Kalehija pa kryminalnych spravach Minskaha abłasnoha suda 16 lipienia vyniesła pryhavor abvinavačvanym pa spravie ab žorstkim zabojstvie minčanki Taćciany Słonimskaj.
Hałoŭny abvinavačvany, Jaŭhien Kulik, pryhavorany da pažyćciovaha źniavoleńnia z adbyvańniem pakarańnia ŭ papraŭčaj kałonii va ŭmovach asablivaha režymu. Jaho chaŭruśnik Mikałaj Łotyš atrymaŭ siem hadoŭ pazbaŭleńnia voli z adbyvańniem pakarańnia ŭ kałonii va ŭmovach uzmocnienaha režymu. Jon budzie adpraŭleny na prymusovaje lačeńnie ad ałkahalizmu.
Paciarpiełymi pa spravie prachodzili syn i dačka Taćciany Słonimskaj, jakaja prapała 3 lipienia 2013 hoda. Vidavočcy śviedčyli, što jana pryjazdžała ŭ viosku Mały Traścianiec (Minski rajon) da maci, a zatym pajechała na aŭtamašynie «Mazda-3» źbirać jahady. 18 lipienia ŭ lasnym masivie pablizu vioski Dvorac zakapanym u ziamlu byŭ znojdzieny trup žančyny sa šmatlikimi (nie mienš čym 14) nažavymi ranieńniami. Pry ŭzajemadziejańni z pravaachoŭnikami Rasii ŭ Maskvie byŭ znojdzieny aŭtamabil, što naležaŭ Słonimskaj.
Dziakujučy svoječasova praviedzienym śledčym dziejańniam i apieratyŭna-vyšukovym mierapryjemstvam pravaachoŭniki ŭstanavili padazronych va ŭčynieńni złačynstva. Imi akazalisia raniej nieadnarazova sudzimyja minčanie 1992 i 1994 hadoŭ naradžeńnia. Jany byli zatrymany 17 lipienia.
Kulik abvinavačvaŭsia va ŭčynieńni złačynstvaŭ pa č. 1 art. 14, č. 2 art. 205, č. 3 art. 205, č. 3 art. 207, pp. 6, 12 č. 2 art. 139, č. 1 art. 377, č. 1 art. 380, č. 1 art. 381 KK; raniej sudzimy Mikałaj Łotyš — va ŭčynieńni złačynstvaŭ, praduhledžanych č. 6 art. 16, pp. 6, 12 č. 2 art. 139, č. 2 art. 205, č. 3 art. 205, č. 6 art. 16, č. 3 art. 207 KK.
Padčas śledstva pa spravie ab zabojstvie stała viadoma taksama ab kradziažach, učynienych Kulikom z Łotyšam. Mienavita padčas pryjezdu 3 lipienia ŭ les kala vioski Pryleśsie dla raździełu i vyvazu raniej ukradzienaj majomaści na aŭtamabili «ZAZ» Kulik i Łotyš sustreli ŭ lesie Słonimskuju, jakaja źbirała jahady. Bačačy, što žančyna nie źbirajecca źjazdžać, Kulik prapanavaŭ Łotyšu zabić jaje i zavałodać jaje mašynaj «Mazda-3». Zabivać Kulik vyrašyŭ sam. Łotyš byŭ patrebien na ŭsiaki vypadak dla dapamohi.
Słonimskaja była zabita ŭdarami nažom u šyju i inšyja vierchnija častki cieła, kali padyšła da svajoj mašyny. Pieršy ŭdar Kulik nanios, padkraŭšysia zzadu. Pakul jon zabivaŭ žančynu, Łotyš naziraŭ za abstanoŭkaj, zakryŭ anučami numarny znak ich mašyny «ZAZ». Złačyncy pahruzili trup u «Mazdu» i vyjechali ź lesu. Łotyš ruchaŭsia pieršym na «ZAZie» i pa telefonie paviedamlaŭ Kuliku na «Maździe» ab niepažadanych śviedkach.
Trup Kulik zakapaŭ u lasnym masivie kala vioski Dvorac. Papiarednie jon źniaŭ z zabitaj darahija piarścionki z bryljantami i zabraŭ dakumienty. Apošnija viečaram spaliŭ. Adzieńnie Kulika, vypackanaje ŭ kroŭ Słonimskaj, vykinuŭ udalečyni ad miesca žycharstva abodvuch Łotyš.
U noč z 3 na 4 lipienia Kulik vyjechaŭ u Maskvu i pa padroblenych dakumientach i rehistracyjnych znakach pradaŭ «Mazdu». Viarnuŭšysia ŭ Minsk, daŭ Łotyšu 500 dołaraŭ za dapamohu ŭ razbojnym napadzie i zabojstvie i ŭtojvańni złačynstva. Usiaho ŭ Słonimskaj było ŭkradziena majomaści bolš jak na 126 młn. rubloŭ.
1 lipienia dziaržabvinavaŭca paprasiŭ sud pryhavaryć hałoŭnaha fihuranta hetaj spravy da pažyćciovaha źniavoleńnia z kanfiskacyjaj majomaści, jaho pamahataha — da 25 hadoŭ pazbaŭleńnia voli z kanfiskacyjaj majomaści.
U sudzie Kulik poŭnaściu pryznaŭ svaju vinu ŭ złačynstvach, jakija jamu inkryminujucca, u pryvatnaści ŭ kradziažach, razbojnym napadzie na Słonimskuju i jaje zabojstvie. Pry hetym jon nie zhadziŭsia z traktoŭkaj śledstvam dziejańniaŭ Mikałaja Łotyša jak dapamahańnie.
Łotyš zajaviŭ sudu, što abvinavačańnie pryznaje častkova. Dapamohu ŭ zabojstvie, pavodle słoŭ abvinavačvanaha, jon sapraŭdy akazvaŭ, ale nie ŭ takich abjomach, jak vynikaje z abvinavačańnia, i nie pry takich abstavinach.
U apošnim słovie 14 lipienia Kulik paprasiŭ prabačeńnia ŭ svajakoŭ Taćciany Słonimskaj i paprasiŭ sud vynieści spraviadlivy pryhavor.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj66
Kamientary