Zarobki biełaruskich prahramistaŭ adny z samych vysokich va Uschodniaj Jeŭropie
Zarobki prahramistaŭ u Biełarusi siońnia vyšej, čym u šerahu krain Uschodniaj Jeŭropy. Pra heta zajaviŭ dyrektar dziaržaŭnaj ustanovy «Administracyja Parku vysokich technałohij» Valeryj Capkała padčas anłajn-kanfierencyi na sajcie BiełTA.
Valeryj Capkała rastłumačyŭ, što ŭzrovień zarabotnaj płaty zaležyć ad popytu i prapanovy. «Popyt naradžaje prapanovu, i zavyšanyja zarpłaty — heta jak raz vynik popytu na biełaruskich prahramistaŭ», — adznačyŭ jon.
Pa słovach dyrektara PVT, siońnia zarpłaty biełaruskich prahramistaŭ vyšejšyja, čym u ich kalehaŭ u Čechii, Polščy, Vienhryi i šerahu inšych krain Uschodniaj Jeŭropy.
Nahadajem, u hetym hodzie dla PVT płanavali ŭ try razy pavialičyć ŭznosy ŭ Fond sacyjalnaj abarony nasielnictva, a taksama padniać z 9 da 10% staŭku padachodnaha padatku dla rezidentaŭ PVT. Adnak PVT udałosia adstajać lhotnyja adličeńni ŭ FSAN.
Pavodle źviestak Biełstata, u studzieni siaredni zarobak u tych, čyja dziejnaść źviazana z vyličalnaj technikaj, skłaŭ krychu bolš za 23 młn rubloŭ, u Minsku hety pakazčyk pieravysiŭ 24,6 młn rubloŭ.
Kažučy pra pierśpiektyvy rostu zarobkaŭ u hetaj śfiery, Valeryj Capkała adznačyŭ, što heta mahčyma ŭ vypadku, kali buduć uźnikać praduktavyja kampanii (nie tyja, jakija prosta akazvajuć pasłuhu, a raspracoŭvajuć svaje pradukty). «Kali hety pradukt źjaŭlajecca kamiercyjna vielmi paśpiachovym, to kampanija, viadoma, moža sabie dazvolić płacić vielmi vysokija zarpłaty», — rastłumačyŭ svoj punkt hledžańnia dyrektar PVT.
Kamientary