Pieršaj namieśnicaj ministra kultury stała ideołah z Administracyi prezidenta FOTA
Načalnica ŭpraŭleńnia sacyjalna-kulturnaj palityki hałoŭnaha ideałahičnaha ŭpraŭleńnia Administracyi prezidenta Iryna Dryha pryznačanaja pieršaj namieśnicaj ministra kultury. Na hetaj pasadzie jana źmienić Uładzimira Karačeŭskaha.
Dahetul spadarynia Dryha niekalki razoŭ źjaŭlałasia ŭ ŚMI. Naprykład, u studzieni 2012-ha jaje ŭspomniŭ śpiavak Źmicier Vajciuškievič, jahony kancert nie prajšoŭ uzhadnieńnia ŭ Iryny Dryhi.
«Cumna mnie, tak chacieła spadziavacca, što nadydzie adliha, a tut pieraškadžaje niejkaja Iryna Dryha… Daviadziecca pryniać za dadzienaść i dalej siadzieć u padpolli, dy pakrysie rabić padkop źnizu», — žartavaŭ tady Vajciuškievič u kamientary dla «Tuzina hitoŭ».
Heta była nie adzinaja zabarona dla muzykaŭ z «čornaha śpisu», jakuju «vypisvała» pradstaŭnica Administracyi prezidenta.
A jašče pierad hetym Iryna Dryha adznačyłasia vystupam adnosna źmiestu školnych padručnikaŭ. «Treba sačyć i za ideałahičnym źmiestam vučebnaj litaratury», — zajaviła jana ŭ interviju «Źviaździe».
«U jakasci prykładu možna pryviesci padručnik pa hramadaznaŭstvie, pryznačany dla vučniaŭ 9-ch i 10-ch kłasaŭ. Naprykład, raździeł pra palityčnych lidaraŭ supravadžaje fatahrafija kiraŭnikoŭ dziaržaŭ «vialikaj vaśmiorki». Ale ci patrebna našym dzieciam viedać u tvar kiraŭnikoŭ Indyi abo Brazilii?
Ci nie lepš było źmiascić fatahrafiju prezidenta Respubliki Biełaruś z kiraŭnikami krain SND? Ci ŭ raździele «hrošy» my bačym na ilustracyi hrošy lubych krain, ale tolki nie biełaruskija. Taksama ŭ padručniku paviedamlajecca, što parłamient farmiruje ŭrad, pryznačaje i adpraŭlaje ŭ adstaŭku ministraŭ. Prabačcie, pra parłamient jakoj krainy idzie razmova? Biełaruski parłamient vyrašaje inšyja zadačy. Napeŭna, našych dziaciej treba navučać i vychoŭvać usio ž na našych prykładach!» — kazała budučaja pieršaja namieśnica ministra kultury.
Varta adznačyć, što Iryna Dryha była kiraŭnikom hrupy pa praviadzieńni manitorynhu ŭ pryvatnaj ustanovie adukacyi «Žanočy instytut «Enviła». U vyniku dziejnaści hrupy instytut byŭ likvidavany.
Iryna Dryha 1970 hoda naradžeńnia. Kandydat piedahahičnych navuk. Biblijohraf.
Ciapier čytajuć
Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora3
Kamientary