«Niapravilna ličyć, što Biełaruś stračana» — dyskusija ŭ «Eŭraneście»
1 krasavika ŭ Bruseli adbyłosia pasiedžańnie rabočaj hrupy pa Biełarusi ŭ miežach sesii Parlamenckaj asamblei Ŭschodniaha partnerstva «Eŭranest».
Da ŭdziełu była zaprošana delehacyja biełaruskich demakratyčnych siłaŭ u składzie Partyi BNF, Ruchu «Za Svabodu», Abjadnanaj hramadzianskaj partyi, kampanii «Havary praŭdu», BCHD, partyi levych «Spraviadlivy śviet».
Pa vynikach dyskusii pra sytuacyju ŭ Biełarusi staršynia Partyi BNF Alaksiej Janukievič zajaviŭ karespandentu Svabody, što pryniataje rašeńnie padoŭžyć farmat, u jakim pracavała hrupa.
«Była ahučana prapanova dałučyć da pracy hrupy ŭ jakaści zaprošanaha pradstaŭnikoŭ Rady BNR. Heta prapanova zafiksavana. Pradstaŭniki sakrataryjatu skazali, što vývučać hetaje pytańnie i prymuć rašeńnie. Siabry pracoŭnaj hrupy pazytyŭna pra heta vykazalisia».
Pavodle Janukieviča, adnoj z asnoŭnych ahulnych prablemaŭ źjaŭlajecca «pahroza rasiejskaha imperyjalizmu»:
Alaksiej Janukievič
«Biezumoŭna, padziei va Ŭkrainie i toje, jakim čynam jany paŭpłyvajuć na sytuacyju ŭ Biełarusi, było ŭ hałoŭnym fokusie. Biełaruskija ŭdzielniki i pradstaŭniki Eŭranestu pahadzilisia, što vielmi niapravilna ličyć, što Biełaruś stračana, što jana całkam kantralujecca Rasiejaj i znachodzicca ŭ jaje sfery ŭpłyvu. Nieabchodna padzialać Biełaruś i Rasieju ŭ padychodach i rabić usio mahčymaje, kab umacavać niezaležnaść Biełarusi i praeŭrapiejskija nastroi ŭ biełaruskim hramadztvie. I zapabiehčy tych pahrozaŭ, jakija niasie siońnia Rasieja dla rehijonu».
Alaksiej Janukievič nazvaŭ «absaluna adekvatnaj» prapanovu staršyni Ruchu «Za Svabodu» Alaksandra Milinkieviča, jaki zaklikaŭ Eŭraźviaz nie izalavać Biełaruś:
«Na siońniašni momant izalacyja Biełarusi vyklučna hulała b u intaresach Kramla, bo pracavała b na asłableńnie krainy i na pavieličeńnie rasiejskaha ŭpłyvu ŭ Biełarusi. Dyjaloh pamiž krainami EZ i ciapierašnimi ŭładami Biełarusi pavinien być abumoŭleny. I vyzvaleńnie palitviaźniaŭ pavinna stajać pieršym na paradku dnia. Ale hety dyjaloh nadzvyčaj važny».
Padčas dyskusii hučała pytańnie pra vyzvaleńnie biełaruskich palitviaźniaŭ.
«Niečaha novaha ŭ hetym aspekcie niama. Pradstaŭniki EZ adznačyli, što kali jašče niekalki miesiacaŭ tamu perspektyvy vyzvaleńnia palitviaźniaŭ vyhladali bolš realnymi, to siońnia hetaje pytańnie znoŭ jość vielmi niapeŭnym. Siońnia niama adčuvańnia, što jość šaniec nieŭzabavie pabačyć palitviaźniaŭ na voli. Adnak padychody zastajucca raniejšymi: EZ zastajecca adkrytym dla dyjalohu, ale kab jon raspačaŭsia ŭ poŭnym farmacie, nieabchodna vyzvaleńnie palitviaźniaŭ».
Vital Rymašeŭski
U interviju karespandentu Svabody adzin ź lideraŭ Biełaruskaj chryścijanskaj demakratyi Vital Rymašeŭski nia staŭ kamentavać pazycyju Alaksandra Milinkieviča, jaki zaklikaŭ Eŭraźviaz nie izalavać Biełaruś. Pra što spadar Rymašeŭski vykazaŭsia ŭ Eŭraneście?
«Tut u Bruseli taksama razmova išła pra toje, jak paŭpłyvała sytuacyja va Ŭkrainie na padziei ŭ Biełarusi, pra plany biełaruskich demsiłaŭ. Što tyčycca planaŭ demisłaŭ, to ŭ nas užo jość pazytyŭnyja vyniki. Jość pieršyja prapanovy pra vyłučeńnie adzinaha kandydata, i heta było sustreta z radaściu. Što da padziej va Ŭkrainie, to vajna va Ŭkrainie — heta ŭ tym liku vynik toj reał-palityk, jakaja pravodziłasia vialikaj častkaj eŭrapiejskich palitykaŭ, eŭrapiejskich dziaržaŭ. Uvarvańnie va Ŭkrainu Pucina nie nahoda apraŭdvać inšyja aŭtarytarnyja režymy ŭ Eŭropie. Pazycyja Zachadu adnosna Biełarusi była nadzvyčaj słabaj. I hałoŭnaja vysnova, jakuju režym Łukašenki vynies z padziej u Krymie, heta słabaść i biaśsille Zachadu pradprymać niešta ŭsurjoz. Tamu ŭ Biełarusi było pavieličeńnie represij padčas miascovych vybaraŭ paraŭnalna ź minułymi kampanijami. Režym Łukašenki razumieje tolki pazycyju siły. Biezumoŭna, pavinna być adkrytaja pazycyja EZ. I najpierš heta adkrytaść pavinna tyčycca biełaruskaha hramadztva, pazytyŭnych prapanoŭ da biełaruskaj dziaržavy ŭ cełym. Ale razam z tym pavinien być ćviordy nehatyŭny mesydž. Kali apraŭdvać toje, što ŭ Biełarusi treba padtrymlivać aŭtarytarny režym, kab Biełaruś nia straciła niezaležnaść, to z takimi ž arhumentami možna padtrymlivać i Pucina, kab Rasieja nia straciła niezaležnaść ad Kitaju. Takim čynam možna apraŭdać usiaśvietny fašyzm i imperyjalizm. I takaja pazycyja była sustreta z razumieńniem palitykami, daśviedčanymi ŭ stasunkach z režymam u Biełarusi».
Na pasiadžeńnie, aproč biełaruskich apazycyjnych palitykaŭ, byŭ taksama zaprošany ministar zamiežnych spraŭ Biełarusi Ŭładzimier Makiej. Adnak jon nie pryjechaŭ, a dasłaŭ zamiest siabie pasła.
«My nie zaprašali pasła, tamu jamu i było admoŭlena ŭ mahčymaści ŭdzielničać u siońniašniaj dyskusii. Eŭrapiejski parlament nie pryznaje lehitymnaść biełaruskaj Pałaty pradstaŭnikoŭ. I heta naša pryncypovaja pazycyja», — adznačyŭ padčas pasiadžeńnia polski parlamentar Jacek Saryjuš-Volski.
Anatol Labiedźka
Staršynia Abjadnanaj hramadzianskaj partyi Anatol Labiedźka zajaviŭ pres-łužbie AHP, što namahaŭsia pierakanać EZ, što «siońnia nielha padzialać Biełaruś i Ŭkrainu»:
«Tut patrebna adna ahulnaja stratehija. Akramia taho, nieabchodna razumieńnie, što biez sumlennych, svabodnych vybaraŭ pieramieny ŭ Biełarusi niemahčymyja. I treciaja tema, aktualnaja na dadzieny momant, — kampanija «Sumlennaja hulnia — Fair play — 2014». Heta kampanija salidarnaści z palitviaźniami, kampanija cisku na biełaruskija ŭłady napiaredadni čempijanatu śvietu pa chakiei, u jakoj mižnarodny składnik maje vielmi važnaje značeńnie», — adznačyŭ Anatol Labiedźka.
Kamientary