Virus Eboły pranik u Jeŭropu
Ebołu vyjavili ŭ miedsiastry, što lačyła ispanskaha śviatara, jaki pryvioz jaje z Afryki. Heta pieršy vypadak zaražeńnia čałavieka ad čałavieka ŭ Jeŭropie. Dahetul zaražalisia tolki jeŭrapiejcy, što pracavali ŭ Zachodniaj Afrycy.
Miedsiastru pieravieźli ŭ špital Madryda Hospital de Alcorcon. Asablivuju tryvohu vyklikaje toj fakt, što jana pracavała ŭ infiekcyjnym špitali, prystasavanym dla baraćby z Ebołaj.
Ispanskija ŭłady zajaŭlajuć, što padstavaŭ dla paniki niama, ale pakul nie mohuć patłumačyć, u čym pryčyna zaražeńnia i dzie byli parušanyja karancinnyja pracedury.
Miedsiastra była častkaj kamandy, jakaja lačyła ispanskaha 69-hadovaha manacha Manuela Harsija Vjechu, što sam zaraziŭsia, ratujučy chvorych u Śjera-Leone. Uratavać jaho nie ŭdałosia, jon pamior 25 vieraśnia. Pierad tym, u žniŭni, pamior jašče adzin ispanski śviatar.
U miedsiastry tempieratura padniałasia 30 vieraśnia. Dva analizy paćvierdzili zaražeńnie Ebołaj. Pakul stan jaje zdaroŭja zastajecca stabilnym. Tempieratura nie pieravyšaje 38,6 hradusa — miaža, paśla jakoj Eboła robicca niezvarotnaj.
Eboła pieradajecca, kali jość pramy kantakt z vadkaściami cieła zaražanaha čałavieka.
Ciapier ispanskija miedyčnyja ŭłady vyznačajuć koła kantaktaŭ zaražanaj miedsiastry. Viadoma, što jana zamužam i nie maje dziaciej.
Usiaho ŭ hrupu pa lačeńni brata Vjechi ŭvachodziła 30 daktaroŭ i miedrabotnikaŭ.
Raniej ispanskija daktary nie zdoleli ŭratavać inšaha śviatara-doktara, što zachvareŭ na Ebołu, pracujučy ŭ balnicy ŭ Libieryi.
U zonach, achoplenych virusam, treba trymać strohuju hihijenu. Kateharyčna nielha hołym ciełam kantaktavać z vadkaściami (ślinia, kroŭ, mača i h.d.) ź cieła chvoraha ci ich śladami.
Kamientary