Padčas matču BATE — «Słovan» zatrymali zaŭziatara za šalik z «Pahoniaj»

Padčas matču ŭ adkaz płej-of kvalifikacyi Lihi čempijonaŭ pamiž barysaŭskim BATE z bracisłaŭskim «Słovanam» na stadyjonie byŭ zatrymany zaŭziatar Siaržuk Bachun. Ściuardu padaŭsia padazronym jaho šalik z histaryčnym hierbam «Pahonia». Pałovu matču zaŭziatar pravioŭ u apornym punkcie.

— Heta zdaryłasia prykładna na 30-j chvilinie pieršaha tajma. Ja zaŭvažyŭ, što ściuard pilna na mianie hladzić i niešta kaža pa racyi. Zrazumieŭ, što heta tyčycca mienavita mianie. I tut ža padbiehli dva supracoŭniki milicyi i prapanavali prajści ź imi, — raspavioŭ padrabiaznaści ŭčorašniaha incydentu Siaržuk Bachun.

Pavodle jaho słovaŭ, milicyjaniery admovilisia rastłumačyć pryčynu zatrymańnia. Jaho słovy pra toje, što jon zapłaciŭ za bilet i ničoha nie parušaje, praihnaravali, zajaviŭšy, što «tam raźbiarucca».

— Simvalična, što ŭ ściuarda, jaki zdaŭ mianie milicyi, na kamizelcy byŭ numar 006, — uzhadvaje Siaržuk. Razam ź im u aporny punkt adpraviŭsia žurnalist «Jeŭraradyjo» Aleś Pilecki, jaki taksama byŭ na futbole ŭ jakaści zaŭziatara.

— U aporcy nas pasadzili ŭ pakoj i skazali čakać načalnika. Jon usio nie išoŭ, jaho paru razoŭ vyklikali pa racyi. Źjaviŭsia chvilin praz sorak. Major Viačasłaŭ Paŭłaviec. Adrazu ž zajaviŭ, što mienavita jon daŭ zahad mianie zatrymać.

Siarhiej raspaviadaje, što šalik z «Pahoniaj» zaŭsiody biare na spartyŭnyja mierapryjemstvy - na handboł, chakiej i futboł:

— Byvaje, što milicyjanty pytajuć, što heta za simvolika. Ja im tłumaču, što hety hierb pryznany Ministerstvam kultury ŭ jakaści histaryčnaha simvała, što jon prysutničaje na hierbach Mahilova i Viciebskaj vobłaści. Jak praviła, na hetym usio i skančałasia. Ale ŭ hety raz milicyjanty papalisia niejkija nieadukavanyja.

Siarhiej kaža, što major Paŭłaviec jaho nie słuchaŭ i nastojvaŭ na svaim.

— Kaža, nielha na stadyjon z takim šalikam, bo heta nibyta niezarehistravanaja simvolika. Ja jamu patłumačyŭ, što heta nie ściah u rukach, a elemient adzieńnia, što «Pahonia» aficyjna pryznanaja. A jon mnie: «Ty z Bresta? Voś tam i nasi svoj šalik!»

U vyniku, jak raskazvaje Siarhiej, milicyjant vymusiŭ jaho schavać šalik pad vopratku i pryhraziŭ nie źjaŭlacca ź im bolš na barysaŭskim stadyjonie.

— Nas adpuścili pad kaniec matču. Nijakich pratakołaŭ, nijakich vybačeńniaŭ. Budu pisać skarhu na dziejańni Paŭłaŭca. Ja zapłaciŭ za kvitok, ničoha nie parušaŭ. Chto mnie kampiensuje hrošy i maralnyja vydatki?

Na incydent z Bachunam apieratyŭna adreahavali inšyja zaŭziatary. Paviedamleńnie pra zatrymańnie za šalik jašče padčas hulni źjaviłasia na staroncy futbolnych ultras u Tvitery.

• 0
• 0
• 0
• 0
• 0
• 0
• 0
• 0