Hramadzianin Rasii zdymaŭ vakzały, UUS i vajenkamaty Homielščyny 

Adskanavanaja kopija dakumienta, padpisanaha namieśnikam ministra Mielčankam i datavanaja 25 lutaha, źjaviłasia na adnym z forumaŭ.

Kali vieryć hetamu dakumientu, to pryčynaj pavyšanaj uvahi da ŭsich, chto fatahrafuje, albo zdymaje na videa administracyjnyja budynki stała zatrymańnie hramadzianina Rasii ŭ Łojevie. Kaleśničenka A.A. nibyta byŭ zatrymany ŭ 10 hadzin 23 lutaha padčas fatahrafavańnia miascovaha RUUS. Paśla, užo ŭ pastarunku ŭ jaho fotaaparacie znajšli fota inšych adminbudynkaŭ.

U dziažurnaj častcy Łojeŭskaha RUUS Jeŭraradyjo paćvierdzili, što hramadzianin Rasijskaj Fiederacyi nasamreč byŭ zatrymany 23 lutaha. Jon byŭ apytany i navat asudžany za «administracyjnaje pravaparušeńnie». Dzie hety hramadzianin znachodzicca ciapier i jaki jaho los, łojeŭskija milicyjanty paviedamić admovilisia.

***

Nižej cytujem tekst apublikavanaha ŭ internecie dakumienta całkam:

«23 lutaha 2015 hoda ŭ 10.00 la budynka Łojeŭskaha RUUS zatrymany hramadzianin Rasijskaj Fiederacyi Kaleśničenka A.A., jaki pry dapamozie fotaaparata ździajśniaŭ zdymku budynka RUUS i raźmieščanaha pobač vajenkamata. Pry dahladzie vyniatych u jaho rečaŭ na unutranym nośbicie infarmacyi fotaaparata byli znojdzienyja 15 fotazdymkaŭ z vyjavami budynkaŭ dziaržaŭnych orhanaŭ, čyhunačnaha vakzała Homiela, a taksama frahmientaŭ unutarnych i źniešnich častak pavietranaha sudna.

Z metaj vyklučeńnia anałahičnych pravakacyjnych dziejańniaŭ, a taksama ŭ vykanańnie Ukazańnia Ministra unutranych spraŭ Respubliki Biełaruś pa zabieśpiačeńni hramadskaj biaśpieki nieabchodna:

— Aryjentavać supracoŭnikaŭ UUS, jakija niasuć słužbu ŭ składzie štatnych naradaŭ, a taksama naradaŭ, zadziejničanych u achovie hramadskaj biaśpieki ŭ adzinaj dysłakacyi, na vyjaŭleńnie, zatrymańnie i dastaŭku va UUS asobaŭ, jaki ažyćciaŭlali fota- i videazdymki budynkaŭ dziaržaŭnych orhanaŭ, u tym liku tych, jakija ažyćciaŭlajuć pravaachoŭnuju dziejnaść, a taksama krytyčna važnych abjektaŭ. Papiaredzić ab nieabchodnaści pavyšeńnia pilnaści padčas niasieńnia słužby.

— Padčas ažyćciaŭleńnia raźbiralnictva z dadzienymi asobami abaviazkova zabiaśpiečyć ich asabisty vobšuk, apytańnie, pravierku pa bazam dadzienych MUS, a taksama pastanoŭku na dakta-, fota i videaulik.

— Arhanizavać pravierku fota-, huka, videazapisvajučaj aparatury, jakija znachodziacca pry ich, inšych pryładaŭ, jakija vykarystoŭvajucca dla hetych metaŭ, a taksama abstalavańnia dla pryjomu i pieradačy dadzienych pa pravadnych i biespravadnych kanałach suviazi.

— Pra kožny fakt zatrymańnia takich asobaŭ nieadkładna infarmavać upraŭleńnie apieratyŭna-dziažurnaj słužby milicyi hramadskaj biaśpieki MUS pa telefonie z nastupnym pradstaŭleńniem na praciahu troch hadzin telehramy z tłumačeńniem abstavinaŭ vyjaŭlenaha pravaparušeńnia i pryniatych mier.

Namieśnik Ministra, hienierał-major milicyi N.A.Mielčanka.

***

Pieršaja infarmacyja pra zatrymańnie milicyjaj za fatahrafavańnie administracyjnych budynkaŭ źjaviłasia 27 lutaha — supracoŭnika «Kamsamolskaj praŭdy ŭ Biełarusi» Dźmitryja Łaśko amal čatyry hadziny pratrymali ŭ pastarunku paśla taho, jak jon sprabavaŭ zrabić fota budynka Akademii navuk.

Milicyjanty pry hetym spasyłalisia na unutranaje rasparadžeńnie MUS, datavanaje 25 lutaha. Akurat hetaja data staić na raspaŭsiudžanaj 10 sakavika ŭ internecie kopii.

Paźniej paviedamleńni ab zatrymańniach za fatahrafavańnie administracyjnych budynkaŭ pačali prychodzić i ź inšych rehijonaŭ krainy.

• 0
• 0
• 0
• 0
• 0
• 0
• 0
• 0