Пра выгоды аднаўлення ваднатранспартнай магістралі E-40 на парламенцкай канферэнцыі Савета краін Балтыйскага мора ў польскім Ольштыне 26 жніўня паведаміла беларуская дэлегацыя РУЭБП «Днепра-Бугскі водны шлях».
Шлях стане новым гандлёвым маршрутам паміж партамі Балтыйскага і Чорнага мораў і дазволіць перавозіць да 4 мільёнаў тон грузу ў год, паведамілі ў сакратарыяце Камісіі па пытаннях развіцця ваднатранспартнага злучэння Е-40 на ўчастку Дняпро — Вісла.
У Савет дзяржаў Балтыйскага мора ўваходзяць краіны Скандынавіі і Балтыі, а таксама Германія, Ісландыя, Польшча, Фінляндыя, Расія. Аднак найбольшую зацікаўленасць у паўнавартасным функцыянаванні ваднатранспартнай магістралі E-40, якая сёння несуднаходная на ўчастку паміж Варшавай і Брэстам, маюць Беларусь, Польшча і Украіна. Менавіта па тэрыторыі гэтых трох краін-суседзяў праходзіць водны шлях E-40.
Паўнавартасна функцыянуючы, водная магістраль E-40 дазволіць Беларусі пашырыць свае экспартныя магчымасці, прыцягнуць інвестыцыі ў будаўніцтва лагістычных цэнтраў, а таксама развіваць круізны турызм па адной з самых маляўнічых беларускіх рэк — Прыпяці.
Паведамляецца, што прэзентацыя РУЭБП «Днепра-Бугскі водны шлях» атрымала станоўчы водгук ва ўдзельнікаў парламенцкай канферэнцыі Савета краін Балтыйскага мора. Шэраг дэпутатаў выказалі гатоўнасць папулярызаваць ідэю аднаўлення воднага шляху E-40 у палітычных колах сваіх краін.
У Ольштыне была таксама вызначаная дакладная дата прэзентавання праекта па аднаўленні воднага шляху Е-40 еўрапейскім палітыкам у Бруселі. Канферэнцыя-прэзентацыя пройдзе ў Еўрапейскім парламенце 14 кастрычніка 2014 года. Тады ж у будынку Еўрапарламента адкрыецца адпаведная тэматычная выстава.
«Спадзяемся, што такія мерапрыемствы дапамогуць праекту атрымаць яшчэ большую тэхнічную і фінансавую падтрымку на еўрапейскім узроўні. Гэта паскорыць пачатак правядзення работ па праектаванні і непасрэдным гідратэхнічным будаўніцтве на несуднаходных участках E-40. Цяпер жа аб'яўлены міжнародны тэндар на вызначэнне падраднай арганізацыі, якая будзе займацца падрыхтоўкай тэхніка-эканамічнага абгрунтавання аднаўлення воднага шляху. Пераможца будзе вызначаны ў кастрычніку гэтага года. Чакаецца, што тэхніка-эканамічнае абгрунтаванне аднаўлення воднага шляху Е-40 будзе прэзентаванае ўжо ў верасні 2015 года», — адзначыў генеральны дырэктар РУЭБП «Днепра-Бугскі водны шлях» Мікалай Кацецкі.
Праект па аднаўленні ваднатранспартнага злучэння E-40 рэалізуецца органамі мясцовай улады, дзяржаўнымі прадпрыемствамі і грамадскімі арганізацыямі Беларусі, Польшчы і Украіны з 2014 года. Большую частку фінансавання для ініцыятывы выдзяляе Еўрасаюз.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі13
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4040
Каментары