1. Kredytnyja karty
Piatro atrymlivaje siem miljonaŭ u miesiac. Taksama ŭ jaho jość niekalki kredytnych kartak z ahulnym abaviazkam u 21 miljon. Za absłuhoŭvańnie hetaha kredytu Piecia štomiesiac płacić bankam dziesiać adsotkaŭ ad svajho zarobku: siemsot tysiač.
Atrymlivajecca amal carkoŭnaja dziesiacina. Kali b Piatro pakłaniaŭsia Załatomu Cialaci, jaho b, mahčyma, takaja situacyja i zadavalniała. Adnak Piatro molicca inšym baham, a svaje banki cicha nienavidzić za štomiesiačnaje vymahańnie hrošaj.
Pry hetym pavoli vypłacić kredyt i pierastać vypłačvać daninu lichviaram nie moža. Pa-pieršaje, jaho ščylna trymaje na kručku taki pryjom jak «minimalny płaciož»: kali Piatro pierastanie marnavać hrošy z kredytak, jamu pryjdziecca na praciahu niekalkich miesiacaŭ žyć na pałovu zarpłaty, čaho jon sabie dazvolić nie moža.
A pa-druhoje, vakoł stolki spakus, stolki rečaŭ-jakija-možna-kupić-za-hrošy … Što Piatro nie bačyć inšaha vyjścia, akramia jak praciahvać hod za hodam karmić banki, jakija žyrujuć na jaho biadzie.
Cikavy fakt: Piatro daŭno ŭžo maryć ab ułasnym biznesie, pry hetym rentabielnaść u tryccać pracentaŭ hadavych jaho bolš čym zadavoliła b. Adnak arhanizavać absalutna žalezny hiešeft — vypłacić bankam pazyku i pačać kłaści pracenty pa kredycie sabie ŭ kišeniu — Piatro nie moža. Matryca nie puskaje.
2. Aŭtamabili
Kola lubić aŭtamabili. Raniej jon jeździŭ na mietro, potym naźbiraŭ hrošaj na žyhuli. Ciapier pieramiaščajecca na ŭziatym u kredyt «Łansiery». Hrošaj u jaho ŭ abrez, časta davodzicca ekanomić na samym važnym, typu vodpusku abo daktaroŭ. Ale žyćcia biez svajho aŭto Kola ŭžo nie ŭjaŭlaje.
Jamu treba addavać kredyt za mašynu, raspłačvacca za ŭciuchanaje dyleram dadatkovaje abstalavańnie i niedarečna darahuju strachoŭku. Jamu treba vyrašać kuču drobnych prablem z parkoŭkaj, z drapinami, z zamienaj raschodnikaŭ i z harantyjnym ramontam. Jamu treba raz na siezon mianiać humu i try razy na tydzień zalivać sabie poŭny bak.
Kola, u pryncypie, nie skardzicca. Kožny asobny hrašovy ŭpyrsk u mašynu całkam pa siłach. Voś tolki kali b Kola staranna padličyŭ košt vałodańnia svaim skarbam, jon by vyśvietliŭ, što vuzkavoki čatyrochkołavy siabar štomiesiac zžyraje tracinu jaho zarobka i pałovu jaho volnaha času.
Ci moh Kola nabyć zamiest «Łansiera» «Ford» ci «Opiel» u narmalnym stanie, kab nie parycca naohuł ni krutoj strachoŭkaj, ni iržoj / drapinami, ni darahimi zapčastkami? Kab kidać mašynu dzie zaŭhodna, i kab pravicca za drobny prajs u dobrym servisie pobač z domam, biez papiarovaj vałtuźni i biez čerhaŭ?
Napeŭna, moh by. Ale kali vy skažacie Kolu, što jon abraŭ sabie mašynu nie pa ŭzroŭni, Kola navat nie budzie pasyłać vas u sr*ku z vašymi paradami. Kola prosta zrobić ździŭlenyja vočy i pakrucić palcam la skroni.
3. Niedasyp
Vola śpić pa šeść hadzin u dzień. Časam — pa piać hadzin. Pračnułasia, žachnuła kavy — i davaj mitusicca da samaj nočy.
Inšaja dziaŭčyna na jaje miescy daŭno b užo zadumałasia ab tym, što niejak jana niapravilna žyvie. Ale Vola voś užo šmat hadoŭ nie vysypajecca, i dumać jana ŭžo daŭno advučyłasia. Kali ŭ Voli vypadajuć svabodnyja paŭhadziny, jana nalivaje sabie čarhovy kubak jakoj-niebudź tanizujučaj burdy i … siadaje tupić.
Hladzić televizar, utykaje ŭ internet, prosta hladzić asałaviełymi vačyma ŭ ścianu i haniaje pa kole pustyja dumki.
Zboku zdajecca, što vyjści z hetaha zahannaha koła vielmi prosta. Treba prosta ŭziać sabie za praviła nyrać pad koŭdru roŭna a dvanaccataj nočy. Para tydniaŭ vaśmihadzinnaha snu, i vy Volu nie paznajecie. Jana stanie spakojnaj i dobraj, pierastanie haŭkać na ludziej i pačnie ŭsio paśpiavać.
Ale … kab u rytmie valsa pierarabić usie spravy da adzinaccaci viečara treba ździejśnić niakisły valavy vysiłak. A na taki vysiłak sonnaja Vola, nažal, nie zdolnaja.
Niavyspanaja Vola budzie štodnia marnavać niekalki hadzin na roznaha rodu biessensoŭnaje hłupstva. Z-za hetych stračanych hadzin Vola budzie štodnia kłaścisia nie ŭ dvanaccać, a ŭ dva. A ŭ vosiem ranicy — chočaš ci nie chočaš — joj daviadziecca niavyspanaj ustavać i kłypać na pracu.
4. Darahija rečy
Hleb nie nastolki bahaty, kab kuplać tannyja rečy. Dakładniej, jon naohuł nie bahaty. Hleb – prosta žabrak, i hrošaj u jaho časta nie chapaje navat na kubak haračaj kavy ŭ aŭtamacie paviercham nižej za jaho ofis.
Adnak kazać «idzicie ŭ dupu, heta dla mianie zanadta doraha» Hleb nie ŭmieje. Z-za hetaha jon pastajanna kuplaje sabie rečy, pry vyhladzie jakich navat u značna bolš zabiaśpiečanaha čałavieka na horle nieadkładna ściskajucca chałodnyja zialonyja łapki.
Skuranaja kurtka canoj u dva zarobki? Ja nie nastolki bahaty, kab kuplać tannyja rečy. I plavać, što ŭ pamierach i fasonach Hleb nie raźbirajecca, z-za čaho vyhladaje ŭ hetaj kurtcy jak syn skupščyka kradzienaha.
Noŭtbuk apošniaj madeli za try tysiačy baksaŭ? Ja nie nastolki bahaty, kab kuplać tannyja rečy. Vaźmu kredyt pad varjackija pracenty, budu dva hady charčavacca aŭsianaj kašaj z sollu i jeździć zajcam na mietro, ale zatoje ŭ mianie na palicy budzie pylicca pryhožy sierabrysty noŭtbuk.
Pytańnie, i čaho b Hlebu nie być ściplejšym i nie kuplać sabie rečy krychu horšyja, ale ŭ dziesiać razoŭ tańniej?
Dy ŭsio prosta. Hleb lanujecca vydatkavać try chviliny času, kab paraŭnać ceny i charaktarystyki, kab praličyć plusy i minusy pakupki. Jamu praściej pa-kavaleryjsku siekanuć rukoj i skazać: «Ja vyrašyŭ, kuplaju». Akramia taho, niahledziačy na dziravyja čaraviki i zaleplenyja izastužkaj akulary, Hleb saromiejecca paviedamlać pradaŭcam, što jon žabrak.
5. Ramont
Kłava ličyć, što kvatery zanadta darahija. Adzin Boh viedaje, jakich namahańniaŭ joj i jaje siamji kaštavała hetaja novaja dvuchpakajoŭka. Ciapier Kłava robić u kvatery ramont.
Voźmiem, naprykład, kuchniu.
Možna pajści ŭ budaŭničy kramu i kupić tam samuju tannuju kuchniu za paru miljonaŭ. Za hetyja hrošy Kłava atrymaje niekalki ŭbohich šafak z ŁDSP, chaj biez usialakich pretenzij na dyzajn, ale ŭsio ž jakija ŭmiejuć zachoŭvać u sabie talerki i rondali.
Možna naviedać jakuju-niebudź našu meblevuju fabryku i vybrać z katałoha kuchniu pad zamovu. Heta budzie daražej, ale zatoje siabroŭki Kłavy buduć uchvalna cokać jazykami pry vyhladzie padśviatleńnia ŭnutry šafak i sinusoidnaha karniza nad pyłazbornymi dekaratyŭnymi paličkami.
Možna zajści ŭ sałon italjanskaj mebli i paddacca ścipłamu abajańniu buržuazii. Tam ceny na kuchni pačynajucca dzieści ad dzksiaci miljonaŭ, ale kali krychu pašancuje, možna budzie adchapić što-niebudź z staroj kalekcyi ź vielizarnaj źnižkaj…
Pytańnie, jakoj chalery Kłava kupiła kuchniu za sto tryccać miljonaŭ? Heta ž hadavy (!) jaje z mužam zarobak. Pry hetym nijakich nazapašvańniaŭ u siamji nie čakajecca, im i tak pryjšłosia pazyčać, kab zaviaršyć ramont da zimy.
Nie, ja razumieju, kuchnia - heta važna, kuchnia — heta nadoŭha, Italija — heta jakaść… Ale kali Kłava nie mahła nijak paŭpłyvać na canu kvatery, to voś chacia b cana ramontu była ŭ jaje ŭładzie? Voś surjozna, kali b Kłava vydatkavała na ramont nie dvaccać tysiač dalaraŭ, a dźvie — što, zekanomlenyja dva hady pracy nie akupili b joj maralnych pakut ad vyhladu tannaj plitki i tonkaha łaminatu?
6. Nyćcio
Jahor pastajanna raskazvaje znajomym historyi, adna dziŭniejšaja za inšuju. Jon viečna na ŭzvodzie, u jaho pastajanna chtości vinavaty: to načalnik, to daišnik.
Viadoma, Jahor maje prava ŭ kole siabroŭ abkładać hienitalijami kaho zaŭhodna … ale ž Jahor pastajanna pakutuje z-za čužych prablem. Zvyčka leźci ŭ čužyja prablemy rehularna prymušaje jaho adčuvać panuraje biaśsille, uśviedamlać, što niedzie niešta drenna, a jon nie moža ničoha źmianić.
Kali b Jahoru chto-niebudź patłumačyŭ, što naš śviet uładkavany niespraviadliva, i što adziny sposab zrabić jaho lepš — pačać z samoha siabie, Jahor, napeŭna, daŭno b užo byŭ na jaki-niebudź kirujučaj pasadzie. Mazhi i ruki ŭ Jahora na miescy, enierhija ź jaho tak i pre.
Voś tolki Jahor, na žal, addaje pieravahu marnavańniu svajoj biaskoncaj enierhii nie na stvaralnuju dziejnaść, a na vykryćcio i pakarańnie ludziej, jakija — na dumku Jahora — pavodziać siabie niapravilna.
Sam siabie Jahor ličyć dobra prystasavanym da žyćcia čałaviekam: jon umieje skandalić i stajać na svaim, moža pry vypadku navat u mordu dać. Siabry ž hladziać na Jahora z drenna prychavanym žalem.
Bo Jahor pastajanna ŭlapvajecca na roŭnym miescy to ŭ skandały, to ŭ bojki, to navat u niejkija niedarečnyja sudy.
7. Niežadańnie vučycca
Darka vydatkavała dziesiać hadoŭ na škołu i šeść hadoŭ na instytut. Strašna padličyć, kolki dziesiatkaŭ tysiač hadzin jana praviała ŭ pylnych aŭdytoryjach, napružana ŭsłuchoŭvajučysia ŭ tužlivaje marmytańnie piedahohaŭ. Darka hanarycca svaim sinim dypłomam i nikoli nie prapuskaje vypadku pachvalicca hučnymi litarami navučalnaj ustanovy, jakoje joj udałosia absiedzieć.
Razam z tym,
Darka lanujecca vydatkavać adzin dzień, kab navučycca narmalna pracavać u Vardzie. Z-za hetaha jana robić dakumienty ŭ try razy daŭžej, čym mahła b, pry hetym dakumienty atrymlivajucca kryvyja. Darka nie bačyć u hetym nijakaj prablemy. Načalstva ž niespraviadliva ličyć Darku durnicaj
i płacić joj udvaja mienš, čym kudy mienš ciamlivaj Kaci. Bo Kacia, niahledziačy na ŭsie svaje niedachopy, Vord asvoiła na prystojnym uzroŭni.
Jašče Darcy lanota vydatkavać niekalki viečaroŭ, kab skončyć kursy kiravańnia. Tamu Darka nie adčuvaje habarytaŭ svajoj pryhožaj mašynki, parkujecca pa 10 chvilin tam, dzie ŭmieły kiroŭca zaparkavaŭsia b za niekalki siekund, i nie radziej, čym raz u paŭhoda traplaje ŭ niedarečnyja avaryi.
Da kučy ŭ Darki vielmi tuha adkryvajecca zamok na ŭvachodnych dźviarach. Kožny viečar Darka padoŭhu tyckaje ŭ jaho klučom, uzdryhvajučy ad kožnaha šołachu ŭ padjeździe i naciskajučy na kluč z roznych bakoŭ. Pry hetym vydatkavać piać chvilin času i znajści rašeńnie prablemy ŭ internecie ŭ hałavu Darcy navat nie prychodzić.
Na žal, u momant vydačy dypłoma Darcy zabylisia skazać, što chalava skončyłasia, i što abaviazak prymušać siabie vučycca ciapier uskładzieny asabista na jaje.
8. Etanolnaja piatla
Jura pieryjadyčna hladzić u lusterka i dumaje, što treba było b, narešcie, zapisacca ŭ trenažornuju zału: prybrać piŭny žyvocik i ŭzbadzioryć myšcy hirami-hantelami. Adnak Jura pracuje piać dzion na tydzień, a paśla pracy vypivaje kružku-druhuju raźviedzienaha etanołu.
Jon zusim nie ałkaholik: Jura vieryć, što śpirt u małych dozach kali nie karysny, to chacia b nie asabliva škodny.
Adnak praca i ałkahol tak dobra strukturujuć jaho čas, što zapisacca ŭ trenažornuju zału jamu absalutna niama kali, dy i sił paśla podźvihaŭ pracoŭnych na podźvihi spartovyja ŭžo nie zastajecca.
Vostrych pryčyn mianiać rytm svajho žyćcia ŭ Jury niama. Prosta
Jura vyhladaje na piatnaccać hadoŭ starejšym za svoj viek i ŭvieś čas adčuvaje siabie źlohku paršyva … ale ŭ cełym usio ok. Matryca trymaje Juru stalovaj chvatkaj.
Šancaŭ sarvać sa svajho horła jaje palcy ŭ Jury, prosta skažam, niašmat.
9. Drennyja zuby
Ryhor zusim nie pakutuje ad zubnoha bolu. Jon viedaje, što ŭ jaho hłyboki karyjes na čatyrnaccaci zubach … ale voś kankretna ciapier ničoha nie balić, i vizit da stamatołaha, nibyta, možna pakul adkłaści.
Ryhor razumieje, što karyjes — heta nie nasmark, sam pa sabie jon nie projdzie. Ryhor razumieje, što stavić pratezy — heta i doŭha, i baluča, i doraha. Ryhor razumieje, što zaciahvać ź vizitam da stamatołaha nie varta.
Ale ŭ jaho ciapier stolki roznych spraŭ, i ŭ jaho ciapier stolki terminovych vydatkaŭ … Nu, vylečyć Ryhor ciapier adzin zub. I što źmienicca? Bo zastaniecca jašče trynaccać chvorych.
Matryca redka pakidaje svaim rabam siły kłapacicca pra zdaroŭje. Matryca patrabuje ad raboŭ spačatku raźličycca pa jaje rachunkach.
10. Viasielli i dni naradžeńnia
Alesia vychodzić zamuž. Alesia pracuje pamočnikam mieniedžara, jaje abrańnik — małodšym inžynieram techničnaj padtrymki. Biudžet śviežastvoranaj siamji – tysiača dalaraŭ u miesiac.
Biudžet viasiella – dvanaccać z pałovaj tysiač.
Čamu b Alesi nia raśpisacca cicha ŭ ZAHSie i nie pajechać adznačać abmien piarścionkami ŭdvaich z mužam u jaki-niebudź cichi restarančyk? Navošta joj hety pietrasianisty tamada, navošta joj hetyja haniebnyja konkursy, navošta joj hety natoŭp pjanaha bydła, što niazhrabna tupaje nahami pad Vierku Siardziučku?
Navošta treba załazić u pazyki, rabavać baćkoŭ, karmić i paić ludziej, jakija, budziem ščyryja, całkam u stanie pajeści i vypić za svoj košt? Alesia ž nie durnica i razumieje, što kali jana nie budzie ładzić viasielle, nichto na heta i ŭvahi nie źviernie: pacisnuć plačyma i zabuduć na nastupny dzień.
Pryčyny spuskać u nikudy hadavy dachod siamji ŭ Alesi dźvie. Pa-pieršaje, tak joj zahadvaje Matryca ŭ asobie našych zvyčajaŭ i tradycyj. Pa-druhoje, Alesi chočacca pakrasavacca ŭ biełaj sukiency i Alesia ličyć, što hod pracy dvuch čałaviek — całkam narmalnaja cana za niekalki viasielnych fota.
Viadoma, abaroncy naiŭnaj dziaŭčyny mahli b skazać ciapier, što viasielle byvaje raz u žyćci … Ale ž jość jašče dni naradžeńnia, pachavańni, śviatkavańnie Novaha hoda. Kolki hrošaj Alesia budzie spuskać štohod na hetyja biestałkovyja viačorki?
11. Drobnyja vydatki
Vasil pracuje santechnikam pa vykliku. Tam dvaccatka, tut dziasiatka… u cełym musiŭ by vychodzić niadrenny zarobak. Adnak bolš, čym tysiač šeśćsot, u Vasi ŭ kašalku zvyčajna nie ploskajecca, jon amal zaŭsiody na mieli.
Čamu?
Bo
Vasia jak zarablaje hrošy, tak ich i marnuje: nie ličačy. Sto piaćdziesiat tysiač na taksi da doma. Dźvieście tysiač na abied u restaranie. Niejak pracuješ i pracuješ … a hrošaj niama jak niama.
Kali b Vasia zavioŭ sabie natatnik i pačaŭ tudy zapisvać usie prybytki i vydatki, u jaho b ad žachu zavarušylisia vałasy. Jon by ŭbačyŭ, što pajeści ŭ restaranie — heta nie niaščasnyja dźvieście tysiač za raz, jak jon dumaŭ, a šeść miljonaŭ u miesiac, siemdziesiat dva miljony ŭ hod. Vasia b ubačyŭ, što taksi — heta zručna i kamfortna, ale dva miesiacy pierasoŭvańniaŭ na maršrutkach dazvolać jamu kupić novy kamputar, pra jaki jon maryć užo try hady.
Adnak jak i musić narmalny rab Matrycy, ličyć hrošy Vasia nie ličyć patrebnym.
12. Rekłama
Alena pje kołu, palić malbara, žuje ścimarał i žare ŭ try horły hambuhiery ŭ makdonaldsie. Ad jaje zaŭsiody pachnie dolčie habana, a svoj ajfon Alena nosić u sumcy ad łuiviton.
Pry hetym Alena ŭpeŭnienaja, što rekłama na jaje nijak nie dziejničaje, a chvory straŭnik i pusty kašalok — heta jaje ŭłasny vybar.
Drapiežnyja pysy z teleekranaŭ choram padtrymlivajuć Alenu ŭ jaje naiŭnaj pamyłcy: «Ty volny čałaviek, Alenka, ty razumnaja i pryhožaja žančyna, ty zaŭsiody całkam dobraachvotna i niezaležna vybiraješ, kamu z nas ty pakorliva adniasieš čarhovuju svaju zarpłatu».
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary