Viadomy svajoj «patryjatyčnaj» dziejnaściu motakłub zładzić na pačatku lutaha «pałomnictva» pa haradach Rasii i Biełarusi.
Mierapryjemstva projdzie z 4 pa 8 lutaha pry padtrymcy Rasijskaha vajenna-histaryčnaha tavarystva. Ab hetym paviedamlajecca na aficyjnym sajcie patryjatyčnaj arhanizacyi.
Udzielniki pałomnictva naviedajuć Maskvu, Smalensk, Połack, Minsk, Homiel i Bransk. Bajkiery źbirajucca naviedać šerah manastyroŭ. Uvohule, paviedamlajecca, što mierapryjemstva ździajśniajecca «ŭ słavu prapadobnych śviatych voinaŭ-schimanachaŭ Alaksandra Pieraśvieta i Andreja Aślabi, jakija ŭčynili podźvih u imia ziamli Ruskaj. Motapałomnictva stavić svajoj metaj zachavańnie i raźvićcio histaryčnaj i kulturnaj spadčyny Rusi, jaje duchoŭnych tradycyj i kaštoŭnaściaŭ».
Pałomniki padniasuć u dar manastyram i chramam abliččy prapadobnych Pieraśvieta i Aślabi i ikony z abliččami śviatych bałkanskich ziamiel, pryviezienyja ŭ dar z matacykletnaha pałomnictva «Ruskija Bałkany».
Fakt motaprabiehu — ci motapałomnictva — paćvierdzili ŭ minskim adździaleńni kłuba. Praŭda, ci voźmie ŭdzieł u im kiraŭnik «Vaŭkoŭ» Alaksandr Załdastanaŭ (Chirurh), pakul što dakładna nieviadoma – u pačatku lutaha projdzie šmat mierapryjemstvaŭ. Adnak pra palityčnyja pohlady svajho kiraŭnika z nami razmaŭlać admovilisia.
«My nie nadta publičnaja arhanizacyja, — paviedamiŭ «Našaj Nivie» Andrej, adzin z kiraŭnikoŭ minskaha adździaleńnia. – I razvažać na hetuju temu mnie nie vielmi cikava».
Ź mierkavańniem, što apošnija hady «Načnyja vaŭki» stali davoli publičnaj arhanizacyjaj, surazmoŭca nie pahadziŭsia.
Nahadajem, što «Načnyja vaŭki» — adzin ź pieršych motakłubaŭ na postsavieckaj prastory. Jon byŭ zasnavany jašče ŭ 1989 hodzie. U apošnija hady kłub prytrymlivajecca rasijska-šavinistyčnych pohladaŭ. Jaho lidary zajaŭlali, što abapirajucca na pravasłaŭnyja kaštoŭnaści, aktyŭna padtrymlivajuć palityku Uładzimira Pucina, jaki, darečy, nieadnarazova sustrakaŭsia z «Vaŭkami». U 2012 hodzie va Ukrainie rasijski prezident uvohule spaźniŭsia na 4 hadziny na sustreču ź Janukovičam, bo vyrašyŭ zavitać u łahier bajkieraŭ. A ŭ studzieni 2014 hoda «Načnyja vaŭki» nieśli dziažurstva la zachoplenaha ruskimi šturmavikami budynka Sievastopalskaj administracyi.
U studzieni hetaha hoda Załdastanaŭ, supolna z akcioram Michaiłam Parečankavym i viadomym svaimi antyamierykanskimi pohladami piśmieńnikam Mikałajem Starykavym, stvaryŭ hramadski ruch «Antymajdan». Meta hetaha ruchu — «nie dapuścić u Rasii padziej, anałahičnych padziejam na kijeŭskim Majdanie Niezaležnaści».
Kamientary