Спецдакладчык ААН: У Беларусі сістэматычна парушаюцца ўсе правы чалавека

Выступаючы сёння ў Жэневе на 26-й сесіі Рады па правах чалавека (РПЧ) ААН, спецдакладчык па сітуацыі ў Беларусі РПЧ Міклаш Харашці заявіў пра «сістэматычны характар сур'ёзных парушэнняў усіх правоў чалавека ў Беларусі».

Спецдакладчык адзначыў, што

беларускі парламент з'яўляецца адзіным у Еўропе заканадаўчым органам, дзе не прадстаўлена апазіцыя.

Акрамя таго, па словах Харашці,

Беларусь - адзіная ў Еўропе краіна, якая працягвае прыводзіць у выкананне смяротныя прысуды.

«У красавіку дзве новыя пакаранні былі сакрэтна прыведзены ў выкананне. Самім асуджаным да смяротнага пакарання, іх сваякам і адвакатам не паведамляецца ні пра запланаваную дату пакарання смерцю, ні пра месца пахавання цела», - канстатаваў спецдакладчык.

Ён звярнуў увагу на ўзмацненне рэпрэсій у Беларусі да і падчас правядзення ў Мінску чэмпіянату свету па хакеі.

Харашці заявіў, што ў яго мала надзей на паляпшэнне сітуацыі з правамі чалавека ў Беларусі і пасля прэзідэнцкіх выбараў 2015 года.

«Хранічнае абмежаванне правоў чалавека апошнія 15 гадоў прыводзіла да паўтарэння гвалту, як правіла, у перыяд выбараў і аб'яўлення iх перадвызначаных вынікаў, -

адзначыў спецдакладчык. - У часе апошняй мясцовай выбарчай кампаніі ў сакавіку 2014 года ў праве выбару грамадзянам было на практыцы адмоўлена, бо 88% выбарчых акругаў былі безальтэрнатыўнымі».

Прадстаўнікі ЗША і ЕС падтрымалі высновы Харашці, заклікаўшы ўлады Беларусі супрацоўнічаць са спецдакладчыкам і ўпусціць яго ў краіну. Яны таксама запатрабавалі неадкладнага вызвалення і рэабілітацыі ўсіх беларускіх палітвязняў, паведамляе www.untribune.com.

Акрамя таго, ЕС і ЗША выступілі за працяг мандата спецдакладчыка па Беларусі - гэта вынікае з тэкстаў выступленняў прадстаўнікоў Еўрасаюза і Злучаных Штатаў Амерыкі, размешчаных на сайце Еўрапейскай службы знешніх дзеянняў і місіі ЗША пры органах ААН у Жэневе адпаведна.

Нагадаем,

афіцыйны Мінск працягвае адмаўляцца супрацоўнічаць з Міклашам Харашці.

Як паведаміў начальнік галоўнага ўпраўлення шматбаковай дыпламатыі беларускага МЗС Юрый Амбразевіч на брыфінгу ў лютым, Беларусь у бліжэйшы час мае намер пацвердзіць запрашэнне наведаць краіну для шэрагу спецдакладчыкаў Рады ААН па правах чалавека (РПЧ) - па свабодзе СМІ, свабодзе рэлігіі, свабодзе суддзяў, па гандлі людзьмі і дзіцячай парнаграфіі, па правах мігрантаў, па гвалце ў адносінах да жанчын.

Што тычыцца Харашці, дык Амбразевіч заявіў: «Мы не лічым, што ён можа ці здольны весці канструктыўны дыялог з урадам Беларусі ў сілу спецыфічных асобасных якасцяў і перадгісторыі пытання». Прадстаўнік МЗС нагадаў, што ўстанова пасады спецдакладчыка па сітуацыі ў Беларусі «ажыццяўлялася без згоды з беларускім урадам».

• 0
• 0
• 0
• 0
• 0
• 0
• 0
• 0