Vodny šlach «ad mora da mora», jaki prachodzić praź Biełaruś, adnoviać z dapamohaj ES

Pra vyhody adnaŭleńnia vadnatranspartnaj mahistrali E-40 na parłamienckaj kanfierencyi Savieta krain Bałtyjskaha mora ŭ polskim Olštynie 26 žniŭnia paviedamiła biełaruskaja delehacyja RUEBP «Dniepra-Buhski vodny šlach». 

Pavialičyć

Šlach stanie novym handlovym maršrutam pamiž partami Bałtyjskaha i Čornaha moraŭ i dazvolić pieravozić da 4 miljonaŭ ton hruzu ŭ hod, paviedamili ŭ sakrataryjacie Kamisii pa pytańniach raźvićcia vadnatranspartnaha złučeńnia Je-40 na ŭčastku Dniapro — Visła. 

U Saviet dziaržaŭ Bałtyjskaha mora ŭvachodziać krainy Skandynavii i Bałtyi, a taksama Hiermanija, Isłandyja, Polšča, Finlandyja, Rasija. Adnak najbolšuju zacikaŭlenaść u paŭnavartasnym funkcyjanavańni vadnatranspartnaj mahistrali E-40, jakaja siońnia niesudnachodnaja na ŭčastku pamiž Varšavaj i Brestam, majuć Biełaruś, Polšča i Ukraina. Mienavita pa terytoryi hetych troch krain-susiedziaŭ prachodzić vodny šlach E-40.

Paŭnavartasna funkcyjanujučy, vodnaja mahistral E-40 dazvolić Biełarusi pašyryć svaje ekspartnyja mahčymaści, pryciahnuć inviestycyi ŭ budaŭnictva łahistyčnych centraŭ, a taksama raźvivać kruizny turyzm pa adnoj z samych malaŭničych biełaruskich rek — Prypiaci. 

Paviedamlajecca, što prezientacyja RUEBP «Dniepra-Buhski vodny šlach» atrymała stanoŭčy vodhuk va ŭdzielnikaŭ parłamienckaj kanfierencyi Savieta krain Bałtyjskaha mora. Šerah deputataŭ vykazali hatoŭnaść papularyzavać ideju adnaŭleńnia vodnaha šlachu E-40 u palityčnych kołach svaich krain.

U Olštynie była taksama vyznačanaja dakładnaja data prezientavańnia prajekta pa adnaŭleńni vodnaha šlachu Je-40 jeŭrapiejskim palitykam u Brusieli. Kanfierencyja-prezientacyja projdzie ŭ Jeŭrapiejskim parłamiencie 14 kastryčnika 2014 hoda. Tady ž u budynku Jeŭraparłamienta adkryjecca adpaviednaja tematyčnaja vystava.

«Spadziajemsia, što takija mierapryjemstvy dapamohuć prajektu atrymać jašče bolšuju techničnuju i finansavuju padtrymku na jeŭrapiejskim uzroŭni. Heta paskoryć pačatak praviadzieńnia rabot pa prajektavańni i niepasrednym hidratechničnym budaŭnictvie na niesudnachodnych učastkach E-40. Ciapier ža abjaŭleny mižnarodny tendar na vyznačeńnie padradnaj arhanizacyi, jakaja budzie zajmacca padrychtoŭkaj technika-ekanamičnaha abhruntavańnia adnaŭleńnia vodnaha šlachu. Pieramožca budzie vyznačany ŭ kastryčniku hetaha hoda. Čakajecca, što technika-ekanamičnaje abhruntavańnie adnaŭleńnia vodnaha šlachu Je-40 budzie prezientavanaje ŭžo ŭ vieraśni 2015 hoda», — adznačyŭ hienieralny dyrektar RUEBP «Dniepra-Buhski vodny šlach» Mikałaj Kaciecki.

Prajekt pa adnaŭleńni vadnatranspartnaha złučeńnia E-40 realizujecca orhanami miascovaj ułady, dziaržaŭnymi pradpryjemstvami i hramadskimi arhanizacyjami Biełarusi, Polščy i Ukrainy z 2014 hoda. Bolšuju častku finansavańnia dla inicyjatyvy vydzialaje Jeŭrasajuz.

• 0
• 0
• 0
• 0
• 0
• 0
• 0
• 0