Jak zajaviŭ Alaksandr Łukašenka, adkryvajučy sustreču prezidentaŭ Biełarusi, Kazachstana i Rasii ŭ vuzkim składzie, nie varta pieratvarać intehracyju troch krain «u praces dziela pracesu».
Kali baki nie hatovy realizavać raniej dasiahnutyja damoŭlenaści, to pra Jeŭrazijski ekanamičny sajuz (JEAES) treba havaryć hadoŭ praź dziesiać, padkreśliŭ jon.
U svaju čarhu Kazachstan ličyć najaŭnyja roznahałośsi na šlachu stvareńnia JEAES pieraadolnymi.
«Ja za toje, kab kaniej nie hnać, ale jość mahčymaść ukłaścisia ŭ pryniatyja terminy i źniać usie pytańni. My možam damovicca», — cytuje Nursułtana Nazarbajeva dziaržaŭnaje ahienctva BiełTA.
Uładzimir Pucin sa svajho boku adznačyŭ: jość šerah jašče nie vyrašanych pytańniaŭ pa stvareńni JEAES, ale ich možna dadatkova prapracavać i znajści kampramisy.
«Jość niekatoryja pytańni, jakija nie poŭnaściu jašče adpracavanyja na ekśpiertnym uzroŭni, my dla hetaha i sabralisia, — cytuje Pucina RIA Novosti. — Ja zhadžusia z vami, pavažanyja kalehi, što, na moj pohlad, možna zaŭsiody dadatkova nad imi papracavać, znajści niejkija rečy, jakija buduć prymalnyja dla ŭsich, znajści kampramisy».
Miž tym, dadaŭ Pucin, Mytny sajuz pracuje i prynosić karyść, pra što, pavodle jaho słoŭ, śviedčać ekanamičnyja pakazčyki krain MS. «Ale my možam zrabić jašče adzin krok dla pahłybleńnia ŭzajemadziejańnia, prasunuć supracoŭnictva na bolš vysoki ŭzrovień», — dadaŭ jon.
Pucin nahadaŭ pra niadaŭniuju sustreču kiraŭnikoŭ uradaŭ troch krain (15 krasavika u Maskvie), na jakoj prapracoŭvalisia ŭsie pytańni pa dahavory, što zastajucca. «Imi taksama šmat zroblena. Padrychtavany vialiki abjomny hruntoŭny dakumient, pa źmieście jon daje zrabić jašče adzin krok dla pahłybleńnia našaha ŭzajemadziejańnia. My možam jakasna źmianić naša supracoŭnictva, heta dazvolić vyjści nam na pavyšeńnie kankurentazdolnaści našych ekanomik, zrabić ich bolš efiektyŭnymi, pryciahnuć inviestycyi», — zajaviŭ Pucin.
Nahadajem, u paradku dnia pasiadžeńnia Vyšejšaha jeŭrazijskaha ekanamičnaha savieta na ŭzroŭni kiraŭnikoŭ dziaržaŭ — abmierkavańnie chodu pracy nad prajektam dahavora ab JEAES, a taksama realizacyi płana mierapryjemstvaŭ (darožnaj karty) pa dałučeńni Armienii da Mytnaha sajuza (MS) i Adzinaj ekanamičnaj prastory Biełarusi, Kazachstana i Rasii.
Dahavor ab stvareńni JEAES pavinien być hatovy da maja 2014 hoda i nabyć moc na prastory MS 1 studzienia 2015 hoda. Bazavyja pryncypy JEAES byli ŭzhodnieny prezidentami trojki ŭ śniežni 2013 hoda ŭ Maskvie.
Miž tym u bakoŭ zastajucca supiarečnaści pa šerahu pryncypovych pytańniaŭ, što tyčacca stvareńnia JEAES.
U pryvatnaści Biełaruś nastojvaje na ŭklučeńni ŭ prajekt dahavora normu ab ustaranieńni vyklučeńniaŭ u pytańniach handlu naftaj i naftapraduktami. U Minsku ličać, što praktyka pieraličeńnia Biełaruśsiu ŭ rasijski biudžet vyvaznych mytnych pošlin na naftu i naftapradukty pavinna być admieniena (u 2013 hodzie Biełaruś pieraličyła ŭ rasijski biudžet u vyhladzie vyvaznych pošlin na naftapradukty 3,3 młrd. dołaraŭ).
Kazachstan, u svaju čarhu, vystupaje za svabodny dostup da trubapravoda dla transpartavańnia enierharesursaŭ pa terytoryi JEAES. Rasija ž zajaŭlaje pra nieabchodnaść ustaranieńnia astatnich vyklučeńniaŭ u handli, u tym liku svabodny dostup rasijskich tavaraŭ na rynak krain — udzielnic sajuza.
Vystupajučy 22 krasavika z pasłańniem da naroda i parłamienta, Łukašenka zajaviŭ: admiena vyklučeńniaŭ u Jeŭrazijskim ekanamičnym sajuzie — pryncypovaja pazicyja Biełarusi.
Jon nahadaŭ słovy Uładzimira Pucina i Dźmitryja Miadźviedzieva pra hatoŭnaść Rasii admianić usie vyklučeńni i abmiežavańni ŭ Jeŭrazijskim ekanamičnym sajuzie z 1 studzienia 2015 hoda. «Ale tady da 2015 hoda było dva ci dva z pałovaj hoda, kali adbylisia pieršyja takija zajavy. Ja heta ŭsio pamiataju, ja heta ŭsio vypisaŭ da sustrečy 29-ha tut, u Minsku, ja hatovy heta ŭsio pakazać, dzie byli jakija zajavy», — skazaŭ Łukašenka.
«Zaraz z pryčyny peŭnych akaličnaściaŭ usio, što adbyvajecca, zdajecca, zadavolvaje Kazachstan. Budziem ščyryja, hałoŭny pryjarytet siońnia dla Kazachstana — uvajści ŭ SHA, a potym — naš sajuz. Siońnia nibyta ciapierašniaja situacyja zadavolvaje i Rasiju», — adznačyŭ Łukašenka.
«Kali my stvarajem naš ekanamičny sajuz, asnovu budučaha sajuza, na nas vielmi pilna ŭsie hladziać — ad Ukrainy da Tadžykistana. Tut nie pavinna być pieraškod dla pieramiaščeńnia ni kapitałaŭ, ni pracoŭnaj siły — usio pavinna być jak u adnoj dziaržavie», — padkreśliŭ Łukašenka.
Ciapier čytajuć
Biełpoł: «Epštejn nie dajechaŭ da Biełarusi». A kim byli baćki jaho kachanki Karyny Šulak?4
Biełpoł: «Epštejn nie dajechaŭ da Biełarusi». A kim byli baćki jaho kachanki Karyny Šulak?
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary