Śpiecdakładčyk AAN: U Biełarusi sistematyčna parušajucca ŭsie pravy čałavieka
Vystupajučy siońnia ŭ Ženievie na 26-j siesii Rady pa pravach čałavieka (RPČ) AAN, śpiecdakładčyk pa situacyi ŭ Biełarusi RPČ Mikłaš Charašci zajaviŭ pra «sistematyčny charaktar surjoznych parušeńniaŭ usich pravoŭ čałavieka ŭ Biełarusi».
Śpiecdakładčyk adznačyŭ, što
biełaruski parłamient źjaŭlajecca adzinym u Jeŭropie zakanadaŭčym orhanam, dzie nie pradstaŭlena apazicyja.
Akramia taho, pa słovach Charašci,
Biełaruś - adzinaja ŭ Jeŭropie kraina, jakaja praciahvaje pryvodzić u vykanańnie śmiarotnyja prysudy.
«U krasaviku dźvie novyja pakarańni byli sakretna pryviedzieny ŭ vykanańnie. Samim asudžanym da śmiarotnaha pakarańnia, ich svajakam i advakatam nie paviedamlajecca ni pra zapłanavanuju datu pakarańnia śmierciu, ni pra miesca pachavańnia cieła», - kanstatavaŭ śpiecdakładčyk.
Jon źviarnuŭ uvahu na ŭzmacnieńnie represij u Biełarusi da i padčas praviadzieńnia ŭ Minsku čempijanatu śvietu pa chakiei.
Charašci zajaviŭ, što ŭ jaho mała nadziej na palapšeńnie situacyi z pravami čałavieka ŭ Biełarusi i paśla prezidenckich vybaraŭ 2015 hoda.
«Chraničnaje abmiežavańnie pravoŭ čałavieka apošnija 15 hadoŭ pryvodziła da paŭtareńnia hvałtu, jak praviła, u pieryjad vybaraŭ i abjaŭleńnia ich pieradvyznačanych vynikaŭ, -
adznačyŭ śpiecdakładčyk. - U časie apošniaj miascovaj vybarčaj kampanii ŭ sakaviku 2014 hoda ŭ pravie vybaru hramadzianam było na praktycy admoŭlena, bo 88% vybarčych akruhaŭ byli biezalternatyŭnymi».
Pradstaŭniki ZŠA i ES padtrymali vysnovy Charašci, zaklikaŭšy ŭłady Biełarusi supracoŭničać sa śpiecdakładčykam i ŭpuścić jaho ŭ krainu. Jany taksama zapatrabavali nieadkładnaha vyzvaleńnia i reabilitacyi ŭsich biełaruskich palitviaźniaŭ, paviedamlaje www.untribune.com.
Akramia taho, ES i ZŠA vystupili za praciah mandata śpiecdakładčyka pa Biełarusi - heta vynikaje z tekstaŭ vystupleńniaŭ pradstaŭnikoŭ Jeŭrasajuza i Złučanych Štataŭ Amieryki, raźmieščanych na sajcie Jeŭrapiejskaj słužby źniešnich dziejańniaŭ i misii ZŠA pry orhanach AAN u Ženievie adpaviedna.
Nahadajem,
aficyjny Minsk praciahvaje admaŭlacca supracoŭničać ź Mikłašam Charašci.
Jak paviedamiŭ načalnik hałoŭnaha ŭpraŭleńnia šmatbakovaj dypłamatyi biełaruskaha MZS Juryj Ambrazievič na bryfinhu ŭ lutym, Biełaruś u bližejšy čas maje namier paćvierdzić zaprašeńnie naviedać krainu dla šerahu śpiecdakładčykaŭ Rady AAN pa pravach čałavieka (RPČ) - pa svabodzie ŚMI, svabodzie relihii, svabodzie sudździaŭ, pa handli ludźmi i dziciačaj parnahrafii, pa pravach mihrantaŭ, pa hvałcie ŭ adnosinach da žančyn.
Što tyčycca Charašci, dyk Ambrazievič zajaviŭ: «My nie ličym, što jon moža ci zdolny vieści kanstruktyŭny dyjałoh z uradam Biełarusi ŭ siłu śpiecyfičnych asobasnych jakaściaŭ i pieradhistoryi pytańnia». Pradstaŭnik MZS nahadaŭ, što ŭstanova pasady śpiecdakładčyka pa situacyi ŭ Biełarusi «ažyćciaŭlałasia biez zhody ź biełaruskim uradam».
Kamientary