Aleh Koval, były načalnik Frunzienskaha RUUS Minska, — u centry. Fota guvd.gov.by.
Hałoŭnaja redaktarka sajta «Chartyja-97» Natalla Radzina źmiaściła ŭ svaim fejsbuku list, jaki atrymała siońnia redakcyja:
«Chodziać razmovy, što načalnik Frunzienskaha RUUS Minska Koval Aleh Mikałajevič, atrymaŭšy vymovu, byŭ vyklikany da ministra Šunieviča. Pa vykliku nie źjaviŭsia. Doma i na pracy nie abjaŭlaŭsia. Žonka skazała, što jon sabraŭ zaplečnik i źjechaŭ u Krasnadar. Adtul u Rastoŭ i ciapier vajuje na baku DNR».
Sapraŭdy, da niadaŭniaha času Aleh Koval uznačalvaŭ Frunzienski adździeł milicyi Minska, paru miesiacaŭ nazad jaho źniali z pasady i pryznačyli na jaje Andreja Lubimava.
Mabilny telefon Aleha Kovala niedasiažny. Pryčym, nakolki nam stała viadoma, užo davoli praciahły čas. «Naša Niva» patelefanavała dadomu Alehu Kovalu, kab abvierhnuć ci paćvierdzić infarmacyju.
Syn milicejskaha načalnika paćvierdziŭ, što baćki niama doma. Dakładniej, što doma jon daŭno nie źjaŭlaŭsia. Jon nie daŭ adkazu na pytańnie, kali jon budzie doma. Ci praŭda, što jon Aleh Koval pajechaŭ vajavać u «DNR», spytalisia my. «Heta niejki aniekdot. Kaniečnie, nie», — adkazaŭ syn.
Taksama «Naša Niva» patelefanavała papiaredniku Kovala na pasadzie načalnika Frunzienskaha RUUS, namieśniku staršyni Libieralna-demakratyčnaj partyi Alehu Hajdukieviču.
«Tak, ja viedaju, što ŭ jaho byli prablemy. Ale ŭ mianie niama takoj infarmacyi pra adjezd. Ja spadziajusia, što heta niapraŭda. Biełaruś stolki robić dla ŭrehulavańnia kanfliktu, a jon jedzie vajavać. Lepš by hrošy na padtrymku «Łohvinava» pieravioŭ», — adznačyŭ sp.Hajdukievič.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal2
Kamientary