Łukašenka: U Biełarusi ŭdałosia pierałamać tendencyju adtoku z navukovaj śfiery maładych kadraŭ
U Biełarusi ŭdałosia pierałamać tendencyju adtoku z navukovaj śfiery maładych kadraŭ i moładź znoŭ źviazvaje svoj los z navukaj.
Heta adznačyŭ Alaksandr Łukašenka 23 studzienia ŭ čas uručeńnia dypłomaŭ akademikam i členam-karespandentam Nacyjanalnaj akademii navuk.
Kiraŭnik dziaržavy adznačyŭ, što va ŭsie časy hałoŭnym ruchavikom navukovaj dumki byli praktyčnyja patreby ludziej. Mienavita ŭ ich čerpaje natchnieńnie sapraŭdny vučony. I, viadoma, niama bolšaj radaści dla daśledčyka, čym bačyć, jak vyniki jaho pracy znachodziać prymianieńnie i słužać ahulnaj karyści, adznačyŭ Łukašenka.
«Jašče Frederyk Kiury havaryŭ, što vučonyja, budučy členami vialikaj siamji pracoŭnych, pavinny być zakłapočany tym, jak vykarystoŭvajucca ich adkryćci. Nielha zabyvać, što ŭ sučasnym hramadstvie mienavita navuka adyhryvaje vyrašalnuju rolu ŭ farmiravańni śvietapohladu čałavieka. Asablivaje značeńnie majuć humanitarnyja navuki. Bo navukovyja dasiahnieńni nie tolki zabiaśpiečvajuć uzdym ekanomiki i techničny prahres, ale i padtrymlivajuć kulturny, adukacyjny i intelektualny patencyjał nacyi. Heta asnova samastojnaha raźvićcia dziaržavy», — padkreśliŭ Łukašenka.
«Ciapier aŭtarytet vučonaha i prestyž prafiesii ŭ hramadstvie niaŭchilna pavyšajucca, — adznačyŭ kiraŭnik dziaržavy. — Nam udałosia pierałamać tendencyju adtoku z hetaj śfiery maładych kadraŭ, i moładź znoŭ idzie pracavać u łabaratoryi, źviazvaje svoj los z navukaj».
Alaksandr Łukašenka ličyć, što ŭ Hod moładzi treba ŭźniać na novy ŭzrovień rabotu pa padtrymcy talenavitych studentaŭ, aśpirantaŭ, maładych navukovych rabotnikaŭ. Treba bolš aktyŭna dzialicca ź imi nabytymi viedami, pryciahvać da navukovych daśledavańniaŭ.
Kiraŭnik dziaržavy pierakanany, što ŭkładzienaja ŭ vychavańnie padrastajučaha pakaleńnia praca akupicca mnahakratna, bo heta załoh pierajemnaści stvoranych navukovych škoł.
«Pryjemna, što mnohija z vas nie skakali ź miesca na miesca, a ŭsio svajo žyćcio pryśviacili vybranaj prafiesii, — padkreśliŭ Łukašenka. — Niachaj heta stanie dobrym prykładam dla vašych maładych kaleh. Kožny vučony pavinien hanarycca svaimi vučniami i vychoŭvać navukovuju źmienu. Śmialej padtrymlivajcie pierśpiektyŭnych daśledčykaŭ, zaachvočvajcie ich inicyjatyvu i daviarajcie im adkaznyja zadačy».
Ciapier čytajuć
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski28
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2525
Kamientary