16 vieraśnia deputaty Viarchoŭnaj rady Ukrainy z treciaj sproby pryniali zakonaprajekt ab lustracyi. Za jaho prahałasavali 235 parłamientaryjaŭ pry nieabchodnych 226.
Zhodna z novym zakonam, siarod usich dziaržsłužačych — ad vajskoŭcaŭ i da čynoŭnikaŭ — budzie praviedziena maštabnaja pravierka. Pa jaje vynikach buduć zvolnienyja i straciać prava zajmać dziaržaŭnyja pasady asoby, jakija zajmali z 25 lutaha 2010 hoda pa 22 lutaha 2014 h pasady prezidenta, premjer-ministra, pieršaha vice-premjera, ministraŭ, kiraŭnikoŭ NBU, SBU, prakurory Kijeva i abłasnych centraŭ.
Na takich ža ŭmovach buduć zvolnienyja ŭsie vysokapastaŭlenyja čynoŭniki, jakija zajmali pasady z 25 lutaha 2010 hoda pa 22 lutaha 2014 (u pieryjad znachodžańnia va ŭładzie Viktara Janukoviča), rabotniki pravaachoŭnych orhanaŭ, dziaržsłužačyja i słužbovyja asoby orhanaŭ miascovaha samakiravańnia, što nanieśli «škodu žyćciu, zdaroŭju i majomaści udzielnikaŭ Jeŭramajdanu. Heta ž tyčycca asob, jakija publična zaklikali da sieparatyzmu.
Aprača taho, Ukrajina vyrašyła raźvitacca i z naščadkami kamunistyčnaj namienkłatury.
Lustracyja pazbavić pasadaŭ asob, jakija znachodzilisia da 19 žniŭnia 1991 hoda na kiroŭnych pasadach u KPSS i VŁKSM, palitrabotnikaŭ Uzbrojenych sił SSSR i MUS SSSR, byłych supracoŭnikaŭ śpiecsłužbaŭ i asob, «jakija mieli dačynieńnie da palityčnaha pieraśledu udzielnikaŭ ukrainskaha nacyjanalna-vyzvalenčaha ruchu časoŭ Druhoj suśvietnaj vajny i pavajennaha času».
Jak zajaviŭ premjer-ministr Arsień Jacaniuk na siońniašnim pasiadžeńni ŭrada Ukrainy, pad dziejańnie zakona ab lustracyi va Ukrainie padpadaje kala 1 młn čynoŭnikaŭ roznych ranhaŭ.
Varta adznačyć, što lustracyja — heta nie pakarańnie. Čałaviek prosta zvalniajecca i nie moža bolš nikoli pracavać u dziaržaŭnych upraŭlenčych strukturach. Nijakaj kryminalnaj ci administracyjnaj adkaznaści jon nieści nie budzie.
Ciapier čytajuć
Čempijon Biełarusi i Polščy trapiŭ za kraty praz toje, što źbieh ad słužby ŭ biełaruskim vojsku. A ciapier uvohule źnik2
Kamientary