Nacyjanalnaja biblijateka Biełarusi i AAT «Bank BiełVEB» prezientavali siońnia pieršyja 5 knih z faksimilnaha poŭnaha zboru vydańniaŭ Francyska Skaryny.
Knihi «Byćcio», «Vychad», «Lavit», «Ličby» i «Druhi zakon» byli ŭručanyja pradstaŭnikam dypłamatyčnych misij Rasii, Ukrainy, Polščy, Čechii, Hiermanii i Italii ŭ Biełarusi. Vydańni taksama byli pieradadzienyja biblijatekam usich rajonaŭ stalicy. Tyraž kožnaj knihi składaje 1 tys. asobnikaŭ, 100 ź jakich vypuščanyja ŭ skuranoj vokładcy.
«Francysk Skaryna naležaŭ nie tolki biełaruskaj kultury. Los źviazała jaho z roznymi krainami. Pieršadrukar unios vialiki ŭkład u raźvićcio ŭsioj jeŭrapiejskaj kultury. Jon padaryŭ ŭsim narodam hałoŭnaje bahaćcie - drukavanuju knihu», - skazaŭ na prezientacyi vydańnia ministr kultury Biełarusi Barys Śviatłoŭ.
Dyrektar Nacyjanalnaj biblijateki Raman Matulski adznačyŭ, što ciapier u śviecie nie isnuje knih Skaryny, jakija zachavalisia całkam. «Ź isnujučych niekalkich asobnikaŭ vydańnia my źbirajem idealny tom. Akramia taho, upieršyniu na sučasnuju biełaruskuju movu pierakładzienyja teksty Skaryny - pradmovy da ŭsiaho vydańnia i kožnaj knihi», - dadaŭ jon.
Poŭny nabor z 25 tamoŭ, nadrukavanych Francyskam Skarynam u Prazie (1517-1519 hady) i Vilni (1522-1525), budzie sabrany ŭ dvaccacitomnym faksimilnym vydańni. U jaho asnovu pakładzienyja elektronnyja kopii najlepšych z zachavanych prac biełaruskaha pieršadrukara, jakija źnichodziacca ŭ biblijatekach i muziejach Biełarusi, Rasii, Ukrainy, Hiermanii i inšych krain. Faksimilnaje vydańnie z maksimalnaj paŭnatoj uznaŭlaje knihi Francyska Skaryny. Usie vydańni zabiaśpiečanyja kamientarami navukoŭcaŭ, a taksama pierakładami pradmoŭ i paślasłoŭjaŭ Francyska Skaryny na sučasnyja biełaruskuju, ruskuju i anhlijskuju movy.
Inicyjatarami i asnoŭnymi vykanaŭcami prajekta stali AAT «Bank BiełZEB» i Nacyjanalnaja biblijateka Biełarusi. Usie pracy pa adnaŭleńni Skarynaŭskaj spadčyny vykonvajucca pa dziaržprahramie «Kultura Biełarusi» na 2011-2015 hady. Vydaviecki prajekt raźličany na 2013-2017 hady i prymierkavany da 500-hodździa ajčynnaha knihadrukavańnia. Vydadzienyja zbory knih biełaruskaha pieršadrukara buduć biazvypłatna pieradadzienyja ŭ biblijateki, muziei i archivy Biełarusi, Rasii, Ukrainy, Polščy, Hiermanii, a taksama ŭ mižnarodnyja arhanizacyi - AAN i JUNIESKA.
X
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii16
Kamientary