Siarod zabitych ukrainskich vajskoŭcaŭ jość uradženiec Navahrudka
Za hod bajavych dziejańniaŭ u Danieckaj i Łuhanskaj abłaściach zahinuła bolš za 1600 ukrainskich vajskoŭcaŭ. I heta tolki viadomyja straty. Heta bajcy Nacyjanalnaj hvardyi, terytaryjalnych bataljonaŭ, słužby biaśpieki i h.d.
Śpisy zahibłych rehularna abnaŭlajucca, jak na staroncy ŭ Vikipiedyi, hetak i na admysłovych sajtach. Źviarnuła ŭvahu, što siarod palehłych pad Iłavajskam značycca 41-hadovy Vasil Hančarenka, miescam naradžeńnia jakoha paznačyny Navahrudak, Respublika Biełaruś.
Aryjencirovačnaj dataj śmierci Vasila Hančarenki značycca 31 žniŭnia 2014 hoda. Bajec pamior u špitali ad ranaŭ, atrymanych pry adstupleńni pad Iłavajskam.
Bijahrafičnaja daviedka Vasila Hančarenki karotkaja. Jon byŭ staršym sapioram u bataljonie «Danbas», mieŭ pazyŭny «Vahon». Pišuć, što na raźvitańnie z Hančarenkam pryjšła ŭsio vulica Levanieŭskaha ŭ Biełaj Carkvie (Kijeŭskaja vobłaść). A 14 vieraśnia haradskaja rada Biełaj Carkvy padtrymała rašeńnie ab prysvajeńni Vasilu Hančarenku zvańnia hanarovaha hramadzianina horada.
«Naša Niva» datelefanavałasia ŭ Biełuju Carkvu da siamji Vasila Hančarenki. Słuchaŭku źniała jahonaja ŭdava Natalla. «Jon ukrainiec, a nie biełarus. Sprava ŭ tym, što Vasila baćki byli vajskoŭcami, ich časta adpraŭlali ŭ roznyja častki, tamu jon i naradziŭsia ŭ Navahrudku. U Biełarusi jon pražyŭ, zdajecca, da pieršaha kłasa, a ŭ škołu pajšoŭ užo va Ukrainie», - raskazała Natalla.
Siarod zahibłych jość jašče jak minimum adzin čałaviek, jaki źviazany ź Biełaruśsiu. Heta 25-hadovy chłopiec Raman Nikitčanka, jaki pracavaŭ u Biełarusi. Jon byŭ minamiotčykam u 93-j miechanizavanaj bryhadzie. A zahinuŭ 5 śniežnia padčas abstrełu siała Piaski ŭ Danieckaj vobłaści.
Kamientary