Spotify: Piesień na anhlijskaj u pop-muzycy stanovicca ŭsio mienš

Kampanija paviedamlaje, što ŭ minułym hodzie ŭ jaje hłabalnym top-50 źjavilisia pieśni na 16 roznych movach, uklučajučy ispanskuju, karejskuju, partuhalskuju, tureckuju, indaniezijskuju i arabskuju. Heta bolš čym udvaja pieravyšaje pakazčyk 2020 hoda.

Bad Bunny, jaki śpiavaje vyklučna na ispanskaj movie, staŭ artystam, jakoha najbolš słuchajuć u śviecie. A łaŭreat Brit Award Razalija ŭ svaim apošnim albomie «Lux» śpiavaje na 14 dyjalektach.

Spotify paviedamiŭ, što brazilski fank staŭ žanram, jaki raście najchutčej u śviecie, a jaho aŭdytoryja pavialičyłasia na 36%. Papularnaść K-Pop vyrasła na 31%, Trap Latino — na 29%.

Pavodle danych kampanii, usie hetyja žanry prynieśli Spotify bolš za 100 miljonaŭ dalaraŭ u vyhladzie rojałci ŭ minułym hodzie.

Pry hetym anhlijskaja mova pa-raniejšamu daminuje ŭ čartach: pavodle danych arhanizacyi IFPI, jakaja pradstaŭlaje intaresy muzyčnaj industryi, 14 z 20 samych pradavanych albomaŭ minułaha hoda byli zapisanyja vyklučna na hetaj movie.

Adnak u śpis uvajšli paŭdniovakarejskija hurty Stray Kids, Enhypen i Seventeen, a taksama japonski rok-hurt Mrs Green Apple — fanaty ŭsio čaściej źviartajucca da muzyki, jakaja vychodzić za miežy typovych paradyhmaŭ roku i pop-muzyki.

Pavialičyć

Na minułym tydni ŭ čarcie piesień Spotify, jakija najbolš prasłuchoŭvalisia byli pieśni Bad Bunny i Rauw Alejandro (Puerta-Ryka), Nadhif Basalamah (Indaniezija), Tyla (Paŭdniovaja Afryka), Tems (Nihieryja), Ryan Castro (Kałumbija), El Bogueto, Peso Pluma, Neton Vega i Fuerza Regida (Mieksika), Blackpink, Jung Kook i Jin (Paŭdniovaja Kareja).

U hetym płanie Vialikabrytanija pa-raniejšamu adstaje ad astatniaha śvietu. Tolki ŭ dźviuch z samych pradavanych u krainie piesień u minułym hodzie hučali zamiežnyja movy, pryčym abiedźvie kampazicyi — APT ad Rosé & Bruno Mars i Golden ad Huntr/x — byli pieravažna na anhlijskaj movie z asobnymi frazami na karejskaj.

Rekordnyja vypłaty

Danyja Spotify byli apublikavanyja ŭ štohadovaj spravazdačy Loud And Clear, u jakoj pradstaŭlenaja padrabiaznaja infarmacyja pra hłabalnuju ekanomiku stryminhavych muzyčnych servisaŭ.

Pavodle danych Spotify, u minułym hodzie stryminhavy hihant vypłaciŭ muzyčnaj industryi 11 miljardaŭ dalaraŭ u vyhladzie rojałci, što na 1 miljard dalaraŭ bolš, čym u 2024 hodzie. Jak śćviardžaje kampanija, hetaja ličba robić jaje samym vysokaapłatnym rytejleram u śviecie.

U Vialikabrytanii kampanija vypłaciła artystam 860 miljonaŭ funtaŭ sterlinhaŭ u vyhladzie rojałci, što na 6% bolš, čym u papiarednim hodzie, pryčym bolš za 75% hetych rojałci byli atrymanyja pa-za miežami Vialikabrytanii.

Spotify taksama paviedamlaje, što kala 150 brytanskich artystaŭ zarabili letaś bolš za 1 miljon funtaŭ, a kolkaść artystaŭ, jakija zarabili bolš za 500 tysiač funtaŭ, z 2018 hoda pavialičyłasia bolš čym udvaja.

U hłabalnym śpisie 80 viadučych artystaŭ zarablajuć bolš za 10 miljonaŭ dalaraŭ na hod tolki na Spotify.

Adnak šviedskaja kampanija pastarałasia padkreślić, što vypłaty prynosiać hrošy nie tolki adnamu pracentu samych paśpiachovych vykanaŭcaŭ, zajaviŭšy, što «prykładna pałova rojałci była atrymanaja niezaležnymi artystami i łejbłami».

Bolš za 13 800 artystaŭ zarabili na Spotify u minułym hodzie 100 000 dalaraŭ, dadała kampanija.

Dobra pradumanaja palityka prazrystaści kampanii zaklikanaja adkazać krytykam, jakija śćviardžajuć, što jana niedapłačvaje artystam, jakija atrymlivajuć ad 0,002 da 0,0035 funta za kožnaje prajhravańnie pieśni.

Adnak varta adznačyć, što rojałci, jakija raźmiarkoŭvajucca Spotify, nie zaŭsiody pastupajuć naŭprost muzykam, bo častka ich časta adychodzić łejbłam, dystrybjutaram, vydaŭcam, mieniedžaram i aŭtaram piesień.

Miž tym niekalki artystaŭ, u tym liku Massive Attack, Deerhoof i King Lizard and the Gizzard Wizard, razarvali adnosiny sa Spotify na znak pratestu suprać suviaziaŭ kampanii z abaronnaj kampanijaj Helsing.

Denieł Ek, hienieralny dyrektar i suzasnavalnik Spotify, niadaŭna byŭ pryznačany staršynioj niamieckaj technałahičnaj kampanii, jakaja śpiecyjalizujecca na prahramnym zabieśpiačeńni štučnaha intelektu, intehravanym u bajavyja samaloty i bieśpiłotniki, takija jak HX-2 AI Strike Drone.

Abviaščajučy pra rašeńnie vydalić svoj katałoh sa Spotify, muzyki Massive Attack zajavili:

«Ekanamičny ciažar, jaki doŭhi čas kłaŭsia na artystaŭ, ciapier uzmacniajecca maralnym i etyčnym ciažaram, u vyniku čaho hrošy, zaroblenyja prychilnikami, i tvorčyja namahańni muzykantaŭ finansujuć śmiarotnyja, apakaliptyčnyja technałohii».

U adkaz na heta pradstaŭnik kampanii rastłumačyŭ, što Spotify i Helsing źjaŭlajucca «całkam asobnymi kampanijami».

• 0
• 0
• 0
• 1
• 0
• 0
• 0
• 0