Pa spravie ab niezakonnym palavańni ŭ čarnobylskaj zonie prachodziać 11 čałaviek — inśpiektary pryrodaachovy, jehiery, milicyjaniery

Pa spravie ab niezakonnym palavańni ŭ čarnobylskaj zonie, u Vietkaŭskim rajonie Homielskaj vobłaści, pra jakuju niadaŭna stała viadoma, prachodziać 11 čałaviek, paviedamiła prahrama «Hałoŭny efir» telekanała «Biełaruś 1» viečaram 14 śniežnia. Siarod fihurantaŭ-bakańjeraŭ — inśpiektary pryrodaachovy, jehiery, rabotniki lashasa i supracoŭniki milicyi.

Pakul viadoma pra čatyroch zabitych łasioŭ. Data ŭčynieńnia złačynstva — 7 śniežnia. Asnoŭnyja padazronyja byli zatrymanyja ŭ hety ž dzień. Pryčynieny ŭron pryrodzie za kožnaha zabitaha łasia acenieny ŭ 900 bazavych vieličyń, usiaho — bolš za paŭmiljarda rubloŭ. Fihurantaŭ spravy čakaje kryminalnaja adkaznaść za słužbovyja złačynstvy i štrafy za niezakonnaje palavańnie.

Pa zonie brakańjery pieramiaščalisia na ciuninhavanym «UAZie» sa śpiecnumaram «SIERIEHA», jaki, jak śćviardžajuć televizijonščyki, byŭ viadomy va ŭsioj akruzie. Haspadara mašyny i jaho svajaka ŭsie bajalisia. Mienavita jany asnoŭnyja fihuranty kryminalnaj spravy: baćka — jehier Homielskaha BTPR, syn — namieśnik načalnika mižrajonnaj Homielskaj inśpiekcyi pryrodaachovy. Pavodle śviedčańnia žycharoŭ vioski Śviaciłavičy, baćka arhanizavaŭ u zonie biźnies pa zdabyčy dzičyny. Adzin ź jaho partnioraŭ — rasijanin, žychar najbližejšaha rasijskaha pasiołka Čyrvonaja Hara. U jaho byŭ propusk na bieśpieraškodnaje naviedvańnie čarnobylskaj zony.

Padčas vobšuku hałoŭnaha fihuranta kanfiskavana vosiem palaŭničych strelbaŭ, čatyry karabiny i niekalki socień patronaŭ.

Asablivaje miesca ŭ arsienale zajmali «jažy» — drobnyja kanstrukcyi z kavałkaŭ armatury, zhornutyja asablivym sposabam. Ich raskidvali za saboj na darozie, što nie davali mahčymaści milicyi, laśnikam dabracca da brakańjeraŭ.

13 śniežnia Dziaržaŭnaja inśpiekcyja pa achovie žyviolnaha i raślinnaha śvietu abjaviła ab tym, što supracoŭnikami KDB 7 śniežnia była zatrymanaja hrupa palaŭničych u kolkaści bolš čym 10 čałaviek, siarod jakich — słužbovyja asoby šerahu struktur, u tym liku dva supracoŭniki Homielskaj abłasnoj i mižrajonnaj inśpiekcyj achovy žyviolnaha i raślinnaha śvietu.

12 śniežnia kalehija Dziaržaŭnaj inśpiekcyi pa achovie žyviolnaha i raślinnaha śvietu pryniała rašeńnie ab zvalnieńni namieśnika načalnika Homielskaj abłasnoj inśpiekcyi, panižeńni na pasadzie načalnika Homielskaj mižrajonnaj inśpiekcyi, a taksama pryciahnieńni da dyscyplinarnaj adkaznaści načalnika Karmianskaj mižrajonnaj inśpiekcyi, na terytoryi jakoj było ŭčyniena pravaparušeńnie, i načalnika apieratyŭna-analityčnaha adździeła Homielskaj abłasnoj inśpiekcyi. Supracoŭniki, jakija znachodziacca pad śledstvam, buduć zvolnienyja z vykanańniem ustanoŭlenych pracedur u miežach kryminalnaj spravy.

Ciapier abvinavačańnie pradjaŭlena 11 asobam, u tym liku trom supracoŭnikam inśpiekcyi pa achovie žyviolnaha i raślinnaha śvietu, piaci supracoŭnikam homielskaj milicyi i słužbovaj asobie Vietkaŭskaha śpieclashasa.

• 0
• 0
• 0
• 0
• 0
• 0
• 0
• 0