Daručeńnie Alaksandra Łukašenki pa adnaŭleńni pahałoŭja śviniej da kanca 2014 hoda nie vykanana. Pra heta śviedčać statystyčnyja źviestki.
Tak, pa stanie na 1 studzienia 2015 hoda ŭ krainie naličvałasia 2 młn. 464,1 tys. hałoŭ śviniej, za minuły hod ich pahałoŭje źniziłasia na 10,8%.
Kiraŭnik dziaržavy, nahadajem, patrabavaŭ ad urada da kanca 2014 hoda adnavić pahałoŭje śviniej na ŭzroŭni, jaki byŭ da ŭźniknieńnia ŭ krainie AČS (afrykanskaj čumy śviniej). «Što za prablema? Heta ž nie byka vyraścić, što jamu treba 18 miesiacaŭ, heta na praciahu hoda možna adnavić pahałoŭje. I my pra heta damovilisia», — skazaŭ Łukašenka, źviartajučysia da členaŭ urada ŭ mai minułaha hoda padčas pajezdki ŭ Smalavicki rajon.
Letam kiraŭniki Minsielhascharču zajaŭlali, što daručeńnie prezidenta pa adnaŭleńni pahałoŭja śviniej da kanca hoda pavinna być vykanana.
«Zaraz u nas jość daručeńnie prezidenta adnavić pahałoŭje śviniej, i my z hetaj zadačaj spravimsia. Da 2015 hoda my pavinny vyjści na letašniaje pahałoŭje śviniej», — kazaŭ u červieni namieśnik ministra sielskaj haspadarki i charčavańnia Vasil Siedzin.
Varta zaznačyć, što pieršaje sioleta pasiadžeńnie prezidyuma Savieta ministraŭ było pryśviečana mienavita prablemam śvinahadoŭčaj haliny i prachodziła z udziełam novaha premjer-ministra Andreja Kabiakova. «Pa vynikach pasiadžeńnia Minsielhascharču daručana zabiaśpiečyć štotydniovy kantrol za vykanańniem abłvykankamami zaćvierdžanych płanaŭ pa adnaŭleńni abjomaŭ vytvorčaści śvininy», — paviedamiła pres-słužba ŭrada.
Uspyški AČS byli zafiksavanyja ŭ Biełarusi ŭ 2013 hodzie. Baraćba ŭładaŭ z epidemijaj pryviała da značnaha skaračeńnia pahałoŭja žyvioły ŭ druhoj pałovie 2013 hoda. Z-za niedachopu śvininy na ŭnutranym rynku ceny na miasa značna vyraśli: za 2014 hod śvinina na ŭnutranym rynku padaražeła na 59,7%.
Da vyjaŭleńnia AČS pahałoŭje śviniej u Biełarusi składała 3,3 młn. hałoŭ.
Ciapier čytajuć
U SIZA KDB apynuŭsia Mikałaj Cyrto, fihurant staroj spravy Biełarusbanka. Druhi raz — za palityku1
Kamientary