U Biełarusi startavaŭ ruch pa papularyzacyi idei paasobnaha zboru śmiećcia «Meta-99»

Jak paviedamiła 3 lutaha na pres-kanfierencyi dyrektarka dziaržaŭnaj ustanovy «Apieratar druhasnych materyjalnych resursaŭ» Natalla Hryncevič, inicyjatyva skiravanaja na pryciahnieńnie žycharoŭ krainy «da biaśpiečnaha i ekałahična pravilnaha abychodžańnia z adchodami».

target99.by

«Mnie chaciełasia b, kab nasielnictva sartavała adchody i kab heta było prosta, chaciełasia b, kab dla ŭsich nas heta stała naturalna», — skazała śpiecyjalistka. 

Pavodle jaje słoŭ, nazva ruchu «Meta 99» aznačaje, što kraina imkniecca da vykarystańnia 99% kamunalnych adchodaŭ. «My razumiejem, što stavić zadaču ŭ 100% nie zaŭsiody realna, tamu ruch zaviecca «Meta 99» — heta taja meta, da jakoj my chočam iści. Kožny z nas zacikaŭleny ŭ tym, kab zrabić krainu lepšaj, čyściejšaj, kab pakinuć jaje svaim dzieciam, unukam u takim vyhladzie, u jakim my jaje bačyli», — padkreśliła Hryncevič. 

Štohod u Biełarusi ŭtvarajecca kala 4 młn. ton ćviordych kamunalnych adchodaŭ, ź ich 3 młn. ton — adchody spažyvańnia ad nasielnictva. Paasobny zbor adchodaŭ praktykujecca ŭ Biełarusi ŭžo bolš za 10 hadoŭ, ale, pavodle słoŭ Hryncevič, aktyŭnaść hramadzian u hetym pracesie jašče niedastatkovaja. «Resursaŭ taksama nie chapaje, tamu što my ŭsie razumiejem, što achapić adrazu ŭsiu krainu i rasstavić u adzin dzień kantejniery niemahčyma. U nas robiacca zachady ŭ hetym kirunku, ale nieabchodny ŭdzieł u pieršuju čarhu hramadzian», — skazała jana. 

Pavodle danych apieratara druhasnych materyjalnych resursaŭ, letaś u Biełarusi było likvidavana 551,8 tys. ton druhasnych materyjalnych resursaŭ (DMR), ci 14% ad usiaho abjomu ćviordych kamunalnych adchodaŭ: 329,4 tys. ton adchodaŭ papiery i kardonu, 122,9 tys. ton adchodaŭ škła, 47,9 tys. ton palimiernych adchodaŭ, 39,6 tys. ton znošanych šyn, kala 2,3 tys. ton adchodaŭ elektronnaha i elektryčnaha abstalavańnia. Dla paraŭnańnia: u krainach ES u siarednim vykarystoŭvajecca kala 40% adchodaŭ, u Hiermanii — bolš za 60%. 

Jak adznačyŭ namieśnik ministra žyllova-kamunalnaj haspadarki Anatol Šahun, abjom zboru asnoŭnych vidaŭ DMR u Biełarusi vyras amal u dva razy ŭ paraŭnańni z 2009 hodam, kali było likvidavana prykładna 280 tys. ton DMR. «Sistema dla paasobnaha zboru adchodaŭ siońnia hałoŭnym čynam sfarmiravana. Jana budzie, viadoma, dalej raźvivacca — čym bolš budziem paasobna źbirać, tym bolš budziem raźvivać. Tamu voś hetaj užo sfarmiravanaj sistemie treba bolš aktyŭny ŭdzieł čałavieka», — skazaŭ jon.

• 0
• 0
• 0
• 0
• 0
• 0
• 0
• 0