Čverć biełarusaŭ ličyć, što ludzi sami vinavatyja ŭ śniežańskaj devalvacyi

Nie zvažajučy na namahańni Nacbanka pa praviadzieńni dedałaryzacyi, tolki 17,6% žycharoŭ krainy nikoli nie pieraličvajuć svaje zarpłaty ŭ valutu. Takija dadzienyja atrymali ekśpierty niezaležnaha instytuta sacyjalna-palityčnych i ekanamičnych daśledavańniaŭ (NISEPD), zarehistravanaha ŭ Vilni.

Dla 34,1% biełarusaŭ pa-raniejšamu aktualnym zastajecca mienavita dalaravy ekvivalent dachodaŭ. Jašče 43,5% apytanych pryznalisia, što časam nadajuć uvahu «zialonym» pry acency ŭzroŭniu svaich dachodaŭ.

Pavodle dadzienych NISEPD, čym starejšy žychar Biełarusi, tym mienš jaho chvalujuć suadnosiny rubla i dalara. Naprykład, tolki 11,9% hramadzian, starejšych za 60 hadoŭ, pieraličvajuć svaje dachody ŭ amierykanskuju valutu. Pry hetym, u katehoryi «60+» amal 40% apytanych zajavili, što naohuł nikoli nie pryviazvajucca da kursu «zialonaha». Najbolšaja dola tych, chto «zaležyć» ad dalara, akazałasia siarod biełarusaŭ va ŭzroście ad 30 da 39 hadoŭ (45,8%).

Jašče adno pytańnie, jakoje zadali sacyjołahi biełarusam, datyčyłasia pryčyn devalvacyi ŭ śniežni-studzieni.

Amal pałova apytanych (44,5%) ličyć, što padzieńnie kursu biełaruskaha rubla źviazana z pasłableńniem rasijskaj valuty. Jašče 37,4% upeŭnienyja, što pieradumovaj 30-pracentnaj devalvacyi stała pamyłkovaja palityka Nacbanka i ŭrada. I amal čverć biełarusaŭ ŭziała vinu na siabie: pavodle ich mierkavańnia, padzieńnie rubla źviazana z tym, što nasielnictva aktyŭna skuplała valutu.

Treba skazać, tezis ab tym, što rost kursu dalara pravakujuć sami žychary Biełarusi, niaredka ahučvaŭsia ŭładami. «Chočacie abvału — biehajcie pa abmieńnikach. Heta ŭsio ŭ rukach hramadzian našaj krainy. Kivać na kiraŭnictva, na ŭrad, na Nacyjanalny bank siońnia nieprymalna», — zajaviŭ Alaksandr Łukašenka 18 śniežnia minułaha hoda.

Praź niekatory čas kiraŭnika dziaržavy dapoŭniŭ tahačasny premjer-ministr Michaił Miaśnikovič: «Za kastryčnik-listapad biahučaha hoda hramadzianie našaj krainy impartavali z Rasijskaj Fiederacyi 21500 aŭtamabilaŭ. Pa samych ścipłych acenkach, heta kala $320 młn. Heta dalary, jakija vyvieźli ź Biełarusi ŭ Rasiju… Heta była vyhadnaja ździełka dla ludziej. Heta ŭ niejkaj miery sparadziła ažyjatažny popyt na valutu».

Što tyčycca pytańnia ab mahčymam paŭtareńni devalvacyi, to realnaj hetuju pahrozu ŭ sakaviku ličyli 32,8% biełarusaŭ, i tolki 12,9% byli ŭpeŭnienyja, što padzieńnie valuty ŭ bližejšyja miesiacy nie zdarycca.

• 0
• 0
• 0
• 0
• 0
• 0
• 0
• 0