Lidary Łatvii i Estonii zaklikali pryznačyć śpiecpasłańnika ES dla kantaktaŭ z Kramlom
Premjer-ministr Łatvii Evika Silinia i prezident Estonii Ałar Karys zaklikali pryznačyć śpiecyjalnaha pradstaŭnika ES, jaki zaniaŭsia b adnaŭleńniem dypłamatyčnych kanałaŭ z Rasijaj. Pra heta palityki zajavili ŭ asobnych intervju telekanału Euronews.
Na dumku lidaraŭ bałtyjskich krain, taki krok nieabchodny ŭ miežach abmierkavańnia spynieńnia vajny va Ukrainie. Pryznańnie śpiecpasłańnika dazvolić Jeŭrapiejskamu sajuzu atrymać prava hołasu za stałom pieramovaŭ, jakija ciapier viaducca pieravažna pamiž Vašynhtonam, Kijevam i Maskvoj.
«Zaŭsiody treba razmaŭlać, ale nam nieabchodna izalavać Rasiju i pa-raniejšamu ŭžyvać suprać jaje sankcyi. My pavinny być za stałom pieramovaŭ, bo ŭkraincy sami pačali pieramovy. Dyk čamu jeŭrapiejcy nie pavinny ich vieści?» — zajaviła Silinia.
Hetyja zajavy śviedčać pra źmienu stratehičnaha padychodu Jeŭropy: u ES zaniepakojenyja tym, što sajuz faktyčna adchileny ad niepasrednych dyskusij u miežach mirnaha pracesu, jaki ŭznačalvajuć ZŠA.
Pry hetym Silinia i Karys padkreślili, što lubyja kantakty z Maskvoj pavinny adbyvacca tolki paśla kansultacyj z Ukrainaj, a kandydatura budučaha pieramoŭščyka pavinna być kampramisnaj fihuraj, prymalnaj dla ŭsich krain-členaŭ ES.
Raniej z anałahičnaj inicyjatyvaj vystupiŭ prezident Francyi Emaniuel Makron. Pavodle jaho słoŭ, praca pa pryznačeńni śpiecpasłańnika ŭžo pačałasia na «techničnym uzroŭni». Ideju taksama padtrymała premjer-ministr Italii Džordža Miełoni.
Uletku 2025 hoda, kali ideju ŭpieršyniu vyłučyli, bolšaść jeŭrapiejskich lidaraŭ ličyli taki krok niemetazhodnym, adnak ciapier pazicyja Brusiela źmianiajecca, adznačaje Euronews.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary