Kiraŭnica Mižnarodnaj kanfiederacyi prafsajuzaŭ ab pravach biełaruskich pracoŭnych: «Rabstva ŭ XXI stahodździ»

Hienieralny sakratar Mižnarodnaj kanfiederacyi prafsajuzaŭ (MKP) Šaran Barou šakavanaja faktami dyskryminacyi ŭ dačynieńni da svabodnych prafsajuzaŭ Biełarusi. Pra heta jana zajaviła 15 vieraśnia na sustrečy z kiraŭnictvam i aktyvistami biełaruskich niezaležnych prafsajuzaŭ.

Sustreča adbyłasia ŭ ramkach aficyjnaha vizitu kiraŭnika MKP ŭ Minsk 15-16 vieraśnia. U časie hutarki jaje ŭdzielniki raspaviali Barou ab situacyi z pravami pracoŭnych u Biełarusi, a taksama pra fakty dyskryminacyi členaŭ svabodnych prafsajuzaŭ na dziaržpradpryjemstvach i ŭ arhanizacyjach. U hutarcy z žurnalistami, jakaja adbyłasia paśla zakančeńnia mierapryjemstva, hienieralny sakratar MKP adznačyła, što da svajho pryjezdu jana była ŭ kursie składanaj situacyi ź niezaležnymi prafsajuzami ŭ Biełarusi, pakolki «vyvučała jaje jašče pa linii Mižnarodnaj arhanizacyi pracy (MAP)».

«Ale ja była šakavanaja tymi faktami dyskryminacyi ŭ dačynieńni da svabodnych prafsajuzaŭ, - skazała Barou. - Ja była ździŭlenaja nastupstvami dekreta № 9, jaki tyčycca faktyčna prymusovaj pracy. Ja pracuju ŭ mnohich prablemnych rehijonach, u tym liku krainach Piersidskaj zatoki, dzie isnujuć surjoznyja prablemy ŭ płanie dyjałohu z uładami, ale rabstva ŭ XXI stahodździ — takoje navat tam mała dzie sustrenieš».

Kiraŭnik MKP padkreśliła, što «praca - heta nie tavar», jana praduhledžvaje «hodnaść čałavieka», a «hodnaść čałavieka abapirajecca na prava na pracu, svabodu asacyjacyj, na realizacyju tych demakratyčnych svabodaŭ, jakija pavinny pieravažać ŭ sučasnym hramadstvie».

U toj ža čas Barou było pryjemna pačuć, što lidary niezaležnych prafsajuzaŭ, vymušanyja «ŭstupać u kanfrantacyju z uładami i administracyjaj pradpryjemstvaŭ», zacikaŭleny «ŭ pabudovie narmalnych ekanamičnych adnosin, u raźvićci ekanomiki krainy, kab jana mahła z upeŭnienaściu hladzieć u budučyniu».

Kiraŭnik mižnarodnaha prafsajuznaha ruchu paviedamiła, što 16 vieraśnia joj treba budzie sustrecca z namieśnikam ministra zamiežnych spraŭ Biełarusi Valancinam Rybakovym i namieśnikam ministra pracy i sacyjalnaj abarony Iharam Staravojtavym. «Na sustrečy ź imi ja pasprabuju adlustravać usie pačutyja siońnia historyi, pieradać usie atrymanyja ŭražańni. <…> Ja pasprabuju danieści da biełaruskich uładaŭ, što rabočyja - členy prafsajuzaŭ nie źjaŭlajucca ŭłasnaściu najmalnikaŭ. Najmalniki i pracoŭnyja pavinny znachodzicca ŭ stanie partniorskich adnosin, mienavita jany pryviaduć krainu da zdarovaha ekanamičnaha raźvićcia», - padkreśliła jana.

Barou taksama paviedamiła, što ŭ kastryčniku hetaha hoda ŭ Minsku projdzie sieminar MAP pa viadzieńni kalektyŭnych damovaŭ. Akramia taho, źjaviłasia inicyjatyva ŭ pačatku nastupnaha hoda pravieści ŭ Minsku rehijanalny sieminar z pryciahnieńniem prafsajuznych arhanizacyj niekalkich krain, kab abmierkavać pytańnie svabody asacyjacyj. Vybar biełaruskaj stalicy byŭ abumoŭleny tym, što Minsk vystupiŭ pieramoŭnaj placoŭkaj pa ŭrehulavańni ŭkrainskaha kryzisu.

«My spadziajemsia, što, sabraŭšy rehijanalnyja siły prafsajuznaha ruchu z roznych krain mienavita ŭ Minsku, my zmožam abmierkavać pytańnie svabody asacyjacyjaŭ u šyrokim sensie hetaha paniaćcia, a taksama paŭpłyvać na situacyju na miescy. Kali taki sieminar adbyvajecca ŭ Biełarusi, dzie jość parušeńni ŭ hetaj śfiery, možna čakać, što ŭ hetym pytańni buduć pryniatyja peŭnyja miery», - zaznačyła kiraŭnik MKP.

Mižnarodnaja kanfiederacyja pracy była stvorana ŭ 2006 hodzie šlacham abjadnańnia Mižnarodnaj kanfiederacyi svabodnych prafsajuzaŭ (MKSP) i Suśvietnaj kanfiederacyi pracy (SKP). U kanfiederacyju ŭvachodzić 301 siabroŭskaja arhanizacyja, jakaja pradstaŭlaje 176 młn rabočych u 155 krainach śvietu.

• 0
• 0
• 0
• 0
• 0
• 0
• 0
• 0