyhlad, što ŭpieršyniu čuje historyju pra Bialackaha i adrazu ž daručyŭ namieśniku kiraŭnika Administracyi prezidenta Alaksandru Radźkovu razabracca ŭ pytańni.

«Heta surjozny arhumient. Tut sprava nie ŭ palitycy i nie ŭ pazicyi samoha Bialackaha. Klanusia vam, ja jaho nie viedaŭ i nie viedaju», — skazaŭ jon.

Pavodle słoŭ kiraŭnika dziaržavy, kali infarmacyja ab kampiensacyi škody paćvierdzicca, pavinna być razhledžanaje pytańnie pra ŭžyvańnie da Bialackaha amnistyi.

Z času daručeńnia prajšło ŭžo dva miesiacy. «Naša Niva» nakiravała Alaksandru Radźkovu zapyt: jakim čynam vy danieśli kiraŭniku dziaržavy infarmacyju ab kampiensacyi škody, naniesienaj Bialackim?

Adkaz daŭ zahadčyk hałoŭnaha ŭpraŭleńnia pa rabocie sa zvarotami hramadzian i jurydyčnych asob Stanisłaŭ Buko.

Jon zapeŭniŭ, što «A.V.Bialackim kampiensavana vyznačanaja rašeńniem suda škoda, naniesienaja dziaržavie», a «infarmacyja pa hetym pytańni daviedziena da prezidenta Respubliki Biełaruś».

Adnak «u adpaviednaści ź dziejučym zakanadaŭstvam pry razhladańni pytańniaŭ ab pamiłavańni abo ŭmoŭna-daterminovym vyzvaleńni fakt kampiensacyi škody razhladajecca ŭ kompleksie ź inšymi abstavinami, jakija zasłuhoŭvajuć uvahi», – udakładniajecca ŭ adkazie.

Pavialičyć

«U kiraŭnictva krainy niama palityčnaj voli da vyzvaleńnia palitviaźniaŭ»

Pravaabaronca Valancin Stefanovič prakamientavaŭ dla «NN» adkaz Administracyi prezidenta:

«Dziŭna, što ŭ dakumiencie ŭkazanyja dva šlachi vyzvaleńnia, kali isnuje jašče adzin.

Pa-pieršaje,

Łukašenka moža pamiłavać čałavieka z ułasnaj inicyjatyvy.

Heta prava prezidenta, zamacavanaje Kanstytucyjaj. Adnak u niadaŭniaj zajavie na vybarčym učastku jon daŭ zrazumieć, što nie budzie nikoha vyzvalać biez prašeńnia ab pamiłavańni. Vidać, heta taki «adkaz Čembierienu». A prašeńnie ab pamiłavańni Bialacki pisać nie budzie.

Pa-druhoje, jość umoŭna-daterminovaje vyzvaleńnie.

Bialackaha nie vypuściać umoŭna-daterminova, bo ŭ jaho šmat spahnańniaŭ i jon maje status «złosnaha parušalnika».

Znoŭ ža, Bialacki nie pryznaŭ svajoj viny, a heta abaviazkovy faktar dla ŭmoŭna-determinovaha.

Pa-treciaje, zastajecca zakon ab amnistyi. Chutčej za ŭsio, jaho prymiarkujuć da 3 lipienia. Prynamsi, pra heta kazaŭ ministr unutranych spraŭ Šunievič. Płanujecca, što pa amnistyi vyjdzie kala 2 tysiačaŭ źniavolenych.

Adnak kali tekst zakona ab amnistyi budzie adpaviadać letašniamu, Bialacki zastaniecca za kratami, bo ŭ jaho jość spahnańni i jon «złosny parušalnik» režymu pienitycyjarnaj ustanovy.

Viadoma, mnohija chacieli by ŭbačyć Bialackaha na voli jak maha chutčej. Adnak pa vialikim rachunku, vyzvaleńnie palitviaźniaŭ zaležyć ad palityčnaj voli kiraŭnictva Biełarusi, a takoj voli niama.

Najbolšuju rolu tut hrajuć źniešnija faktary, a jany nie suciašalnyja. Na fonie situacyi vakoł Kryma vidavočna dałučeńnie Łukašenki da chałodnaj vajny suprać Zachadu na baku Rasii, uzmacnieńnie antyzachodniaj rytoryki. U takoj situacyi naŭrad ci možna spadziavacca na vyzvaleńnie palitviaźniaŭ.

Unutry Biełarusi niama faktaraŭ, jakija b prymusili adpuścić palitźniavolenych. Palitviaźni zbolšaha zastajucca kłopatam pravaabaroncaŭ. Nasielnictva ŭ svaju čarhu ci abyjakava da hetaj prablemy, ci prosta nie viedaje ab isnavańni palitviaźniaŭ».

• 0
• 0
• 0
• 0
• 0
• 0
• 0
• 0